熱爆娛樂: [忽然1周 - 1008] 祖藍 3卡鑽戒台慶突求婚　明年四月教堂行禮祖藍,王祖藍,MW,

2014年11月21日星期五

[忽然1周 - 1008] 祖藍 3卡鑽戒台慶突求婚　明年四月教堂行禮祖藍,王祖藍,MW,

為了準備兩人結婚，祖藍先於年初買新屋，花十個月大裝修。今年情人節他又和李亞男入迪士尼燭光晚餐，十分有 heart。

滾熱辣

祖藍 3卡鑽戒台慶突求婚　明年四月教堂行禮

王祖藍與李亞男婚事傳足一年，原來兩人已決定明年四月結婚。今年祖藍先以千四萬購入大埔獨立屋，又花了六百萬裝修愛巢，年底入伙。兩人見埋家長仲揀定元朗信義會生命堂行禮，萬事俱備，獨欠正式求婚！

據知祖藍原本部署下周二（ 25日）趁準老婆李亞男生日當晚，以百萬三卡巨鑽求婚。不過， 19日台慶夜，大台為了對撼港視新劇《選戰》，搭正對台播劇的 9點半，要求祖藍向女友提早求婚，誓搶贏收視。祖藍為大台鞠躬盡瘁，難怪得寵程度爆燈。

與李亞男拍拖四年的王祖藍，年初一擲千四萬，買入大埔獨立屋，為結婚做好準備，全因為李亞男話過：「有樓係結婚嘅條件。」據悉祖藍豪擲了六百萬裝修，將全屋間隔反轉，落重本打造新婚愛巢。上周三（ 12日），祖藍趁空檔，深夜駕車與李亞男往大埔新屋巡視裝修，兩人逗留一小時才離開。新屋裝修大半年，已近竣工階段。祖藍會先與母親及妹妹年尾搬入新屋打點。待明年四月正式迎娶女友，王太李亞男才會搬入愛巢。

半夜睇屋

上周三（ 12日）深夜，王祖藍趁有空檔，車李亞男去大埔新居睇裝修。

兩人在深夜十二時許入屋苑，逗留了一小時才離開。

大台打亂求婚計劃

下周二（ 25日）乃李亞男的生日，祖藍原本一心趁此大好日子，向女友正式求婚，來個雙喜臨門。除了燭光晚餐外，更買定三卡巨鑽以示誠意，可惜最後為大台谷收視，提早獻出他人生的重要時刻。

「祖藍都知道欠女友一個正式求婚，佢好緊張，之前成日問朋友應該點樣求婚，仲喺朋友開的珠寶店睇中一隻價值 98萬幾嘅三卡鑽戒，打算趁女友生日求婚。不過台慶當日（ 19日）早上，祖藍被高層急召，提議佢提早求婚，為公司搶收視。祖藍才因利乘便，給女友來個大驚喜，更暗中叫齊雙方父母到場做見證。」知情者說。

祖藍在幕前向女友發愛的宣言：「人生要搵一個同對方過一日得一日嘅人。」此語一出，李亞男被感動得熱淚盈眶。祖藍強調李亞男「難追」，又話同女友「彼此關心」咗一段日子，最後終奪得美人歸，難怪求婚成功的他，在熒幕前大叫：「我結婚嘞！」至於李亞男，見到男友取出鑽戒，即搞笑除下左手無名指上的戒指，更被祖藍寸：「你唔需要急到即刻除戒指……」

由於祖藍有不少圈中好友，如阮兆祥、李思捷等均是大忙人，他已預早 mark實好友的期做「兄弟」。至於李亞男的好姊妹陳法拉、鍾嘉欣、陳爽、蔡少芬亦答應做姊妹團。這對圈中人緣甚佳的男女婚事，必然星光熠熠。

「祖藍搵咗朋友籌備婚禮，明年 4月擺酒。佢哋兩個都係基督徒，梗係想喺教堂行禮喇。初步揀咗元朗信義會生命堂，因為生命堂同『藝人之家』係同一個教會，而且黎美嫻結婚時都喺呢度行禮，好多教友都向祖藍推介。祖藍睇過都好鍾意。」

當眾求婚

在大台台慶表演完魔術之後，王祖藍忽然跪地向李亞男求婚，並隨即為李亞男戴上早已準備好的 3卡鑽戒，李亞男激動落淚。

明年 4月　生命堂行禮

祖藍初步選定元朗信義會生命堂為行禮地點，都是貪其地方夠大，可以容納更多教會的弟兄姊妹。

06年黎美嫻結婚，亦是在生命堂行禮。

祖藍求婚宣言

預支「蜜月」

兩人早前為大台主持《蜜月到訪》，和其他初結婚的新人四圍去。李亞男不時 post兩人合照晒甜蜜。

我哋拍咗好多年拖，呢段時間我發覺大家對彼此嘅關心，形成咗我一個信念。無論追你係幾咁困難都好，娶到你，我一生都會好幸福。尋日我哋一拍完假魔術，你即刻走出嚟攬住我話︰感謝主！你冇死呀。我話︰邊有咁易死呀？你跟住就話︰唔係㗎！人生好平常㗎，過得一日都係一天嚟。我覺得你無心插柳，但講咗一句好啱嘅說話，就係無論聽日我的事業、身體，各樣係點，人生就係要搵一個同對方過一日得一日，每一日都係一天嘅人。今日雖然瞞住好多人搞咗壇咁嘅嘢，但我想喺咁多位嘅見證下，想問你一句︰你願意嫁我嗎？

李亞男：佢年底搬

其實本周日（ 16日），兩人出席宣傳活動時，李亞男直認仍未知祖藍已買定巨鑽求婚，還發嬌嗔︰「都未求婚。」

記：記者李：李亞男

記：祖藍趁你生日用三卡巨鑽求婚喎！

李：未知呀！希望係咁喇！

記：年尾搬入新居？花咗幾百萬裝修喎？

李：佢哋（祖藍及家人）會搬囉，我就未住。

記：影到你哋入去視察新居？

李：都要睇吓嘅。

記：出年結婚係咪行教堂？

李：我都希望行教堂，因為係 Christian（基督徒）。

記：係咪籌備緊四月嘅婚禮？

李：（祖藍）都未求婚。

而當時祖藍為求保密，給女友驚喜，對求婚一事扮傻，只承認年尾入伙。

記：記者王：王祖藍

記：係咪趁女友生日求婚啫？李亞男話你未求婚喎！

王：生日（求婚）？唔好做呢啲老套嘢。

記：佢話你欠佢一個求婚喎？

王：做乜……唉！乜都未……乜都未有時間，你睇吓亂到咁……

記：收到你哋出年喺元朗教堂行婚禮嘅消息。

王：邊有咁快。

之前仲話邊有咁快，點知話咁快就公開求婚，祖藍你真係鬼馬。