參觀立法會期間巧遇傳媒，石禮謙大方任影，吳綺莉則閃縮避鏡頭。
探熱針
gathering兩年 林建明馬時亨扯線 吳綺莉姣纏立法會議員
一一年吳綺莉毅然帶住囡囡吳卓林由上海返港定居，並加盟無綫拍劇做主持，之後到商台開咪，最終不歡而散，同無綫亦結束賓主關係。無份工做得長，加上遇人不淑投資失利，經濟壓力不輕的吳綺莉在朋友飯局上，認識財力雄厚的現任立法會議員石禮謙，為搏一張長期飯票，懶理對方有個拍拖多年的女友 Lisa，照積極埋身，甚至有指她不請自來，試過漏夜殺上對方半山住所。
成龍唔理，吳綺莉為了下半世有所倚靠，一於去盡。
一次生兩次熟
三年前，吳綺莉帶住同成龍倒模一樣的卓林回港定居，分屬好友的大姐明林建明，積極安排飯局聚會，讓她結識新朋友，重新融入香港生活。
一二年，在一個朋友飯局上，吳綺莉透過馬時亨介紹，認識了立法會議員石禮謙，其時有人向她提議：「佢（石禮謙）係立法會議員嚟㗎， Elaine（吳之洋名）你有時間，可以搵佢帶你參觀立法會。」
眼見對方無架子，加上初次見面已經好好傾，老實不客氣的吳綺莉，往後同石禮謙見多幾次面後，便開口要求對方帶她兩母女和女兒的同學參觀立法會。
一次生兩次熟，自此，吳綺莉事無大小都打攪對方，而每次飯局或 gathering，只要有石禮謙，吳綺莉都一定抽空現身。
「 Elaine以前係宅女，約食飯十次得一、兩次會出現，但自從識咗石禮謙，只要知對方會出嚟， Elaine一定蒲頭。」一名有份出席飯局的友人說。
主動進攻
吳綺莉的積極用意何在，身邊人全部看在眼裡，友人好言相勸，指對方有個感情穩定的女友 Lisa，無謂重蹈當年介入成龍與林鳳嬌的婚姻，再做第三者。但吳綺莉完全唔入耳，甚至將行動升級，電話、短訊每日無間斷；被盯上的石禮謙，亦開始發覺吳綺莉「唔對路」，為免加深誤會，他開始避席飯局聚會，亦拒絕回覆吳綺莉的電話及短訊。
男方落閘，但因為得罪無綫、又被商台炒魷，加上投資失利兼且遭舅父前度騙財，面對經濟壓力，想搵靠山的吳綺莉未有放棄，甚至有指她試過漏夜摸上石禮謙位於半山肇輝臺的住所，要求「傾心事」，但被對方請食閉門羮。
男友遭姣纏，最終更驚動石禮謙正印女友 Lisa，但據了解，看上目標的吳綺莉，至今仍未肯完全收手。
口供唔夾
在 dbc數碼電台每週一次做主持，吳綺莉收入有限，要供樓又要供卓林讀國際學校、學騎馬，平日要慳得就慳。
本週一（十四日）錄完電台節目，吳綺莉揸車由數碼港返大埔，大熱天時唔開冷氣慳油，去超市買紅酒，揀八十八蚊兩支特價貨。
對於姣纏石禮謙，吳綺莉全程口窒窒。「識咗好（原本想講識咗好耐，去到口唇邊又改口）多朋友，好多朋友都識，做咩呀？（係咪識咗好耐？）唔係呀，點解嘅？見過幾次面咋喎！吓！唔好玩」
同一日，正在立法會出席會期最後兩天會議的石禮謙，傍晚抽空同富豪朋友郭炳湘到附近的 Starbucks密斟，離開時記者上前問他同吳綺莉關係，石議員答得大方：「（你識吳綺莉？）識，識咗兩年咁上下。（有傳佢追緊你？）幾十歲人，邊有人追？搵都搵個後生啲（佢係咪上過你屋企？）屋企？我屋企請好多人，我有女朋友，點發展？」
有財有勢
現年 68歲的石禮謙，澳門出生，是前土地發展公司總裁，大舜政策研究中心顧問。 00年憑地產及建造界功能組別進入立法會，現為立法會議員、賬委會的主席，為建制派政黨經民聯成員之一。石禮謙身家豐厚，私人持有 9間公司股份及多個物業，此外亦擔任 15間上市公司董事，當中包括香港按揭證券有限公司、港鐵公司、澳門博彩控股有限公司、碧桂園及泰山石化等，涉足政界外，生意瓣數亦多，有酒店、地產、航空以及建築等。 13年，獲特區政府頒發金紫荊星章榮譽，有財有勢。
冇樣掂
11年，吳綺莉帶埋小龍女吳卓林回港，復出幕前搵食，先後在無綫拍劇又到商台開咪，但被指 hea做表現差，事業一潭死水。
頭炮撻 Q
回港後與無綫簽約兩年，頭炮主持清談節目《女人有話兒》劣評如潮，嘉賓唔夠分量，加上表現生硬，收視慘淡；其後轉拍劇，在重頭劇《雷霆掃毒》中，因態度差唔記劇本，頻頻 NG又得罪導演，令吳綺莉得寵變失寵，與無綫滿約後冇得留低。
|
鍾意就快D Share啦！
|
|
|
