筱靖多年來出錢出力支持亞視，本周卻遭公司「雪藏」，理由是她兩年前承認月薪七千及近日講「出糧是天經地義」。
娛樂喧
撐出糧遭滅聲 亞視嘟姐慘遭雪藏
亞視欠薪問題一直未解決，截至 10月 22日仍未向員工發放九月薪金，內部曾一度斷廁紙斷蒸餾水。有「亞視嘟姐」之稱的筱靖，上周（ 14日）出席活動時為冇糧出同事發聲，指「出糧是天經地義」，翌日被煞停原本周日（ 19日）亞姐評判工作，更被全面雪藏。
遭滅聲後，周一（ 20日）筱靖餘怒未消說：「我俾人秋後算帳！」。「亞視一哥」劉錫賢亦幫口撐：「公司已經冇乜人用，我會搵筱靖了解吓！」
兩年前亞視為維穩，力撐國民教育，王征帶藝人到政府總部集會。當時筱靖擔任活動主持，更與王征跳「騎呢」舞。亞視迫藝人返學，筱靖亦返足。隨後她獲賞識，擔任多個節目主持，被封「亞視嘟姐」。
昔日聽教聽話的她，與香港學生一樣，最終忍唔住上頭不公平對待，企出嚟發表訴求。上周二（ 14日），筱靖以亞姐評判的身份出席活動，談到被拖糧，她指「出糧是天經地義」，不料即被 cut掉所有工作。
「星期一筱靖收到公司通知，叫停佢所有工作，連做開嘅《星動亞洲》都冇得留低。高層解釋話唔鍾意佢講自己月薪得七千喎，其實呢件已係兩年前嘅事，有人借題發揮啫。」幕後人員透露。
豪花四千發洩
本周一下午，筱靖在又一城出現，她先到 Cova下午茶，之後便逛名店濕平。最終豪花四千元，化悲憤為購物慾。
離開時，她向本刊直認被公司「雪藏」，又呻自己貼錢打工，試過為公司活動花五萬蚊買枱。她月薪得七千，買張枱即是要白做七個月！
記：記者筱：筱靖
記：突然抽起你亞姐的評判工作？
筱：公司覺得唔適合。
記：其他工作都冇你份？點解？
筱：可能公司覺得我同傳媒講咗啲唔適合嘅說話
記：因為你講過「出糧係天經地義」？
筱：仲有承認月薪七千，其實都係兩年前講。
記：依家至俾公司算帳？
筱：咁耐以來，我都撐公司。公司台慶賣枱，我都拎五萬蚊出來買成張枱。公司需要禮餅，我又俾（筱靖祖父經營餅業）。
記：有冇同公司反映過？
筱：有打返去藝員部問，佢哋話係高層意思，我都唔知搵邊個講。我終於明白點解學生要佔中囉！我覺得俾人秋後算帳！
發聲明穩定軍心
亞視在本月 17日發聲明，指公司會於周五（ 24日）發放九月薪金，但內容冇提及十月及以後的薪金會否如期發放。據知，發出該聲明的目的除了穩定軍心外，也希望向外界展示亞視並冇負債，從而向買家抬高身價。
早前盛傳呂志和、周焯華、林建岳和楊受成都有意購入亞視，可惜一直只聞樓梯響。「王征出價十五億，好多富豪都嫌貴，出價最高係英皇嘅楊受成，但都係唔夠十億，王征嫌未到價唔賣。亞視依家搞到拖糧，睇嚟王征應該愈來愈心急脫手！據知有三間中資背景嘅公司肯出十億以上買，但傾唔傾得掂就要睇王征肯唔肯減價嘞。」知情者說。
中港都滅聲
滅聲維穩之風近年愈吹愈盛，當權者順我者生，言論自由日見可貴。
|
鍾意就快D Share啦！
|
|
|
