[忽然1周 - 1020] 藝人點解齊齊做政協？ MW,

靚抽王

藝人點解齊齊做政協？

有報道指星爺參加廣東政協時俾人圍，一向深居簡出嘅佢，點會捨得拋頭露面做啲唔等使嘅嘢吖？問題係，嗰啲同政治扯唔上關係嘅藝人，何故爭住做呢個政協？等我哋嚟考究一下個原因喺邊先：

冷知識：政協=中國人民政治協商會議=共產黨開會改善民生

原因 1　搵食啫，犯法呀？

曾經喺香港玩過一字馬同埋拍過三級片嘅彭丹，早年返大陸拍咗好多歌頌祖國嘅戲，再開埋電影公司，拍咗幾部歌頌祖國嘅戲，終於做到甘肅政協。喂，搞咁多嘢，唔通真係乜乜乜咩？唔通拍三級片又係為祖國？都係搵餐飯食啫！

原因 2　做政協乜都唔使做

影帝曾志偉都係江門市嘅政協，不過比其他藝人醒好多，佢已經請假四年，次次開會都唔見佢。係喎，有個朵，又唔使做，幾好呀！

原因 3　返鄉下威

陳小春轉戰強國拍劇，又做埋惠州政協，據說佢鄉下就係惠州。係囉，你唔記得你喺香港出道？唔緊要嘅，你家吓食強國住強國，仲做埋政協，可以返鄉下同啲鄉里威吓

原因 4　禁毒

各人做政協都有唔同理由，但唔係人人都為咗私利嘅！好似成龍大哥咁，佢做政協，係想宣揚愛國思想，而身兼禁毒大使嘅佢，當然就要發揚禁毒思想我相信佢係 100%真心……膠，因為佢自己個仔都未俾佢影響到，仲話要影響全中國？

原因 5　環保

星爺今次出席廣東政協時，聲稱今次會就環保問題提案。其實唔好話廣州，香港都有好多問題，極需要好似星爺呢啲有識之士出聲㗎。不過我哋得 700萬人，邊夠十三億人重要吖！

荒謬現象學

每期荒謬現象學為你解構娛圈嘅不尋常現象！

鍾意就快D Share啦！

下一篇 》