早前為預備馬拉松練跑，石天欣自言練得一身結實肌肉。
探熱針
脫苦海 炒大台魷 迪士尼撈散 石天欣 54蚊一個鐘
曾經是無綫電視劇常用「被強姦受害人」的石天欣，入行四年，月入六千連最低工資都唔夠，不甘繼續被剝削，今年九月主動提前解約，炒大台魷魚！肯做唔怕餓死！只有二十二歲的石天欣，近日到迪士尼做兼職，扮美國村姑 sell客執貨氹細路，時薪五十四蚊，點都好過留在大台，不停被「輪姦」。
合照排長龍
上週四（十二月十一日）中午，著住迪士尼美國小鎮制服的石天欣，在專賣主題樂園產品的 emporium出現，過去四年，一直在大台劇集「捱姦」的她，好快便被遊客認出，捉住她合照，之後更出現人龍，排隊輪住影。
逐一滿足大家要求後，石天欣唔敢怠慢，立即埋位開工幫手 sell產品，有小朋友要買玩具，她會𠌥低身慢慢講解，一流服務態度。
「本來呢段時間佢係要埋位拍戲，不過套戲突然押後開，天欣變咗無嘢做，聽見朋友話迪士尼有臨時工，佢咪去做幾個月，搵啲使用囉！雖然天欣做過演員，但同其他人一樣要經過面試，佢一次搞掂，第二日就返工。」知情者說。
走出地獄
落到場，石天欣執貨搬貨乜都做，返工兩個多星期以來，因為經常被遊客認出，合照時間幾乎佔去開工時間十分一。
「天欣都冇諗過第一日開工就會俾人認出，好彩公司（迪士尼）冇詐型！佢話開工全日走來走去 sell客冇得坐，但早排開始跑步練氣準備跑馬拉松，所以就算覺攰都唔覺辛苦；天欣仲話點都好過喺大台拍劇日等夜等，俾人糟質搞到周身傷要睇醫生咁慘，有五十四蚊時薪，起碼夠錢開飯先。」天欣身邊人說。
由六千蚊月薪開始，石天欣說過去就算做到爆騷，也只有萬多元一個月，捱過開工踩二百四十小時，得三千蚊酬勞的刻薄日子。如今在迪士尼做散工，絕對是離開地獄。
劈炮有運行
大台以大欺小，唔少無綫人不勝剝削，寧願劈炮！外闖搵生機，發展隨時遠勝從前。
高鈞賢 兩個月賺夠兩年
05年香港先生冠軍高鈞賢，在無綫九年，做極都是強姦犯之類三、四線角色，試過因為被凍薪搞到抑鬱，今年九月約滿決定向外闖，現於國內拍攝新劇《山海經之赤影傳說》，兩個月收入，在無綫要捱兩年。
|
鍾意就快D Share啦！
|
|
|
