陳智燊20卡鑽戒私有化宋熙年
無綫藝人陳智燊（Jason）與前華姐冠軍宋熙年（Sarah）撻着多時，直至去年Sarah 29歲生日始公開戀情！今年Sarah生日前夕，Jason自製驚喜「人肉速遞」到澳洲，在女方父母面前下跪求婚，令Sarah感動得含淚答應，並大晒「20卡」閃爆婚戒，在30歲生日前夕宣布「封盤」，至於Jason自爆計劃生夠四個！
陳智燊（Jason）近年獲力捧劇接劇忙個不停，但仍不時與女友宋熙年（Sarah）出雙入對，高調晒恩愛。Jason得知Sarah將回澳洲為宋父慶祝生日，正忙拍新劇《愛情食物鏈》的他，特地向監製徐正康請假，秘密早機去晚機返飛往澳洲炮製「求婚驚喜」！
癡癡地等「（火羅）爆」
Jason回憶這短短半天的行程時笑說：「知道熙年一定會去某間餐廳同爸爸慶祝生日，於是早佢一班機去到餐廳門口等佢，拎住紮花喺門口等。（唔同佢家人夾定？）本身都想同佢妹妹夾，但驚夾唔到好尷尬，自己企門口等畀佢驚喜。」當Jason在正門癡癡地等時，未料Sarah卻從停車場直上餐廳，撞破他的求婚妙計：「佢哋入到餐廳見到我企喺門口，佢爸爸仲話：『嗰個咪係Jason？』真係超尷尬！」愛郎突然現身，Sarah又驚又喜，步出餐廳時Jason即送上鮮花並跪地拿出鑽戒向她求婚！
Jason坦言求婚過程緊張：「緊張過拍嘢，好唔流暢咁將心底話講晒出嚟，人哋成日話求婚好浪漫，估唔到自己做時會超級緊張。（點解揀呢個日子求婚？）當住佢爸爸媽媽面前有意思啲，當完成晒之後好似發緊夢咁，好唔真實，嗰日一切都好趕、好快。」
難忘的生日禮物
已返港的Sarah被男友突然現身求婚，直認驚喜：「因為Jason忙於拍劇，所以我一個人去悉尼同屋企人慶祝，點知佢早有安排，瞞晒所有人，非常細心，好感動！呢個生日十分難忘！（滿意呢份生日禮物？）其實呢份係爸爸嘅生日禮物，求婚當日係爸爸生日，對佢來說是一份好大的驚喜！（宋爸爸對未來女婿有咩評語？）佢當日笑到見牙唔見眼，應該幾滿意。（求婚戒指有幾卡？）哈哈！二十個卡，因為我笑到卡卡卡……。」
婚後計劃生四個
另外，Jason昨晚春風滿面的現身《愛情食物鏈》煞科飯局，問到鑽戒卡數時Jason笑言：「咁佢都收貨，當然唔會太細，戒指係我設計，佢比較粗心大意，所以用六爪設計，幾個月嚟我去咗幾次珠寶店，因為隻戒指有啲鬆要去多次。（幾時拉埋天窗？）我要儲錢擺酒，慢慢嚟啦，要按部就班！但自己都計劃兩年內，想打鐵趁熱。（趕生B？）我都鍾意小朋友嘅，如果Sarah肯，能力範圍內想生四個。」
文：影視組
|
鍾意就快D Share啦！
|
|
|
