做事向來講原則的嘟嘟，今次㷫爆並非純為錢，而是不滿余詠珊出爾反爾，口爽荷包𣲷！
娛樂喧
余詠珊縮皮 騷價減半 嘟嘟㷫爆唔撈
鄭裕玲（嘟嘟）屹立大台多年，據知這位台柱騷價逾 5萬，換句話說做一小時司儀已穩袋 10萬。
本刊收到消息，綜藝科揸 fit人余詠珊，乘着近期播放的《超齡打工假期》口碑不俗，打算斟嘟嘟拍新節目《 Do姐去 shopping》，酬勞亦照嘟姐收開的價錢。萬事俱備，惟經常使大個頭的余詠珊，近日遭公司勒令要緊縮開支，余惟有向嘟嘟開刀，反口壓嘟嘟一半人工。據知向商台請定假的嘟嘟氣難下，嬲爆嗌唔撈。
自 14年前與黃子華拍完收視爆燈的《男親女愛》後，嘟嘟只做大騷司儀及綜藝節目主持， 11年開始更以天價時薪 4萬落戶商台開咪主持《口水多過浪花》，收聽率及口碑都不俗，可見她有價有市。她在節目中常說：「拍劇咁辛苦，唔好再搞我，除非個對手好正。做主持就唔同，輕輕鬆鬆就收工。」
承諾開工 3小時
嘟嘟貴為大台台柱，近年她專注包辦大台各大騷司儀，據知其騷價逾 5萬，難怪她無心拍劇。而大台自從余詠珊入主成為綜藝科揸 fit人後，愛以真人騷模式拍節目。繼早前找來謝賢、胡楓及 Joe Junior拍《三個小生去旅行》效果不錯後，隨即開拍另一節目《超齡打工假期》。原本對綜藝節目興趣麻麻的嘟嘟，經余多番游說後，最後竟然願意成為首輯節目的嘉賓。知情人透露：「 Sandy（余詠珊）多搞作就係人都知，原本嘟姐唔願做㗎，因為佢唔鍾意拍外景節目，驚曬親皮膚。不過珊姐就講明開工時間每日只需要三、兩個鐘，又會盡量揀朝早同黃昏先拍，最後先𠱁掂嘟姐拍《超齡》個節目。」
在《超齡》中，嘟嘟孖實王菀之到首爾打工，上周播出一連四集，平均收視達 20點，收視算有交代。余詠珊亦早已預計嘟嘟有叫座力，節目未播出，已斟她獨自孭飛另一新節目《 Do姐去 shopping》，價錢亦照舊用原價，即十集節目嘟嘟便袋硬 50萬。
一綜藝科工作人員透露：「 Sandy好聰明，佢知道嘟姐最鍾意 shopping買靚嘢，一定應承。節目初步構思話會去南非揀鑽石、英國買名畫等等。 promo（宣傳片）都拍咗，藝術成分好高，唔係純買手袋靚衫。嘟姐好滿意，仲同商台度咗出年年頭請兩星期假去拍㖭！」
歐洲變亞洲
萬事俱備，但近日卻生枝節。據知向來有鋪「超支癮」的余詠珊突收到上頭指令，講明新節目「唔可以 over budget」。為免成高層箭靶，余詠珊左諗右諗下，最後決定「犧牲」嘟嘟，「 Sandy心知肚明啦，又南非，又英國，一定會 over budget喎！佢覺得最大嚿錢係花喺嘟姐人工上，所以惟有從呢方面入手。嗰日佢約咗嘟姐返公司傾，話公司冇 budget，可唔可以一人讓一步，騷錢減一半，幫公司渡難關。唔單止咁，佢仲話為咗慳錢，由原本去南非、英國，改成日、韓、台灣、泰國等。嘟姐當堂呆咗啦，由歐洲改去亞洲都算，但人工係唯一底線， cut騷錢分明做壞規矩。嘟姐話以前拍《男親女愛》、《一筆 out消》都習慣帶私伙衫、 set頭同化妝，唔係第一日貼錢打工，但呢啲係佢自願。今次佢覺得 Sandy口爽荷包𣲷，依家忽然反口，所以特別嬲。」知情人續說。
據知，㷫過火屎的嘟嘟有感氣難下，日前已向商台銷假，索性罷拍。余詠珊如意算盤打唔響，新節目好可能胎死腹中。
|
鍾意就快D Share啦！
|
|
|
