掃呢頁CODE去手機

2015年5月15日 星期五

冧掂林建名力捧 翻兜爺孫戀 何傲兒升呢做歌手 [忽然1周 - 1033] 林建名,何傲兒,MW,



高調睇騷

去年中,何傲兒與林建名過從甚密,不時孖住睇林生有份投資的演唱會,非常高調。《蘋果日報》圖片

娛樂喧

冧掂林建名力捧 翻兜爺孫戀 何傲兒升呢做歌手

07年落選港姐何傲兒在大台捱足七年依然是花瓶一個,事業線起唔到作用,感情線反而精彩。去年與大名娛樂老闆林建名的爺孫戀令她聲名大噪,未幾又被影到與富二代周子揚同車啜爆,搞到林生當眾落淚。

本月初何傲兒突然宣布約滿大台要離巢,原來她早有後着。據知她已冧掂林建名揼錢捧她做歌手,不過林生契女兼藝員部經理戴夢夢唔多 like,仲出手阻撓。契女鬥 Honey,一場女人鬥爭正式開始,林生夾在中間都幾頭痕。







想做歌手問過我先(設計對白)

何傲兒 07年參選港姐獲得「旅遊大使獎」,其後入讀藝員訓練班,加入大台 7年多的她一直未獲重用,拍劇角色大多以配角為主。

一度放棄爺孫戀

對比演藝事業,她的感情生活無疑更加精彩,緋聞對象絕對是重質不重量。去年 7月,有傳 26歲的何傲兒與 77歲的富豪林建名譜出「爺孫戀」。其後峰迴路轉,半個月後她被影到與西貢地王之子周子揚車廂啜爆,二人直認拍拖。何傲兒為保形象放棄林建名,而林生接受訪問時哽咽說何傲兒不接聽他電話,一度於傳媒面前落淚。

之後何傲兒與林建名劃清界線,就連對方的生日派對都拒絕出席,不過林生卻一直對她念念不忘。據知情人士指:「 Lily(何傲兒)對拍劇冇咩興趣,佢鍾意唱歌多啲,之前大台搞《星夢傳奇》,佢即刻報名參加,不過好快被 out。見到鄭俊弘、鄭世豪呢啲奀星都上晒位,就連遲佢一屆又係得個『旅遊大使獎』嘅高海寧都俾大台力捧,佢心都淡埋,所以決定唔續約。林生係大名娛樂老闆,又咁照顧佢,何傲兒一話要做歌手出碟,林生即刻話冇問題。其實所有條件都傾好晒,依家差落筆簽約。」

Bye Bye大台

上周三( 6日),何傲兒突然在微博宣布與大台約滿正式分手,言語間暗示在大台七年多都沒有試過獲獎,臨別只好在微博講出心底話。而她在大台的離巢劇《波士早晨》,更要扮哨牙醜角。

前年何傲兒參加大台歌唱比賽《星夢傳奇》,她的歌聲甚有葉蒨文的影子,不過出場僅兩集即被叮走。

戴夢夢出言勸阻

大名娛樂現時的旗下歌手有胡渭康、鍾偉強、女子組合 Choco,公司更為其他歌手發行唱片,絕對有能力捧何傲兒做歌手兼出碟。不過有傳大名娛樂藝員部經理兼林建名「契女」戴夢夢為阻何傲兒發歌星夢,多次搵林生傾偈加以勸阻。

知情人士指:「林生將公司藝人嘅嘢放晒手俾戴夢夢搞,夢夢覺得之前契爺為咗 Lily搞到喊晒咁,所以同林生講話最好睇定啲先,仲不時重提 Lily同周子揚拍拖單嘢,想林生對佢死心。不過今次係林生親自同 Lily傾條件,仲話會搵第二個跟佢啲嘢,睇嚟戴夢夢抗衡唔到囉!」

本刊記者致電戴夢夢,對於何傲兒是否加盟,她淡淡然說:「之前都講過,任何有潛力、有實力嘅藝人,我哋都會考慮。(咁何傲兒係咪會簽你哋公司?)對於呢方面唔講咁多。」整個訪問過程,她都冇提過何傲兒個名。

傲兒當街啜

情到濃時,二人更旁若無人當街擁吻,數小時的購物過程中咀足 13次, sweet到漏。《蘋果日報》圖片

林生哭了

何傲兒為保形象與林建名斬纜,林生在記者面前哭訴女方唔接他電話。傍住契爺的戴夢夢當場嚇窒,即時安撫契爺並送上紙巾。

優先考慮簽林生

周二( 12日)下午,本刊記者致電何傲兒,對於簽大名娛樂做歌手,她開晒口話首選「大名」:「其實有好多公司透過 agent聯絡過我,林生嗰邊我會優先考慮。我對唱歌係好有興趣,平時接 job做 MC都有機會唱,不過如果有人俾機會我做歌手出唱片,我會好樂意接受挑戰。」言談間何傲兒直認多人吼,坐定粒六的態度,似乎暗示林生的大門已為她而開!

約滿大解放

月初約滿大台,何傲兒隨即飛到馬來西亞旅行嘆世界,更於微博上載三點式泳衣照,離巢後不惜大解放。不過她周二( 12日)接受本刊記者訪問時堅稱:「雖然依家自由身,不過都唔會轉行性感路線,咩大解放呀都唔會。」

鍾意就快D Share啦!