掃呢頁CODE去手機

2015年9月30日 星期三

變臉 瘦 20磅面尖晒 唔介意話整容 裕美:覺自己靚咗好多! [FACE - 436] 裕美,整容,MF,



有人將裕美 V煞相放上討論區,網友紛紛留這話唔認得,知道原來係裕美之後都認定佢整過容。

真面目

變臉 瘦 20磅面尖晒 唔介意話整容 裕美:覺自己靚咗好多!

奇蹟往往不知不覺中發生,裕美多年來都係包包圓碌碌,最近竟然變咗 V煞面兼靚晒,好多網友都話唔認得呢位裕美 2.0,究竟世間真係有奇蹟?定係加工人造人?裕美自己最清楚。

裕美週一( 28日)出嚟自爆真相,表示唔介意俾人話整容,不過堅持自己冇整過,仲帶埋修身教練,證明做運動減肥瘦咗廿磅。睇落瘦咗又健康嘅裕美更好自豪咁講:「我都好滿意自己,自信心返晒嚟!」

27歲裕美一直都係 pizza面,入行行可愛 feel, 13年跟圈外人林浩恩結婚後已甚少娛圈工作,只間中做吓主持同出吓活動;但最近有網友發現裕美 ig的相片面形大改變,包包面變 V煞面,眼大咗、鼻高咗,變咗另一個人,整容之說即時傳開,裕美當然唔認,強調自己瘦咗 20磅所以連面都瘦埋。

P變 V

一直都係 pizza包包面嘅裕美走可愛路線,𠵱家變成索女,佢就話:「以前行可愛啫,𠵱家咁嘅樣梗係乜都試下」所以嚟緊會再唱歌同拍劇。

堅稱冇整容嘅裕美下巴尖咗,面部輪廓都出晒嚟。

堅稱冇改造

週一( 28日)《 FACE》為求真相約埋裕美面對面睇清楚,裕美比起兩年前確係纖瘦咗,超級 V煞面、大眼睛頗省鏡,裕美好無奈話:「其實我唔介意俾人話整容,就算點講都會有人質疑你,咁冇得拗!我話你知,整容嘅人個鼻一定好直好似間尺咁,我一定唔係直。」

佢跟住解釋:「以前我胸椎後面歪咗,成日頭痛頸痛,於是搵咗伸展治療師嚟醫,之後開始鍛練拉筋同 build up番啲肌肉至唔再痛。」她續說:「 keep住做啲利用身體重量嘅訓練動作,去修腹肌,教練又教我跑步,日日由星光大道跑到黃埔再跑番轉頭都成 7K(公里),本來冇諗過會瘦面,但跑完塊面好紅好㷫,教練就話咁代表塊面會瘦,消耗水腫同脂肪,我就 keep住跑;做咗一年多啲運動瘦咗 20磅,𠵱家一百多啲啲我覺得做運動係會上癮!」

裕美請埋教練 Rico嚟示範減肥運動, Rico稱裕美主要靠做反地心吸力的動作嚟修腰。

唔好睇小呢個動作,裕美做時要不停調節呼吸,做 30秒就要休息一陣,每日做至得到呢一身身材。

本來為咗健康而跑步,成為習慣後至知連面都尖埋,裕美強調唔係靠整容㗎!

𠵱家嘅裕美唔單只 V面,長腿加埋 S身形,話佢係 model都有人信,裕美亦話娛圈工作其實冇停過,嚟緊 10月仲會返大台拍攝李添勝監製嘅賀歲劇,有機會同視帝黎耀祥合作,「之前返去見添哥,佢話認得我呀!但佢冇講係咪因為我瘦咗至搵我喎!」套劇出街會唔會以為你係林夏薇㗎?

前年嫁林浩恩時,裕美仲係包包面,上年狂做運動後至開始瘦,佢話𠵱家仲 fit過老公。 網上圖片

裕美曾得到陳百祥寵愛收做契女,但婚後冇見過面,阿叻仲認唔認得契女呢?

唔見一排變埋樣

女星整容有乜出奇?之但係整咗都例牌唔認啦,又或者真係冇整過又點認?過往都幾多女星失蹤一排之後唔同咗樣,有冇加工真係自己諗。

傅穎

傅穎自從專注內地發展後,幾乎每次現身都有新驚喜帶畀大家,唔知係 4.0定 5.0,但肯定陸續有 6、 7.0嘅傅穎出現。

楊秀惠

出身於馬來西亞嘅楊秀惠入行時係包包面, 09同 11年都曾因突然 V煞面而被傳打 botox及整容,甚至打 botox失敗歪面,但楊秀惠一一否認,解釋只係瘦咗同埋化妝效果。

採訪、撰文:娛樂組

攝影:林景迅

鳴謝: KINETIC STRETCH

鍾意就快D Share啦!