熱爆娛樂: [壹週刊 - 1293] 賣包收銀樓面　朱慧敏開檔一腳踢朱慧敏,M1,

2014年12月18日星期四

[壹週刊 - 1293] 賣包收銀樓面　朱慧敏開檔一腳踢朱慧敏,M1,

朱慧敏每朝九點就返鋪頭著起圍裙睇包檔。包裝手腳雖然慢，但勝在親切搭夠，令唔少街坊樂意幫襯。

探熱針

賣包收銀樓面　朱慧敏開檔一腳踢

被踢出長氣劇《愛•回家》後，朱慧敏的起心肝，跟做開茶餐廳的男友 Eddie（彭懷安）學做飲食生意。上月底，在西環新開的菜館開始試業，負責揸數的朱慧敏唔單止負責收銀，人手不足時亦要幫手睇埋包檔；朝朝戙响門口賣菠蘿包、雞尾包。力不到，不為財！

賣包送合照

跟男友 Eddie搵食，開菜館負責收錢的朱慧敏，在未能「回家」的日子，日日落鋪頭打躉。連日所見，朱慧敏在午市、晚市要埋數外，還要幫手補位，邊度唔夠人，就由她頂替。

力不到不為財，身為「華星客棧」老闆娘，鋪頭朝七晚十一，朱慧敏冇偷懶，一連三日，晨早九點已經蒲頭，又不時企正門口幫手賣麵包，做埋生招牌。

「由裝修到開業， Queenie（朱慧敏）都係自己落手落腳跟晒所有嘢，依家請人難，樓面同包檔唔夠人手，所以 Queenie除咗收錢，好多時都要頂埋呢兩個位，日日留喺鋪頭起碼八粒鐘。」知情者說。

雖然被飛出《愛•回家》，但連續做了幾年處境劇，觀眾晚晚睇住送飯，入屋光環仍然有影響力，朱慧敏落場賣包，不少街坊為影合照有幫襯，五蚊一個包送合照，抵到爛！

就算行過無幫襯，朱慧敏為吸客照樣同街坊吹水。

去到午市，朱慧敏轉坐收銀位。有客人一見係佢，即上前搵佢訂枱食晚飯。

由裝修到開業，朱慧敏同男友 Eddie都落手落腳做。他倆的心血華星客棧位於西環，鄰近即將啟用的港鐵站。

一連三日，朱慧敏都返鋪賣包，為咗力 sell唔用豬油做嘅蛋撻，𠌥低身招呼阿婆在所不辭。

人肉布景板

五蚊一個包，六蚊一個撻，加送來者不拒的合照，抵所以好多街坊買完包都爭住要影相。

早午晚市做齊

一路賣包，一路做人肉布景板，朱慧敏不時落力推介。「我哋啲包唔用豬油，用植物油，食素嘅都可以食！試完記得返嚟俾啲意見，夜晚我哋啲小菜都唔錯㗎，今晚嚟試吓啦。」打埋親情牌，老闆娘，上晒身。

朝早要幫手賣包，午市旺，朱慧敏入單、收錢，接電話收外賣柯打一腳踢。男友 Eddie則留守廚房，指揮大局，情侶檔拍住上。忙完午市，朱慧敏會趁下午茶時間外出鬆一鬆，到晚市開始再返鋪招呼客人兼埋數，早午晚三個時段，不停走位。

喺無綫捱咗十年，今年台慶終於同劉丹、鼎爺等人一齊攞服務金牌。

飛出《愛•回家》後，朱慧敏條感情線由高海寧頂替，不過換血無助收視上升。

蔣家旻早前解凍「歸家」，唔知朱慧敏有冇呢個機會！

仲有兩年約

據了解，要經營這間有三千呎的菜館，同區面積相若的鋪租約十八至二十萬，連燈油火蠟人工，每月開支絕不輕鬆。雖然菜館還有其他藝人股東包括狄易達及蔚雨芯等，但朱慧敏為省一分一毫，揸數睇到實。

有指跟無綫尚有兩年合約的朱慧敏，仍寄望自己可以步蔣家旻後塵，「回家」有期。

「見蔣家旻可以解凍回歸《愛•回家》， Queenie同湯洛雯都希望可以入番組。其實唔係冇機會，因為加咗高海寧之後，近排收視插到落十七點，有啲網友又話好懷念 Alex（朱慧敏）同馬壯（黎諾懿）條感情線，話唔定遲啲又會再執位。」一名無綫人說。