曾經喺11年前參加《殘酷一叮》、俾李克勤稱呼為莫生嘅莫凱謙，唔經唔覺，佢今年已經18歲，近排仲拍咗一首自彈自唱嘅MV《今天只做一件事》擺咗上網，即刻惹嚟唔少網民討論。莫凱謙噚日接受《蘋果》訪問，原來今年9月會喺中大升讀二年級，主修新聞與傳播，喺年初參加咗《全港十二大大學大專聯校歌唱及創作大賽iMusiciDolContest2016》，令到佢簽咗新公司準備入樂壇：「音樂對我嚟講係好重要，有得去嘗試 ...
曾經喺11年前參加《殘酷一叮》、俾李克勤稱呼為莫生嘅莫凱謙，唔經唔覺，佢今年已經18歲，近排仲拍咗一首自彈自唱嘅MV《今天只做一件事》擺咗上網，即刻惹嚟唔少網民討論。莫凱謙噚日接受《蘋果》訪問，原來今年9月會喺中大升讀二年級，主修新聞與傳播，喺年初參加咗《全港十二大大學大專聯校歌唱及創作大賽 iMusic iDol Contest 2016》，令到佢簽咗新公司準備入樂壇：「音樂對我嚟講係好重要，有得去嘗試呢樣嘢，我會覺得好開心，我同公司都有共識，o依家會學業行先，爹哋媽咪都好支持，仲喺側邊同我一齊分析，睇吓有乜嘢可以去做得更好。」其實當年參加完《殘酷》之後，謙謙都曾經參加過唔少比賽，本來佢一直覺得唱歌最緊要唱啱啲音就得，但係參加完音樂劇演出之後，情況就有改變。佢話：「做咗音樂劇之後，我覺得唱歌要有感情，每首歌都有佢故事，打動到先自己可以唱得更好。」堅係鍾意唱歌嘅謙謙，原來喺屋企間房已經有一套錄音系統，所以呢首歌係佢喺屋企自己一手一腳去做，到拍MV先搵公司幫手：「其實我覺得自己仲有好多進空間，呢幾年都有KEEP住去寫歌，大約有50首作品，嗰陣係為興趣，冇諗過咁長遠嘅嘢，不過我覺得好多嘢要慢慢嚟，所以我只係會繼續keep住做，出碟呢啲嘢慢慢做。」但係o依家市道唔好，會唔會預咗條路難行？謙謙話：「絕對會，明白香港市道唔易行，只係希望盡自己一份力，可以令呢個樂壇有更加多嘅色彩同力量。」除咗市道唔好之外，網民啲意見亦都好直接，謙謙話：「我知道會有呢啲聲音，我自己都預咗，講得啱會聽，就算唔啱聽亦都會接受。」查實謙謙個樣一直都冇乜點變，只係身型大隻咗好多，如果真係入行，似乎要執一執，佢話：「呢個再要努力，可能我由細到大都鍾意食嘢，未有諗住入行，所以會有啲脹卜卜嘅感覺。」當年節目主持之一嘅克勤，仲讚佢：「有一定嘅天份同音樂感。」
細個扮晒嘢舉高手指，好多人仲記得。（資料圖片） 
《殘酷一叮》（資料圖片） 
近日自彈自唱嘅MV放上網。（莫凱謙facebook圖片） 
對音樂好有興趣，想操弗啲加入樂壇。（莫凱謙facebook圖片） 