24歲、 5呎 7吋高，還擁有 35D導彈身材的姜素拉，有料唔怕晒，最近幫雜誌《 1st Look》拍攝一輯性感內衣照，惹火身材真係令男人流晒鼻血。
韓飯台
戒宵夜 甩 50磅 姜素拉豬扒變女神
韓國收費台 tvN熱播的韓劇《未生》，以職場做背景，講上班族掙扎求存的故事，中正打工仔心聲，所以近期在韓國大 hit，套劇除捧紅男主角、帝國之子成員任時完外，亦令女主角姜素拉火速上位。
現年 24歲的姜素拉，樣靚唔在講，還有演技， 3年前已憑《陽光姊妹淘》一片攞走《釜山電影節》的「最佳女新人獎」。不過，素拉最突出，當然係充滿曲線的勁爆身材，在《未生》有幕利用身材促成生意，大展 S曲線更成為劇中焦點。
唔講唔知，火辣素拉少女時，原來又肥又老土，直情可以用「豬扒」嚟形容。現在又瘦又靚秘訣原來係戒食宵夜。
拍上套韓劇《 Doctor異鄉人》時，姜素拉仍是女二，但最近拍新劇《未生》已跳升為女一，劇中素拉飾演一名在職場打拼的 OL，同一班新丁同事一齊掙紮求存。《未生》自 10月中開播以來，收視集集升，由首集 2.8%升到現時 9.4%，對收費台來說，成績已經好好。而喺第 1集中姜素拉為促成生意，於會議中大擺 S甫士引人的畫面，成為韓劇熱話。
《未生》中，任時完同姜河那爭姜素拉。
現實中素拉對愛情有咩睇法？
最近姜素拉接近訪問時自爆：「如果我睇中一個人，我會睇準時機先出手，所以出手前會做好計算，不會輕舉妄動。我現時是單身，並唔係唔想拍拖，亦唔係經理人公司阻止，而係我想搵同樣係藝人嘅對像拍拖，因大家都會了解對方嘅難處。不過若對方係藝人，又要考慮對方公司立場，加上雙方都忙於工作的話，又會因冇時間見面而關係轉淡，所以做藝人想談戀愛都好難。」
素拉讀高中時係肥妹，究竟點樣先減到好似𠵱家咁索？
冇錯， 5呎 7吋高的素拉讀高中時，體重曾高達 160磅，當時因太豬扒，冇男同學想跟她做朋友，所以決心減肥，終於花 1年時間，搣甩 50磅肥肉，變成 110磅的窈窕身形。早前素拉自爆減肥秘訣，是戒食宵夜，就算晚飯也要在晚上 6點前食，平時亦要狂做運動。不過，減完都要 keep，近年保持 fit爆身形的秘訣，就是跳芭蕾舞，因跳芭蕾舞除可消耗卡路里，更可磨練個人意志。
𠵱家素拉咁紅，聽講素拉父母曾反對佢入行喎？
濟州島出身的素拉其實是家中的獨女，父母自小已當她如公主般呵護，還希望她長大後可成為教師，但素拉讀中三當年因睇完舞台劇《歌聲魅影》後便立志要當演員，當她跟父母提出後卻遭大力反對，但一向硬頸的素拉，不理父母反對，決定參加戲劇考試，還決心減肥，最後父母亦被她的堅持感動而妥協，講起都一殼眼淚。
|
鍾意就快D Share啦！
|
|
|
