探熱針
呃出飯局做假騷 顏子菲裸控：逼陪客唔俾走
亞視拖糧天怒人怨，本來是亞視大好友的花姨宮雪花亦睇唔過眼，公開叫亞視「發輪功（發人工）」、亞洲先生黃集鋒自揭窮到戶口只剩$7.9、亞視員工甚至在男廁尿兜貼王征頭像洩憤。至於 08年亞姐亞軍顏子菲，原來亦滿肚抑壓，坦言在無良亞視六年期間，試過失驚無神被應召返公司做假騷，最離譜係以 casting為名，呃佢去陪客飯局、陪酒、唱 K，良心電視台逼亞姐冧客，學 689女話齋，同做＿無分別。
幫老闆冧客
杜汶澤曾經講過：「前世做錯事，今世在亞視。」離開亞視這個鬼地方，廿八歲的顏子菲終於可以暢所欲言，回顧過去六年，除了集中主持飲食節目，同時亦經常要為公司迎賓冧客出飯局。
「我最初都要表演歌舞迎賓，後來知我識幾國語言，就指定我做 MC（主持）。亞視好多荒唐嘢，試過幾次有內地客嚟公司參觀，明明唔使開廠，都叫晒人返嚟埋位扮開工，重新噏過之前嘅稿，有幾次因為我住得近公司，突然要我返去做大龍鳳，總之參觀團一到，成個廠就要開燈扮錄影。」
至於屢傳亞姐被逼出席飯局，她未有否認。
「我試過喺出面做完司儀 job，夜晚十一點幾，突然接到藝員科電話，叫我去一個 location，我問係咪一定要去，佢哋話好重要，仲千叮萬囑叫我 keep住妝同頭，點知搭的士趕到去，又話轉咗場，叫我去另一個 location。卒之去到間卡拉 OK，成班人已經飲到好 high，原來老闆招呼緊班客，當時仲有幾個女同事在場，兩杯落肚……（見到乜？）總之係啲令人毛管戙嘅事。」據了解，當晚在場的，還有一一年冠軍馮雪冰及一○年冠軍王欣。
陪飲唔俾走
那次唱 K，顏子菲慶幸走得甩，但並唔係次次都咁好彩！
「有晚差唔多六點，公司突然要我去面試，話有大集團想搵代言人，唔明點解咁急先通知，去到發現又係食飯地方，一圍枱十幾人，擺咗好多支酒，我當時好奇怪，點解唔需要正式 casting，但我都俾面食埋餐飯先走，點知仲要去下一場，當晚有兩個女仔，其中一個已經飲到爛醉，我諗住拖另一個走，點知俾人出嚟攔住，兇我問係咪唔俾面，最後糾纏好耐先走到，後來我先知，原來亞視有好多呢類飯局。」
一直標榜良心電視台，王征富貴生活不變，公司員工卻無糧出。原來自○八年起，亞視已經實行「有入冇出」政策，一味慳。
「我聽同事講，○八年開始，亞視停止買新衫，就算出爐亞姐都係著舊衫，我發覺自己著過嘅衫，之後幾屆亞姐都有著。」
隆胸搏一鋪
離開亞視，簽了新經理人公司，顏子菲工作量和收入同步大增。
「而家每個月出糧都有六位數字，以前响亞視，雖然我係亞軍，但早期底薪只得四位數，咪以為亞視冇製作冇工開，但我都好忙，一個月得幾日休息，因為公司幫我喺出面不斷接 job，包薪制扣番晒啲騷錢，之後每個月都有萬幾蚊人工，但公司計到好盡，唔想我爆騷，有客指定要搵我，佢哋會安排另一個藝人去做，我覺得個制度好有問題，唔係多勞多得，試過因為收入太少，我要捱餅乾同蘋果。」
重新出發，擁有四十五吋長腿的顏子菲，揚言要隆胸出擊，希望創出一番事業。
「因為實在忍受唔到以前唔公平嘅制度，當日我離開亞視，冇任何路數，只係心口掛個勇字，而家係時候要搏命。」
|
鍾意就快D Share啦！
|
|
|
