2014年6月5日 星期四

[壹週刊 1265] 上水人妻日賺三百 M1,




爆壹爆

上水人妻日賺三百

呢排大陸嚴打水貨客,搞到好多人唔夠膽帶貨,爆哥知道水貨集團唔夠人,竟然想到貼街招來請人帶貨,你都咪話唔奇,仲打電話來問爆哥有冇人幫佢開工。







爆哥當然睬你有味,但都走去上水舊墟睇嚇班水貨客咩環境,發覺仲有唔少人以自僱形式繼續走,當中好多係本地師奶,日日湊埋剛放學嘅仔女就來搵食。唔好睇小班師奶,佢哋走奶粉、煙酒、糖果及其他日用品嘅水貨,山大斬埋有柴燒,例如走一支日本小清酒就賺一百蚊,兩罐奶粉賺五十蚊,仲未計其他日用品,爆哥親眼目睹一位上水少婦帶住囝囝,拖一個行李喼及背囊,走一轉差不多賺到三百幾蚊,算幾好搵啦,不過近日深圳海關可能為咗響應 689,已加強打擊水貨客,有水貨師奶被深圳海關扣查身上水貨時,就嬲到瞓地嚟賴死抗議。

水貨佬都可以公開招聘,睇嚟真係好唔夠人用。

上海仔結婚喇!

﹙設計圖片﹚

上海仔呢期好紅,大把有錢佬照住之外,連電影《竊聽風雲 3》都抄佢個 Look。爆哥最近去澳門賭兩手,就喺貴賓廳見到佢著得官仔骨骨,滿面春風,隔籬一個土豪暗中話俾爆哥聽,原來上海仔有喜。「佢年頭訂咗婚,遲啲會擺酒結婚!」爆哥聽到上海仔從此被困,覺得好驚奇,因為佢出名把啷過油,冧女有一手,身邊女伴好似走馬燈,上海仔雖然風流,但絕不下流,出名對女友豪爽體貼,最鍾意送 H字頭的包包俾女友。咁多年嚟,江湖上同佢傳過緋聞嘅藝人有梅小惠、 JJ賈曉晨,連前國家領導人的孫女都俾佢識到。至於今次新娘係邊個,上海仔收得好密,話要保護 darling喎。

查實上海仔並非上海人,只係佢老豆曾經喺上海做生意,走難嚟到香港,個個叫佢做「上海佬」,咁佢個仔咪叫上海仔囉。上海仔份人好姿整,最著緊佢個招牌「冬菇頭」,無論出席紅白二事,入到會場前,佢例必右手揸梳,左手照鏡,話要梳齊個頭先好見人喎。

澳門廳主打吊針

講緊唔係賭廳生意難撈,而係班廳主打吊針來美容。爆哥近日同一班澳門賭廳廳主食開飯時,奇怪係發覺班人明顯比以前容光煥發,個樣不單只靚仔咗,仲精神飽滿,呢班友仔個個夜夜笙歌,照計佢哋面色都係頹廢青綠嗰隻,冇理由咁光彩。當爆哥讚完佢哋好面色後,佢哋先自爆原來近排廳主圈子流行去打營養「點滴」(類似吊鹽水)嘅玩意,響澳門打,一次大約二千幾蚊,對廳主嚟講,消費唔算貴,但就收到容光煥發同精神飽滿功效,因為好多廳主迷信,望落去外觀醒神就算係行運象徵,傾生意成功機會都高好多,否則面如菜色,有好嘢都唔預你。

爆哥估唔到內地人愛打點滴風氣竟然吹到澳門,連一眾廳主都受落,不過當爆哥問佢哋營養點滴係乜嘢,就只係知道內裡含有各種營養補品,但實際係乜就無人答得出,只係見人打佢又打,最緊要靚仔,冇諗過呢啲醫療嘢,點都有危險性。



鍾意就快D Share啦!
Related Posts Plugin for WordPress, Blogger...