掃呢頁CODE去手機

2014年10月24日 星期五

[忽然1周 - 1004] 最佳損友之晶哥風雲 晶哥,王晶,MW,




靚抽王

最佳損友之晶哥風雲

晶哥貴為極品商業大導,娛圈當然好多人都當佢係老友啦,可惜近日學生發起嘅佔領運動,促使不少老 X忽屁股撕裂……呀,唔係,係社會撕裂。







好多上一輩嘅藝人都認為示威者係暴民,晶哥不嬲都正義過幪面超人,梗係要為上一代發聲不過真係估唔到佢竟然話要同幾個朋友絕交喎!咁大個人,講呢啲?又話朋友,我當你一世朋友嘅?

綿裏藏針嘅朋友杜汶澤

阿澤寫咗篇長文幫晶哥解畫,叫大家唔好嬲佢。成篇文雖然好似好有禮貌,但係就透露晶哥為錢反臉不認人,同埋承受住壓力先講呢啲。睇完篇文大家只會覺得阿澤好有義氣,卻唔會體諒晶哥,所以話阿澤呢啲咪高手囉。

一路順風嘅朋友黃秋生

晶哥話怕尷尬,所以刪除咗黃秋生嘅電話,點知秋生嘅回應仲令晶哥尷尬,佢話自己都冇晶哥電話,仲叫佢一路順風。喂,人哋仲生勾勾喺度又冇話要出國,你同人講一路順風,即係點先?

相逢何必曾相識嘅朋友何韻詩

對於王晶同自己絕交,何韻詩就話大家查實都冇乜交流過,覺得對方咁重視自己,真係好賞面。嗚,你哋使唔使咁寸呀,俾條生路老人家行得唔得?

有價值嘅朋友 周潤發/劉德華/梁朝偉

明明周潤發、劉德華、梁朝偉都有表態支持過學生,咁點解晶哥唔同佢哋絕交呢?好簡單啫,因為佢哋感情特別深厚囉!仲有其他可能性咩?傻豬豬。

手指拗出嘅乖女王子涵

王晶個女王子涵表示自己支持偶像杜汶澤,而唔係太 buy老竇嗰一套喎。唉,所以話年代唔同,睇嘅嘢都唔同,晶哥一定好傷心。都係搵番阿馮寶寶、高志森一齊呻吓、互相取暖罷人間仲有情嘅。



鍾意就快D Share啦!