掃呢頁CODE去手機

2015年5月14日 星期四

九月失學 怕咗吳綺莉 學校勸退小龍女 [壹週刊 - 1314] 小龍女,吳綺莉,吳卓林,M1,



吳綺莉三番四次炮轟學校分化母女關係,校方迫於無奈下決定勸卓林退學。

探熱針

九月失學 怕咗吳綺莉 學校勸退小龍女

今年三月,吳綺莉涉藏毒虐兒被捕,當時小龍女吳卓林一度搬到契媽屋企暫住。有指成龍事發後向吳綺莉重提與女兒相認,而卓林亦表明心意,恨見生父。

父女夾攻,再觸動吳綺莉神經,情緒又失常,三番四次踩到女兒就讀的學校理論,指校方挑撥母女關係,搞到卓林離家出走。據了解,校方多次跟吳綺莉傾談均無法達成共識,迫於無奈決定勸退卓林,完成今個學期後,小龍女就要被迫轉校。

變本加厲

九九年,吳綺莉被爆佗住成龍骨肉!吳卓林出世後,成龍一直唔認女,但有傳兩母女移居上海前,雙方曾協議好一個數目的生活費。至一一年,吳綺莉帶住卓林回流香港,有指一度以斷糧要脅兩母女搬返上海的成龍,突然轉軚,要求與卓林見面,但遭吳綺莉反對,自此更拒絕再收取對方的生活費,自食其力。

虐女事件爆出後,成龍一反常態,多次公開表示「關心」,有指他再透過中間人,向吳綺莉提出要求父女相認。

同媽咪關係未有好轉,上週卓林放學後孖住女同學搭火車到大學站,再坐私家車離開,連日來都未有回家。

「其實卓林一直都知道成龍想同佢見面,佢亦好想去見吓自己個老豆,但 Elaine(吳綺莉)好抗拒,虐女單嘢爆咗出嚟,成龍再有藉口見個女,不過 Elaine好堅決,覺得佢一開始唔負責任唔認個女,而家養到咁大先嚟認番,所以寧願唔要佢啲錢,都唔會俾佢哋相認。」知情者說。

十五歲正值反叛期的卓林,不認同媽咪的決定,於是變本加厲,唱反調爭取同成龍見面,兩母女關係為此再度惡化,已搬返屋企的卓林,近日再度離家出走。

上週,卓林如常返學,放學後孖住一名女同學走後門離開,行去火車站期間,沿途有傾有講,在大學站落車後,卓林轉坐一架私家車。連日來未有回家的她,連母親節亦冇蒲頭,甚至拒絕接聽電話。

當日下午,吳綺莉獨自外出,被問到是否自己過母親節,她一臉無奈:「我今日晤會見個女㗎喇!(卓林有冇打俾你?)冇呀!(有冇同你講母親節快樂?)你而家咪同我講囉!」

週二( 12日),吳綺莉到電台開工時,直認與卓林學校出現分歧:「其實老師同家長係應該多啲溝通,我諗外國人同中國人始終思想唔同,今次件事令我知道有咩國家係唔應該送啲仔女去。」

母親節當日,吳綺莉孤單一個,更直認卓林連電話都冇打給她。

今時不同往日

多年來,成龍對於吳綺莉和卓林都不聞不問,亦一直堅拒公開承認小龍女是女兒,直至今年,成龍態度軟化,甚至公開主動提小龍女。

不參與改名

99年小龍女出世,女兒取名卓林並隨母姓,全由吳綺莉及吳母決定。

驚益咗傳媒

00年,卓林一歲 BB樣曝光,成龍一概不答,並揚言:「我是不會回應,寫寫吓又會成為傳媒的搖錢樹。」

斬草除根

03年,卓林入讀幼稚園資料曝光,成龍不願多談,「我講過自記者會( 99年,以一句「犯天下男人的錯」輕描淡寫搞大吳綺莉個肚)後,有關事我唔會再講。」

唔做主動

06年,成龍出席電影《寶貝計劃》首映,與小演員玩車仔父愛盡現,被問到如果小龍女想見父親時,成龍並表示:「唔知,順其自然,佢搵我咪嚟囉!」

擺明大細超

08年,吳綺莉和小龍女被拍到現身上海,成龍出席公開活動被追問女兒近況,他一味扮聾扮啞,但問到太太林鳳嬌及房祖明,則笑晒逐一回應。

落晒閘

11年,吳綺莉高調復出後,成龍於上海出席活動時因擔心傳媒迫問小龍女的問題,表明不接受訪問,亮相三分鐘就急住閃。

破天荒

13年,在北京電影發布會中,成龍破天荒主動提及掛住小龍女,「我想起了我的小龍女,因為我也對她疏忽了很久!」但事後他否認,指傳媒斷章取義。

公開相認

上月,成龍接受報章專訪,終於公開隔空認女,並直言多年來對女兒有所傷害,身不由己,被問到是否想和卓林見面相認,成龍明顯不似過往般抗拒:「順其自然,見到就見。」態度軟化。

要求道歉

據吳綺莉身邊人稱,小龍女之前雖然肯搬返屋企,但兩母女關係並無好轉。

「 Elaine仲怪個女點解要報警,一諗起就發脾氣,仲躁過之前,卓林就覺得媽咪唔俾佢見老豆好專制,兩母女都唔肯讓步,喺屋企面左左,說話都唔多句。」知情者說。

據知,吳綺莉不忿校方在沒有知會她的情況下報警,認定是老師慫恿卓林,分化母女關係,所以多次踩上學校理論,要求校方道歉。

「佢堅持要校方公開出信道歉,承認係學校處理不當,又話負責處理嘅老師小事化大,搞到佢好麻煩,所以隔兩三日就打去搵校長,再唔係就踩上門,又話如果校方唔肯道歉,佢就唔走!其實校方同佢解釋過,學校嘅處理方式係恰當,亦喺卓林同意下報警求助,但吳綺莉唔接受,仲話學校有心整死佢。」一名學生家長透露。

吳綺莉和卓林相依為命十多年,但兩母女為了與成龍相認各執己見,關係愈來愈差。

一直想再搵個歸宿的吳綺莉,去年在飯局認識立法會議員石禮謙後,主動出擊約會,更試過漏夜上對方寓所拍門,嚇到對方即時斬纜。(《蘋果日報》圖片)

早前吳綺莉怒氣沖沖走到卓林學校搵老師理論,更向在場記者直指:「學校搞分化。」令校方大為不滿。

出人意表

於單親家庭成長的吳綺莉,同母親鄭黎明相依為命,吳母雖然從來唔透露工作背景,但一家衣食無憂。自稱被母親寵壞、性格任性的吳綺莉,行為舉止,出人意表。

與母疏離

吳綺莉母親鄭黎明

入行冇耐,吳綺莉已經唔理母親反對,與髮型師陳志達拍拖,吳母為棒打鴛鴦,試過激動到在男方家門外淋火水。

99年,在成龍反對下,吳綺莉誕下「小龍女」做單親媽咪,並搬到上海投靠母親,有指兩母女經常為小事爭執,吳母更試過持刀威脅,近年兩母女已甚少來往。

大住肚扯煙

自稱由 16歲便開始吸煙的吳綺莉,佗女時聲稱已戒煙,但轉頭又被傳媒拍得大住肚當街扯煙。去年,更被拍得她一邊對住女兒噴煙,一邊手指指鬧,之後又隨手把煙頭丟落地。

公開經手人

98年,吳綺莉背負小三之名,與成龍搭上,之後更懷有「龍種」,並公開承認經手人是成龍,事件轟動全城。

唔搭飛機

因為發了一整年飛機失事夢,所以吳綺莉對搭飛機有恐懼,每次由上海返香港,亦只是搭火車。

僵持不下

吳綺莉咬住唔放,亦不接納校方解釋,雙方最終陷入僵持狀態。據了解,經過多次會議商討後,校方有感跟吳綺莉的教育理念不一致,亦難找到共識,長此下去,只會影響小朋友,決定勸卓林轉校。

「上次吳綺莉上門搵校長理論,仲叫埋記者嚟,又喺記者面前係咁數學校,唔多唔少都影響學校形象,加上佢日日同學校嘈,卓林夾喺中間亦唔好。所以校方開過好幾次會,認為卓林轉新環境可能對佢會好啲。學校而家叫佢哋考慮,讀埋今個學期,睇吓搵唔搵到適合嘅學校轉過去。」知情者說。

鍾意就快D Share啦!