掃呢頁CODE去手機

2014年6月12日 星期四

[壹週刊 1266] 緊張湊 B 爆發筋膜炎 陳茵媺無限期退出 茵媺,陳茵媺,M1,




10/6

抱仔抱到左手有筋膜炎的陳茵媺,手痛都堅持抱仔,就算陳豪準備好 BB車,她都要抱住。

娛頭

緊張湊 B 爆發筋膜炎 陳茵媺無限期退出

陳豪、陳茵媺的寶貝仔梓燁( Aiden Joshua)去年十二月四日出世以來,外間一直只見過他的 BB手仔和大側面發相,自此, Mo仔再沒有曝光!老豆陳豪承諾過的一家三口全家福,仍未兌現。

為方便妻兒出入,陳豪秘密購入一部七人車做 BB車,每次帶 Mo仔外出,都會出動隱形戰車,避開傳媒。本週二(六月十日)陳豪一家三口出動,終於目睹被陳豪六度讚好靚仔的 BB真身,七個月大的 Aiden肥嘟嘟,眼仔似媽咪,鼻似足老豆。

初為人母,新手陳茵媺變成緊張大師,抱仔抱到出現「媽媽手」,爆發筋膜炎,要長時間戴住手架,將手腕到手肘位置箍住外,還要定時定候睇跌打。據了解,打算餵足一年人奶的陳茵媺,將復出拍劇日期無限押後,無綫詐曬型,為塞住公司把口,陳豪執黎耀祥二攤,同蓋鳴暉合作拍膠劇。

隱形 BB車

唔想囝囝 Aiden真身曝光,陳豪陳茵媺用盡辦法,阻截傳媒得手。為方便帶 Mo仔外出,陳豪唔聲唔聲買了架七人車,但平時兩公婆一定不會用此七人車出入,以免被傳媒察覺。由於 BB戰車不曾曝光,加上每次都拉上窗簾,就算有傳媒在陳豪所住的屋苑守候, BB都出入自如。

知己知彼,細心陳豪摸清傳媒守候慣性時間,大多數在中午後開始,所以每次帶 Mo仔出街,只揀晨早出發。

上週四(六月五日),陳茵媺帶埋 Mo仔去尖沙咀馬可孛羅酒店同朋友食晏,但她十點半便出門口,並由大伯(陳豪胞兄)揸住隱形 BB車,不時兜路試探是否有可疑車輛跟尾。

去到目的地後,陳茵媺繼續保持警覺性,放在孭帶中的 Mo仔面貼向媽咪心口,頭上再加多一塊布,將 BB整個頭都遮住,只露出半對手仔和半對腳仔。

Mo仔個樣同陳豪(右)陳茵媺小時候個樣相似度極高,眼就似媽咪,鼻就似爸爸。

Mo仔十分精靈,鍾意四圍望,面珠肥嘟嘟十分趣致。

同朋友食完飯一齊離開,朋友的兒子跟 Mo仔玩又幫他遮擋陽光。

老婆負責抱仔,陳豪就幫手攞嘢,孭住個 Gucci奶粉袋。

送完老婆睇醫生,陳豪帶 BB返阿媽屋企,離開時由大伯抱住 BB上車。

週二一早陳豪用隱形 BB車先送老婆去天後睇跌打。

三度摸仔

臨上車前短短三十秒,陳豪就三次出手摸乖仔個頭,一副有仔萬事足模樣。

媽媽手

所謂的媽媽手是大拇指筋膜炎其中一種,醫學名稱是「 Dequervain」,據骨科醫生潘德鄰指,一般常見於需要照顧嬰兒的主婦,由於主婦經常抱 B做家務,如洗奶樽、扭毛巾等,拇指及手腕經常向上用力,動作重複得多,持續勞損,便會引致手腕近手指公位置疼痛,造成筋膜發炎,情況嚴重的會伸延至前臂;患者可佩戴手架,強制拇指活動以減輕病情,亦可配合物理治療如超聲波、冷熱敷等,嚴重患者甚至要接受手術治療。醫生建議,餵人奶的母親不適宜服藥治療,因藥物會直接影響嬰兒,應盡量休息,避免再過度重複動作。

警覺性強

食完晏,陳茵媺與大伯將手推 BB車收起放回坐駕,沿途陳茵媺雖然降低防範,未有用布冚住 Mo仔,但仍不忘用手上外套遮擋 BB塊面,其間因為放物件上車,才將外套放低, Mo仔最新容貌終於見光!似剛瞓醒的他,一對眼仔似足陳茵媺,鼻仔高高似陳豪, BB頭髮仍未開始生長,右邊腳仔近腳眼位置,有一笪大約 5cm淡褐色胎記。之後,陳茵媺抱埋 Mo仔去無印良品 shopping,由於得自己一個,緊張程度即時加大幾倍,再幫囝囝冚頭外,每逢有人行近,陳茵媺都會望實,留意對方是否手持相機、電話;在無印良品買了幾個膠 file後,便匆匆離開。

傷手照抱仔

陳茵媺緊張湊仔,長時間抱 B,加上 Mo仔相當重秤,結果導致左手出現筋膜炎(俗稱媽媽手),要長期戴住手架,護住手腕及手肘位置紓緩痛楚,避免惡化。「 Aimme(陳茵媺)好錫個仔,離開一陣都唔捨得,大部分時間都係自己湊 B,餵奶換片沖涼全部自己嚟,有時 BB扭計喊,佢更加唔捨得,第一時間抱住氹。 Aiden好黐 Aimme,所以佢唔會因為手痛就抱少啲。」陳茵媺身邊人說。

本週二(十日)上午,陳豪親自駕駛隱形 BB車一家三口出動。先送老婆到天後睇跌打,再帶 Mo仔返銅鑼灣探嫲嫲,等陳茵媺睇完跌打再會合, Mo仔由大伯父抱住上車,陳豪殿後攞住 BB車,望住個仔行的他全程笑到合唔埋口,之後一家去尖沙咀食晏。有陳豪在場,陳茵媺表現較放心,沒有緊張用布冚住 Mo仔,只將 BB的面仔貼向自己,以防被人見到。手痛未癒的她,仍堅持自己抱,有 BB車都唔用。

食到下午二時,一行人離開餐廳行去上車,其間陳茵媺不停同 Mo仔傾偈,只見 Mo仔四圍擰周圍望,十分精靈得意。臨開車前三十秒,記者見陳豪用手摸了囝囝三次,每次臉上都「擎」住個超冧表情。

5/6

陳茵媺帶 B行街,為免被人睇到阿仔全貌,她用布將 BB包到實,只露出手仔同腳仔。

BB的右腳有一個 5cm大胎斑。

當日陳豪要工作,大伯就充當司機載陳茵媺同 BB外出。

去年 BB出院,陳豪用調虎離山計,一方面自己同傳媒做訪問,引開視線,另一方面就等 BB離開。

阿媽唔易做

初為人母緊張仔女在所難免,唔少星媽都試過因為湊 B,搞到自己受傷。

楊千嬅

楊千嬅佗 B時,因經常用手撐住身體「卸力」,經骨醫診斷患上手筋膜炎,誕下 Torres後,更因經常抱 B,令情況更加嚴重,要定期接受物理治療。

碧咸嫂

碧咸嫂 Victoria在誕下細女 Hurper Seven時弄傷腰,加上抱囡囡發錯力令盆骨椎間移位,經物理治療師診治後,禁止碧咸嫂著高踭鞋,直至腰傷痊癒。

蔡少芬

誕下兩女的蔡少芬,去年在家中因滾水壺翻倒,為怕弄傷女兒「包子」,竟撲上前接住水壺,結果燙傷大髀,起了個 3吋大水泡。

延長餵人奶

據了解,陳茵媺為 Mo仔健康著想,將原本餵人奶半年的計劃更改為一年,為此,原本打算下半年復工的她,將無限期停工只肯間中出席賺錢活動,要長時間或天昏地暗的拍劇工作,因為影響餵奶,她一律 say no。「 Aimme生完 BB之後變咗好多,以前佢好想喺事業方面有進一步發展,諗住結婚生仔之後都繼續做,但個仔出世之後,佢乜都 BB優先考慮,佢擔心拍劇冇時間湊仔,又會壓力影響乳汁分泌,加埋隻手又痛,所以無論 TVB點催佢,都照推!」陳茵媺身邊人說。

9/6

難得陳豪放假幫手湊仔,陳茵媺外出兩個鐘同班港姐好友戚黛黛、曹敏莉及朱凱婷食飯。

陳豪陳茵媺以夫妻檔出席活動可以收雙倍以上價錢,最近有嬰兒用品打他們一家三口主意,出到四倍價錢都請唔鬱,因為陳豪唔想個仔曝光。

剛剛先同胡杏兒拍完《陪著你走》,休息一陣就即刻拍《水髮胭脂》,這部劇去年拍宣傳片時,是由黎耀祥主演。

頂上拍膠劇

陳茵媺唔肯復工,無綫方面亦有微言,為了令公司放自己老婆一馬,陳豪唯有自己嚟頂。「阿 Mo(陳豪)上個星期先拍完《陪著你走》,原本諗住休息幾個月唔接劇,湊嚇仔同做活動賺奶粉錢,點知珍姐(曾勵珍)成日催 Aimme復工,佢唔想啲人再搞住 Aimme,唯有話自己可以唔放假繼續開工,咁 BB要媽咪照顧,大家就冇理由催 Aimme開工。阿 Mo冇得揀,公司俾咗套以粵劇做背景嘅膠劇《水髮胭脂》佢拍,仲要係黎耀祥唔肯接,阿 Mo執二攤同蓋鳴暉做情侶。都冇得推,真係替佢難頂。」一名幕後工作人員說。

高度戒備

為了寶貝子女的自身安全,以及避免日常生活受到騷擾,紅星、名人千方百計防止子女曝光,出錢出力,用心良苦!

李澤鉅幼子

作為首富長子嫡孫,李澤鉅的幼子 Michael原本安排入讀父親的母校聖保羅男女,但礙於校方堅拒保鏢同行,最後改入讀漢基國際學校,每天由三名外籍保鏢作貼身以及中、遠距離全方位保護。

劉華愛女

已經兩歲的劉向蕙一直未有曝光,為保愛女真身,劉華不惜工本,豪花二億打造滿布閉路電視、滴水不入的安全大屋,每次囡囡出入亦有十人保鏢團連車隊傍實,此外,有指劉華豪花二億訂購 Embraer Legacy 650型私人飛機,為日後同小 Hanna外遊做準備。

李家傑三胞胎

智信、智仁及智勇出入有保鏢、保母貼身侍候,為讓三胞胎同外界保持距離,三兄弟入讀有錢都未必入得到的貴族學府,哈羅香港國際學校( Harrow International School)。

梁洛施三子

為了長治和孖仔 H&N不受傳媒騷擾,小小超李澤楷安排下四母子在加拿大多倫多定居。但有指長治已於去年回港,入讀港島一間名牌幼稚園,接送返學,由保鏢、保母團包辦,只有少數學校高層知其身份。



鍾意就快D Share啦!