掃呢頁CODE去手機

2015年1月20日 星期二

謝安琪失金曲金獎 轟無綫不公 無綫,謝安琪,




謝安琪失金曲金獎 轟無綫不公



其他影片:>>






勁歌收視破新低 謝安琪轟無綫不公

無綫主辦的勁歌金曲頒獎禮前晚由自己友星夢及友好英皇玩晒,全晚頒發三十八個獎項,兩間公司共擸走二十五個獎,無綫「親生女」吳若希竟撼贏謝安琪(Kay)奪金曲金獎,最諷刺是Kay還要跟奀星林師傑同獲兩獎「平起平坐」,難怪收視插水最低僅十二點創歷史新低,Kay經理人夏森美接受本報訪問暗寸:「如果以後純粹睇邊間唱片公司出得人多就有回報,相信我哋永遠滿足唔到無綫要求。」

無綫自二○○九年跟四大唱片環球、華納、SONY和EMI因版稅問題反面後,四大歌手絕迹無綫音樂節目,加上年前無綫成立星夢娛樂力捧「親生仔」歌手,搞到一直力撐無綫的英皇都有微言,雖然無綫宣佈開放勁歌總選跪求沒合約歌手撐場,可惜最終事與願違,太陽娛樂和星娛樂都加入拒玩行動,結果前晚在電視城舉行的勁歌金曲頒獎禮,陳奕迅、李克勤、許志安、周柏豪、官恩娜、薛凱琪、關心妍等歌手統統缺席,僅得容祖兒、張敬軒、謝安琪充撐場面,難怪收視跌破歷史新低,最低僅得十二點(約七十八萬觀眾),平均只得十四點(約九十一萬觀眾),相比去年廿一點,收視大幅勁跌七點。

在蜀中無大將下,全晚三十八個獎項,無綫自己友星夢狂擸十二獎,友好英皇橫掃十三獎稱霸,英皇旗下軒仔和祖兒分奪最受歡迎男女歌星,至於金曲金獎賽前是謝安琪《獨家村》和吳若希《越難越愛》之爭,雖然Kay被網友睇高一線,最後卻落敗,Kay在台下扮喊交戲,網友留言轟《越》獲金曲金獎不公平:「頒獎係咁多個入面最垃圾嗰個」、「呢首歌旋律普普通通,唱嗰個把聲都唔係話好特別。」



■謝安琪前晚失金曲金獎兼得兩獎被敷衍,昨還被網友質疑抄衫,她即在微博貼戰衣品牌力證冇抄襲。



■經理人夏森美(左)為Kay在勁歌只獲兩獎抱不平。資料圖片



■謝安琪最近雖然幫無綫拍新劇《殭》,但始終不是親生女被冷待。

非親生女慘遭冷待

雖然Kay正為無綫拍新劇《殭》,惟始終不是「親生女」被冷待,全晚僅得兩獎與奀星林師傑「平起平坐」,輸給獲三獎的後輩吳若希、許廷鏗、鄭俊弘。對於Kay失落金曲金獎,經理人夏森美昨在電話暗寸無綫:「我哋對無綫一直支持,優秀選、總選記者會Kay都出席,佢哋打過電話嚟叫我哋幫手,我哋都抽時間支持,心就交咗出嚟,然後佢哋安排係點樣,大家都清楚明白,我哋唔係單單要求幫無綫做咗嘢一定有回報,但以Kay今年專輯同音樂上叫好叫座口碑,最後咁樣結果,我係絕對有保留。如果以後純粹睇邊間公司出得人多就有回報,相信我哋永遠滿足唔到佢要求,我哋只有專心做好音樂,令到樂迷滿意。」問會否影響跟無綫合作?他說:「無綫有好多部門,我哋同好多部門合作開心。」



■出道四年的吳若希竟贏三獎包括金曲金獎,令人質疑親生女有着數。



■祖兒出席撐場結果掃四獎成大贏家,無綫還增設最受歡迎歌手十年大獎嘉許。



■林師傑在樂壇寂寂無聞hit歌都唔多隻,竟然獲兩獎跟謝安琪睇齊。

吳若希自嘲未夠班

至於Kay在慶功宴上說:「我都好榮幸年年都乜乜之爭,我係之爭王,我覺得賽果令大家好舒服,每個獎項都實至名歸。我覺得佢呢首歌(《越難越愛》)覆蓋好全面,我自己條村我都好滿意,但佢去到越南喎。」問到年僅廿二歲、出道四年的吳若希是否太快攞大獎?吳若希說:「係,我覺得好多嘢我係未夠資格,我嘅唱功,我個樣,甚至做人唔係最好嗰個,我希望用努力去將呢啲唔夠好嘅做好佢。」

至於獲新加設最受歡迎歌手十年大獎的祖兒說:「我公司破紀錄,攞咗兩個女歌手獎,今年攞十年老人牌,好感動。」對於之前傳英皇不滿無綫偏幫星夢,故前晚英皇擸十三個獎安撫,祖兒說:「獎項交番畀公司幫我安排,每人對我嘅好都銘記於心。」

採訪:皓騫



■英皇狂掃十三獎成勁歌班霸,可惜頒獎禮星光黯淡收視最低十二點創歷史紀錄。





鍾意就快D Share啦!