[壹週刊 - 1293] 疏財仗義 張栢芝暗投微電影 連環掃獎 栢芝,M1,

幫新晉導演完成電影夢，栢芝唔想多提，只向楊永光送上四個字：「恭喜！加油！」

探熱針

疏財仗義　張栢芝暗投微電影　連環掃獎

密返內地做綜藝騷，水頭充足的張栢芝，唔使靠前夫謝霆鋒庇蔭，一擲三千萬在新加坡買屋搬外，早前又解囊接濟一個電影系學生完成作品後期，避過爛尾一劫。這套名為《 90天》的微電影，最終在北美多個影展橫掃擸獎。

攬上身

搵到錢又鍾意豪使的張栢芝，早前從一個電影人口中得知曾經幫電影《血滴子》拍 making of的 NYU電影系碩士生楊永光，因為唔夠錢做後期，作品埋唔到尾，疏爽栢芝二話不說攬上身：「咁我幫佢！」

講得出做得到！張栢芝親自出馬為對方物色後期製作公司，甚至出面討價還價，爭取相宜價錢，又自動波為對方埋單找數。

作品得以順利完成，但從頭到尾沒有接觸過張栢芝的導演楊永光，曾託中間人傳話，表示要在片尾鳴謝栢芝，但她一口拒絕。

「佢（張栢芝）話唔需要，仲話我哋啱啱開始拍電影，想個 attention喺番我哋嗰邊，佢有呢個諗法，真係好感激！」楊永光說。

以香港作故事背景的《 90天》，得張栢芝相助包底做後期，才能有機會揚威海外。

曾參與港產片的楊永光憑微電影《 90天》，在北美多個影展獲獎。

橫掃擸獎

結果，這套名為《 90天》的微電影在北美多個影展參賽，分別獲得「第三十二屆溫哥華國際電影節」加拿大短片最有前途新進導演優異獎、「第二十屆棕櫚果國際短片電影節」北美最佳短片及最佳學生攝影亞軍，以及二○一四年「柯達學生獎學金金獎」。電影接二連三獲獎，因為出手相助，變成有份投資的張栢芝說：「幫人唔使問點解！」

謝霆鋒與王菲世紀復合後，本月初孖咇返港，高調晒恩愛。

張栢芝豪擲三千萬在新加坡自置物業，與前夫徹底斬纜。

（《忽然 1周》圖片）

近年張栢芝密密出席內地綜藝節目，進賬相當可觀。

電影獲獎至今，楊永光卻未有機會見張栢芝一面。

於加拿大長大的導演楊永光，自小鍾意睇港產片，對於栢芝的認識，來自她與星爺主演的《喜劇之王》。

老闆癮

做幕前唔可以做一世，不少圈中電影人都有鋪老闆癮，由演員變成電影投資者，雙重身份！

古天樂

片酬千萬起跳的古天樂，片量多，近年與基金合作做埋老闆，投資電影包括《逃出生天 3D》、《金雞 sss》、《掃毒》、《 3D豪情》等，出錢又出力。

劉德華

成立「天幕製作公司」，投資的電影蝕多過賺，近年的《打擂台》及《桃姐》先後奪金像獎最佳電影，吐氣揚眉！劉華雄心壯志，去年再投資警匪片《風暴》，全國勁收三億票房。

麥浚龍

家底豐厚，有米老豆麥紹棠揼水， Juno 12年豪擲 1,500萬自資做導演，開拍《殭屍》，錄得 2,000萬票房，贏盡口碑。

何超儀

10年，憑首部投資作品《維多利亞壹號》成功打入荷李活市場，奪得西班牙影后，其後何超儀再擲 500萬投資《復仇者之死》，可惜票房仆直，僅收 80萬。

鍾意就快D Share啦！

下一篇 》