2015年4月26日 星期日

丁蟹翻Hit添食仲勁 丁蟹,秋官,鄭少秋,



無綫在股市波動之際重播《大時代》令神劇翻Hit,隨即計劃拍電影版希望再創高峰。靈魂人物「丁蟹」鄭少秋前晚自誇若現時拍電影版,演出會更勝從前。而「四蟹」其中三人陶大宇、郭政鴻、邵仲衡昨日聚頭,大爆各人的角色原來是大兜亂。

秋官表示若再演丁蟹會更勝昔日。

郭政鴻(左起)與邵仲衡讚大宇演益蟹入形入格。

大宇在《大》劇的演出備受讚賞。

飾演利蟹的郭政鴻原本冇份演出。

邵仲衡爆秋官曾當眾讚大宇。

無綫趁股市翻波,上周二凌晨開始重播的神劇《大時代》即翻Hit,收視高企,無綫有意食住上拍電影版,而兩大靈魂人物「丁蟹」鄭少秋(秋官)及兩屆金像影帝劉青雲自然不可或缺!前晚秋官與汪明荃及李龍基等錄影《Sunday靚聲王》,因《大》劇翻Hit成紅人。問到會否參演《大時代》電影版,秋官說:「睇吓點,依家仲做丁蟹呀?會辛苦啲囉,當年我要食大隻奶粉,做健身,谷肌肉。(怕做唔番?)梗係做到,水準得呀!好過以前添,但練大隻唔得嘛!」《大》劇重播即在股市掀起「丁蟹效應」恐慌,不過秋官卻預告會愈升愈有:「自己啲股票都未放,上個禮拜個市有啲調整,但內地政策始終利好。」

陶大宇寸爆獲讚

除「丁蟹」秋官外,劇中飾演丁蟹四子的「四蟹」陶大宇、郭政鴻、邵仲衡及吳啟華哥哥吳啟明,近日備受網民熱捧。昨日陶大宇、郭政鴻及邵仲衡接受本報專訪,對當年有份參演神劇大感榮幸,更指原來掟方家姊妹落樓的場口未有足本播放,又大爆最終演出班底與原定的角色大兜亂。飾演孝蟹的邵仲衡說:「孝蟹原本係屬意鄭浩南演嘅,我就演陳滔滔,即係林保怡演個角色,後尾收到公司電話叫我做孝蟹,嗰時其實淨係出咗幾集劇本,後來感覺到其實個劇本係因應演嗰個演員而寫嘅!」飾演利蟹的郭政鴻自爆原本冇份拍,而原本演利蟹的大宇,最後改演益蟹。

大宇演得入型入格,於劇中強姦楊羚一幕令人印象深刻,問到當時精力旺盛的他可有尷尬,他說:「冇!連事前溝通都冇,不過有排過戲,佢都知有咩動作,大家都有默契。」他笑言大宇似坦克車:「永遠下巴行先!因為個角色係需要好寸咁!」又說:「有一次放飯,秋官當眾大讚大宇好戲!」郭政鴻亦說:「記得拍掟四蟹落街嗰場,大宇話係咁意做,點知一埋位就七情上面,完全係演技教材!」而大宇謙稱是角色寫得好。

吳啟明生活無憂

「三蟹」難得聚頭,不過就獨欠飾演旺蟹的吳啟明,「三蟹」坦言與啟明「好耐冇聯絡。」不過卻指啟明生活無憂,郭政鴻說:「兩年前喺馬來西亞見過佢,嗰陣喺餐廳啜緊田螺電話響,原來佢喺餐廳食緊嘢,仲有靚車同司機接佢!」邵仲衡亦說:「啟明好似公子,有次我同佢唔使拍,佢揸架保時捷車我去食車仔麵!佢話鍾意嗰啖湯喎!」大宇則自認當年冇錢,而啟明有一次與劇組食飯時豪氣地叫一條大鱔,更埋單請食飯。

秋官表示若再演丁蟹會更勝昔日。

郭政鴻(左起)與邵仲衡讚大宇演益蟹入形入格。

大宇在《大》劇的演出備受讚賞。

飾演利蟹的郭政鴻原本冇份演出。

邵仲衡爆秋官曾當眾讚大宇。

鍾意就快D Share啦!
Related Posts Plugin for WordPress, Blogger...