掃呢頁CODE去手機

2014年11月21日 星期五

[忽然1周 - 1008] 港視教識我點樣睇台慶! 港視,MW,




媽咪姐

港視教識我點樣睇台慶!

好囉,好囉,港視終於正式啟播,仲揀正大台 11月 19日台慶開台。一個日子,兩個台慶,大眾最 happy啦。不過 happy之中,媽咪姐又有少少欷歔噃。記得細細個每年台慶,都好似自己過生日咁,必定擔定櫈仔「電視汁撈飯」。那些年的大型歌舞表演,發哥嘅吞火奇技、肥姐踩 8層蛋,仲有四大天王呀周星馳呀粒粒巨星……諗落,真係好懷念。








可惜一蟹不如一蟹,家下啲台慶愈整愈 hea,今年仲衰到「三冇」:冇內容、冇趣味、冇新意。最多最多,咪蔣志光唱歌、王祖藍突然向李亞男求婚囉!計埋啲花旦騷胸露腿又好唔好?今時今日呢啲台慶質素,大家仲願意忍受咩?

掉番轉頭睇下港視搞嘅開台午宴吖,無錯,未必有大台嘅 480萬獎金獎品;的確,星光可能唔夠熠熠,但媽咪姐睇到嘅係齊心, feel到全台上下都好有 heart,好想俾觀眾睇到優質節目嘅決心。正如王維基 facebook嗰句:「心有多大,舞台有多大」。今日港視冇最華麗嘅舞台、無足夠嘅電波空間俾佢哋發揮,但佢哋嘅努力大家有目共睹㗎。下一年,約實你,再大事慶祝過。

鬥排場

大家都知,大台最多小生花旦,港視少不免被比下去。不過咁,當日港視開台宴,黃日華、鮑起靜等唔少約滿嘅藝人都踴躍出席支持,成朕人情味湧晒出嚟。

企得前排嘅,大部分都約滿港視,但依然出席撐場,證明王維基呢位舊東家幾有民心。

曾經以「一籃子因素」為由拒絕發牌俾港視嘅商務及經濟發展局局長蘇錦樑,原來都係開台宴嘅座上客。佢仲話自己裝咗 5個 HKTV app,估唔到咁捧場。

大台慣性組合,毫無新意,都係嘟嘟、阿姐搭曾志偉、阿叻。有啲悶。

朝早忙完,蘇局長又再出席大台台慶,一日走兩場,真係辛苦晒。

鬥波地

港視人少,三幾個小花谷胸已經好有話題性。相反大台個個女星「球來球往」,繽紛歸繽紛,但有啲膩。

姜麗文

三朵港視小花未必有大台花旦咁大名氣,但都出行力谷胸。

黃美棋

黃芷晴

大台有慣性收視,女星亦慣性喺台慶拋胸,飽晒!

鬥表演

說好的唱歌、趣劇兩台都有。可能媽咪姐多心,覺得大台今年製作揼本咗。嗱,有競爭先有進步,幾時都係真理。

港視開台宴上,姜文杰唱歌(左)、陳錦鴻、郭峰表演趣劇(右),規模小但算係咁啦。

舞台設計靚咗亦有飛車特技,感覺係揼本咗,但又係翻炒《使徒行者》(右);唓,使唔使唱埋〈愈難愈愛〉呀?

實測港視 app OK噃!

港視開台,媽咪姐梗係第一時間 download個 app煲下劇啦。入到去,介面清晰,所需登記資料都好簡單。

搞完一輪,媽咪姐就揀咗《選戰》(下圖)睇,播放都幾順暢呀!每 15分鐘一節,節與節之間有兩、三個廣告,整體操作好滿意。

據知坊間好多巴打絲打都遇到技術性問題而睇唔到,到咗晚上八點開台仲無晒訊號。嗱,各位稍安毋躁,開台午宴當日,班 IT員工寧願留守公司解決疑難都冇出去食。接投訴即跟進,不得不 like爆!

介面好清,㩒左下角嗰粒掣(紅圈),就會彈出劇集嘅 menu(上), C9仔如媽咪姐都 handle到。



鍾意就快D Share啦!