最後倫仔肉緊攬住夏蕙 BB激咀，呢幕一定睇到觀眾……
娛樂喧
微電影激咀花𡃁 82歲夏蕙 BB︰初戀返晒嚟
82歲夏蕙 BB言行一向出位，乜都夠膽死。近日她在情人節微電影《五顏六色愛戀過》中與花𡃁激咀，網上熱爆。自稱近 60年冇同男人激咀過的夏蕙 BB，亦回味無窮︰「同倫仔談情，令我初戀感覺返晒嚟！」
據知微電影男主角倫仔（鄺坤倫），今年 27歲，乃澳門電視台主持，今次是第一次做主角。他坦言接吻戲是「導演大整蠱」，皆因場戲由原本的借位變「嚟真」。不過勇氣可嘉的倫仔，最近被網友稱為「烈士」，出晒位噃！
微電影《五顏六色愛戀過》的導演阿東與倫仔都是在澳門電視台工作，兩人私交甚篤。近日阿東想在情人節拍一部微電影，宣揚「真愛無年齡界限」，於是找來倫仔做男主角。之前他在報章見到夏蕙 BB，覺得她十分前衞，於是膽粗粗找她合作。
今次導演阿東投資了五位數字，拍攝班底及其他演員，都是碌人情卡，成套微電影，知名度最高，算是夏蕙 BB了。阿東表示︰「初時以為機會好微，點知同 BB經理人小肥豬一說即合， BB仲親身過澳門拍了兩日，好多謝佢。」
據知夏蕙 BB今次純為幫人完成心願，只是收了封利是做「片酬」，就連拍攝的服裝都是自備。
60年銀幕處女咀
夏蕙 BB指她從影六十年來未拍過咀戲，今次可謂她的「銀幕處女咀」。她說：「莫講話拍戲，真實生活中我都好多年冇咁激情咁錫過 18歲時同胡先生（前夫胡百全）拍拖後， 20歲至激情咁錫過咋。（咀花𡃁有冇尷尬？）都冇嘅！因為當時投入個角色，我真係好愛呢個男人吖嘛！喺戲裏面同倫仔拍拖，令我初戀感覺返晒嚟！心諗如果呢個係我老公就好嘞！不過講到尾，今次幫到人係開心嘅事。」
夏蕙 BB好享受拍攝過程，但男主角倫仔提起這幕激咀戲，就尷尬萬分，面都紅晒。「導演大整蠱之前只係話同夏蕙 BB攬吓得㗎嘞，最尾拍時先至講（咀戲）咋！之前提都冇提過！當晚臨拍之前就話不如你哋借位錫一錫啦，點知借完位又話唔夠逼真，不如真咀，其實冇心理準備㗎！」倫仔苦笑說。
倫仔說︰「其實女朋友唔知我要同夏蕙 BB咀㗎！我係先斬後奏，好在拍完後話佢知，佢只係『哦』咗一聲咋！」他尷尬謂：「我諗佢都明白拍戲啫，唔會戲假情真嘅！」此時導演阿東大講風涼話：「 BB儲咗幾十年嘅幕前初吻俾咗你，補身呀，今次驅風呀！」
無論如何，踏入 2015，夏蕙 BB又完成了她人生一大創舉，呢個「驅風之吻」，為馬年提供最後的爆笑位。
《五顏六色愛戀過》講啲乜
這部由幾個年輕人拍攝的微電影，片長 21分鐘。除 2月 13日在網上播出外， 2月 12日喺澳門瘋堂十號上映三場，票價仲任你開，全部捐給澳門獨立製作人，完場後更可以同夏蕙 BB影相，甚至抱抱或者咀嘴。
微電影熱潮
近年來流行微電影，除了簡單表達訊息，還可以用作廣告宣傳之用。
|
鍾意就快D Share啦！
|
|
|
