靚抽王
怪誕電視城
香港電視工業一向笑話不斷，有人想做又冇得做，有人做唔住又賴死唔走，亦有人做咗好耐冇人同佢爭所以愈做愈 hea。不過此情此景未必可以永遠延續，因為正如佛經所講，世事係無常嘅，你估年年都可以借啲意請意甲球星岩布仙尼唱 Happy Birthday To Me咩？今次我哋就同大家 update一下，睇吓香港嘅電視生態仲有冇得救
大台花蟹大戰新聞革命軍
大台一向有 CCTVB嘅美譽，其愛國情操一向都受網民力讚，近日嘅學生佔領運動，令到警民關係升溫。呢個時候，唔知係好運定唔好運，大台前線記者同攝影師，勇武地拍到 7個警察怒打 1個示威者。可能當時新聞部嘅管理層（下文提及嘅花蟹哥）仲瞓緊覺覺豬未起身，所以河都未蟹，單嘢就播埋出嚟，旁白仲鬼咁老實，講到明警察對示威者「拳打腳踢」，結果釀成今次嘅「花蟹革命」。
首部曲 進擊的花蟹
呢個袁志偉，可能大家都覺得佢熟口熟面，原來佢以前都係新聞報道員，依家已經係新聞部總監，人稱花仔，但據知率領新聞部做過唔少河蟹嘢，令人稱之為袁花蟹。有傳花蟹哥見到警察打人咁大鑊，佢身為特區政府官方媒體嘅第一把交椅，當然即刻出手，下令部下刪走影片嘅旁白，並訓斥手下嘅同事：「你係嗰幾個警察心裏嗰條蟲？特登拖佢去暗角拳打腳踢，憑乜嘢？」
第二部曲 新聞部聯署對抗
事件發生之後，大台新聞部前線記者、主播發起聯署，表示不滿公司呢種做法，仲有人錄埋花蟹哥訓示嗰段錄音，放上網等市民可以食花生。此舉令大台總經理李寶安非常嬲豬，仲話咁做好卑鄙。不過大家諗嚟諗去，發覺卑鄙嘅點都唔係啲前線新聞工作者囉。
第三部曲 有線怒抽花蟹哥
正義係不死嘅，而花生亦都係剝唔盡嘅。話說早幾日，有線新聞報道「四川縣委書記獨奏二胡走音」呢單新聞，段片睇到嗰位乜乜書記，演奏時走晒音仲自得其樂咁，旁述嘅記者是咁樣報道的：「我並唔係呢位書記肚內嘅蟲，又唔可以即場走去問佢係咪特意表現出位，所以只能講佢係懷疑走音。」大台即場制水，懷疑被人抽乾呀！
電視台都鬧饑荒
亞視 9月份嘅糧遲遲未出，有報道仲話「良心電視」上星期燶到連廁紙都冇得用，水都冇得飲，大佬，呢度係香港呀！唔係非洲呀。亞視高層話喎，如果 10月尾都冇辦法出糧，咁就要清盤。亦即係話，我哋以後冇得睇重播，亦冇得睇台慶掟壽包，亦冇得睇啲亞記藝員以一敵百。係……諗落我哋損失不大，只係少咗個嘲笑對象啫，惟有等大台頂上啦。
|
鍾意就快D Share啦！
|
|
|
