2015年5月15日 星期五

開餐廳有陳惠敏照 麥貝夷洗碗樓面一腳踢 [忽然1周 - 1033] 麥貝夷,陳惠敏,MW,



後巷洗碗

使晒全副身家入股餐廳的麥貝夷,日前唔夠人手,自己要匿在後巷幫手洗碗。

娛樂喧

開餐廳有陳惠敏照 麥貝夷洗碗樓面一腳踢

10年出道的麥貝夷,與鍾一憲簽林建名旗下大名娛樂組情侶檔,二人名曲〈勾手指尾〉紅爆網絡,可惜兩年前不獲公司續約。前路茫茫,惟有將僅餘積蓄盡地一煲,近日她與友人合資 80萬在佐敦開半私房式西餐廳。

做老闆表面風光,本刊發現她連洗碗樓面都做埋,加上餐廳位處龍蛇混雜之地,好彩得人面廣的陳惠敏間中打躉,幫手睇住。

麥貝夷 13年尾與鍾一憲拆夥,成大名娛樂棄將,為搵食轉投廣告公司做助導、影印等打雜,順道儲錢。日前本刊發現她在佐敦一西餐廳做侍應,當晚樓面只得她一人,捧餐、執枱一腳踢,由於打扮零星味,因此未被食客認出。

招呼客人

日日落舖頭負責樓面工作的麥貝夷,招呼客人頭頭是道,而大股東譚生(紅圈),則負責攞貨、營運。

樓面執枱

翌晚麥貝夷再落樓面做知客,見她執枱技術亦算熟練。

有我睇住邊個夠膽蝦你!(設計對白)

後巷洗碗

惠敏哥話互相幫助。(真實對白)

日前,記者就開舖頭做打雜一事訪問麥貝夷,她坦言自己做生意仍屬初哥,同時她亦承認惠敏哥間中來打躉。

由於當晚有數枱客人,但全間餐廳連候鑊、收銀加埋做「打雜」的麥貝夷總共才 5人。在人手極度不足之下,只見麥騰出騰入廚房冇時停。其間記者看見她走出後巷,在角落位以摩打手速度洗碗碟。

入股 15萬

事後記者從麥友人口中得知,麥貝夷並非店舖的侍應,實際是老闆之一。知情人透露:「聽講 Karene(麥貝夷)俾咗 15萬出嚟諗住試吓創業,因為股份細,所以乜都做,後生女當學吓嘢!我哋啲 friend成日落去食嘢支持吓佢,佢又同我哋斟酒,介紹啲海鮮,都幾 Po㗎!有次仲見到惠敏哥入舖頭打招呼!佢真人好有氣勢,原來同大老闆好熟,有時會嚟坐吓!」

帶兄弟擦生蠔

事後記者向麥貝夷求證開餐廳一事,她老闆上身:「呢度開咗半年左右, total投資咗 80萬,我佔最細份,唔多過 20%。雖然仲未開始賺錢,但開始儲到啲熟客,我希望唔使一年翻到本啦。(上次見你喺後巷洗碗?)哦……咁啱咋!我哋洗碗個同事,嗰晚囝囝病咗要早退,咁咪我頂囉!(有冇覺得好唔慣?)要自己調節吓個思緒,開頭都覺得:『點解會咁嘅?』不過始終係試業階段,開頭人手唔夠係正常!其實真係學咗好多嘢,以前幾驚青,唔識同人 social,又會講錯嘢,依家成長咗好多。(惠敏哥係咪熟客?)哈哈,你又知!佢間中會經過,走入嚟傾偈。有次佢帶埋成班人嚟,一入門口就話:『我要食晒你哋啲生蠔!』結果佢叫咗 5打,佢自己就食咗打幾,好勁!佢仲叫我幫佢斟酒。(佢惡唔惡㗎?)冇呀!佢好豪氣,話左鄰右里,要互相幫助。」有惠敏哥照住,麥貝夷應該好放心。

齊昕突擊

上周四( 7日)晚,麥貝夷出席香薰活動(右二),原本冇份出席活動的齊昕(黑衣者)秘密返港撐場。

麥貝夷與鍾一憲(右二)曾是林建名旗下並受力捧,惟 13年離奇地不獲公司續約,雙雙失業。

500萬點擊名曲

麥貝夷都有紅過, 11年大名娛樂安排她與鍾一憲組情侶檔,〈勾手指尾〉一唱成名, hit爆 YouTube,點擊率逾 500萬,唔講得笑。成為公司棄將後,她以自由身接拍微電影及舞台劇等;而男方到過韓國集訓,近日又攻內地拍劇搵人仔。

到韓國集訓期間,鍾一憲戴了大眼仔並剪了頭都敏俊髮型,更離奇變 V煞臉,一副韓仔樣。

食客正評

開業僅 5個多月的 The Saltwater位於佐敦偉晴街,餐廳走 fusion路線,招牌菜有海鮮刺身拼盤、炭燒荷蘭野雞胸、法國生蠔等。記者訪問了首次光顧的余太一家,眾人均大讚水準十足,惟生蠔不當造,不夠肥美,但一定會再幫襯。

海鮮刺身拼盤

炭燒荷蘭野雞胸

鍾意就快D Share啦!
Related Posts Plugin for WordPress, Blogger...