2015年8月10日 星期一

胎盤前置高危孕婦 梁政珏陀仔27周 出血入院



胎盤前置高危孕婦 梁政珏陀仔27周 出血入院



其他影片:>>






胎盤前置高危孕婦 梁政珏陀仔27周出血入院

現年34歲、有「咪神」之稱的梁政珏,今年1月14日在港註冊結婚,低調嫁給比她年長10歲的生意人何思源(John)。早前她宣佈一索得男陀B仔,目前已經懷孕27周,但梁政珏有胎盤前置及胎盤位置偏低問題,所以懷孕以來一直小心養胎,亦已計劃開刀生產,惟前日早上她突然下體出血,要報警急送醫院,醫生恐BB隨時出生,已令她要留院,全面卧床休息!

即將榮升人母的梁政珏預產期在今年11月,她曾表示因為遺傳了媽咪子宮後屈,兼有胎盤前置及胎盤位置過低問題,為免在分娩期間可能會導致出血過多,她已經計劃會開刀生。加上懷孕以來,梁政珏一直有嘔吐、頭暈情況,故她連月來亦乖乖聽醫生話留家卧床休息,直至早前精神好轉,才外出曬太陽,還到街市買餸煮飯畀老公食,前日她更準備到BB展為將出生的囝囝掃貨,未料早上在家突然出血,嚇得老公即時打999叫救護車將她送院。



■陀B仔的梁政珏因胎盤前置及位置過低問題,前日下體突然出血要送院。資料圖片

心情緊張情緒不穩

本報昨日聯絡梁政珏,仍然在醫院留醫的她接受訪問時聲線明顯虛弱,她說:「係呀,我入咗醫院呀,多謝你哋關心。」提到前日早上call救護車入院,她說:「我𠵱家晚晚都瞓得唔好,噚日(即前日)我好早起身,坐喺梳化食早餐,菲傭姐姐發現我條裙有血,但我自己係唔知道,本來諗住即刻換衫去醫院,但起身仲流得多,所以即刻瞓番喺梳化,好彩菲傭姐姐好冷靜,即刻叫醒我老公打999叫救護車。」



■囝囝現只重2磅5安士,梁政珏希望囝囝乖乖不要現在出世。互聯網圖片



■梁政珏昨晚在醫院休息,老公負責送飯給她。互聯網圖片

懷孕以來,梁政珏承認近日心情特別緊張,睡眠質素變差,每天只能睡幾小時便醒,為了很小事又會喊到收唔到聲,梁政珏昨日透露:「醫生𠵱家要同我打針,話要令BB個肺健康啲,因為BB隨時會出世,但係BB𠵱家得2磅5安士,咁快出世都好危險,所以係好擔心。」問她是否要一直留院養胎直至BB出生?她說:「要住幾日睇吓醫生點講,其實噚日(即前日)我本來先去咗一間公立醫院,但醫生話我可能隨時會生,佢哋冇晒BB床位,所以再送咗我去另外一間醫院。」梁政珏亦表示因情況打亂了到外國產子的計劃,她說:「𠵱家冇可能坐飛機,不過我知道𠵱家香港冇私家醫院肯收我,因為我胎盤前置嘅程度去到type 4,即係最嚴重嗰隻,本來計劃咗去外國生,𠵱家都要打消呢個念頭。」

出血送院示意圖



【一切如常】■前日早上,梁政珏如常在家中食早餐。



【突然流血】■家中菲傭發現梳化有血迹。



【報警送院】■梁政珏上救護車入院。

拍拖紀念日好難忘

梁政珏昨晚亦有更新instagram,與老公及未出世的囝囝說了一番話,前日立秋她入院,兩年前的立秋,正正是她老公John的生日,她留言:「仲記唔記得第一年拍拖嘅surprise birthday party吖?我哋過得好開心㗎!估唔到兩年後嘅立秋,竟然晨早要報警叫救護車入院,仲要入夠兩間先夠皮。噚日真係好辛苦吖!先啱啱27周。」而她亦叫囝囝「唔好出世住」:「Johnsonbaby應承媽咪唔好早到好唔好?最多以後以後都唔再去街市喇!媽咪從來都未去過任何展覽㗎!之前一直都冇氣出街,本來諗住噚日一次過幫你準備好所有嘅嘢,遲啲就遲啲你都唔好咁早吖!」

採訪:小米



■梁政珏今年1月中結婚,婚後一個月就發現懷孕。



■梁政珏早前照超聲波進行產前檢查。



■榮升人妻後,梁政珏之前去街市買餸煮飯做賢妻。互聯網圖片

 



■梁政珏早前着三點式曬太陽。資料圖片



■梁政珏要留院,其愛犬就交由胞妹梁政欣暫代照顧。微博圖片

【醫生話】胎盤蓋子宮頸口最嚴重

懷孕27周的梁政珏有胎盤前置情況,前日因下體出血要入院,本報昨日向家庭醫生關嘉美諮詢意見,關醫生說:「胎盤前置即係胎盤喺子宮底部,前過BB嘅頭部,有0.5%人會患上呢種症狀,有機會喺懷孕32周前或後,喺冇痛同冇先兆情況下,陰道無故出血。」關醫生又透露症狀分為1至4期程度,而梁政珏的情況,就是最嚴重的第4期,整個胎盤蓋住子宮頸口,大量出血機會較高。

關醫生建議孕婦:「如果遇到下體不明流血,應該立即搵醫生求助,透過照超聲波檢查再處理。」至於病人是否需要長期卧床?關醫生則表示要視乎情況及懷孕周期,醫生會評估情況對母親和胎兒是否安全或會建議早產剖腹,亦有部份要卧床直至生B。

鍾意就快D Share啦!
Related Posts Plugin for WordPress, Blogger...