熱爆娛樂: 豬肉佬求助工聯會　自編豬肉妹勵志故事 [壹週刊

2016年7月21日星期四

豬肉佬求助工聯會　自編豬肉妹勵志故事 [壹週刊 - 1376] __,M1,

九十後豬肉妹 Polly（右）「師承」另一豬肉妹許穎欣（左），後者父親係許偉堅，佢曾透露放棄升學為父入行操刀。（《蘋果日報》圖片）

眾人諸事

豬肉佬求助工聯會　自編豬肉妹勵志故事

過去幾日，一個九十後豬肉妹嘅故事進佔各大傳媒，年僅廿四歲嘅 Polly接受多間傳媒機構訪問，大談如何無懼濕漉漉工作環境同生肉味，走去挑戰自己報讀肉類分割技術員課程，受訓後再到肉檔實習咗三個月。原來，呢個勵志故事背後有段古。

許偉堅係香港豬肉行總商會理事長，上年年中搵工聯會王國興幫手，提出為「豬肉佬」正名，結果真係搞咗肉類分割技術員課程。

有留意開街市新聞嘅朋友向爆料，豬肉妹嘅老闆大有來頭，係香港豬肉行總商會理事長許偉堅，睇番 Polly啲報導，佢話師傅係許穎欣，都係一個豬肉妹，正正係許偉堅個女，都做過訪問，話自己放棄升學為父入行操刀。

其實上年年中，許偉堅專登搵過工聯會王國興幫手，話業界「刀手短缺」，於是約見勞福局局長張建宗，提出將「豬肉佬」正名，之後無耐，豬肉業界真係同僱員再培訓局開班搞課程，呢個時候 Polly喺許偉堅肉檔現身，仲唔係為行業自編自導嘅形象工程？

選管會陰招　搞着「雞珍」寶貝仔

立法會選舉上週六展開提名，提名前兩日選管會無啦啦整咗份「確認書」要參選人額外簽名，建制派話天經地義，但泛民暫時一齊企硬，非建制派中只得一個勇武派政黨有簽。有報咗名但冇簽確認書嘅參選人話，選舉主任要求佢兩日內補交，如果交唔到，將徵詢律政司意見，查明係咪符合參選資格。

其實，參選人係咪符合資格，法例上係同律政司完全無關，因為選管會早已委任法定嘅提名顧問委員會，俾選舉主任同參選人索取意見。名單上全部都係大狀，包括王正宇、陳浩淇、陳世傑、何炳堃、呂傑齡同鮑進龍，如果選舉主任真係搵律政司而唔搵呢班顧問委員會，即係冇依法辦事，最嚴重甚至令選舉無效。問題係，呢個提名顧問委員會執行職能設有時限，準候選人想徵求意見，原來要喺上週五或之前提交申請表，但選管會之前一日先公布確認書安排，咁想問意見都問唔切啦。

講開又講，其中一個被委任嘅大狀陳浩淇，係世衞總幹事「雞珍」陳馮富珍個寶貝仔，佢係行內頂尖大狀雲集嘅 Temple Chambers成員，呢間大行仲有前律政司長黃仁龍、「政府御用大狀」翟紹唐同上屆大律師公會主席石永泰等，選管會忽然出招，唔知會唔會令陳大狀好頭痕呢？

陳浩淇大律師（右）係世衞總幹事陳馮富珍個寶貝仔，選管會忽然整咗份極大爭議嘅「確認書」，唔知會唔會令佢工作量大增。《蘋果日報》圖片

陳馮富珍（左一）近年好少返港，大家通常都係喺電視度見到佢。

偲嫣 BB美圖靚過游蕙禎

李偲嫣競選團隊上星期喺上水擺直幡拎立法會提名，只見直幡上相中人面尖眼大，皮膚白滑，遠睇仲有啲似青年新政嘅游蕙禎，橫睇掂睇都唔似偲嫣 BB。李偲嫣可能驚人發現佢張相執得太厲害，見到真人會唔認得佢，當日冇落現場，選民無得比較。

睇真啲，偲嫣 BB張相靚過游蕙禎，淨係下巴都已經贏成條街。再對比埋其他參選人嘅宣傳相，蔣麗芸、梁美芬執得再靚都唔及李偲嫣。改圖改到選民認唔到候選人，咁算唔算作出虛假陳述呢？

選舉管理委員會發出嘅選舉活動指引，無列明參選人宣傳物品上張相有誤導成分，令選民以為係另一參選人屬唔屬違法。指引只係話，如果參選人無得他人同意，就拎人哋張相嚟用，誤導選民以為他人支持自己，咁先係違法。

直幡上嘅李偲嫣面尖尖，身形瘦，同真人完全係兩個人，仲被人話執到似游蕙禎。

青年新政九龍西總幹事游蕙禎嘅宣傳相同真人無大分別，相信都無乜執過相。

梁美芬曾暗示游蕙禎靠樣吸引選票，但又好重手執靚自己張選舉宣傳相。

確認書捉蟲　隨時累保皇黨犯法

其實，確認書本身有選擇性「守法」之嫌，只特別抽咗第一、十二同一百五十九（四）呢三條條文講，但《基本法》全文有成一百六十條，如果真係要「擁護」呢份小憲法先可以參選，恐怕爭議會繼續鬧大。

睇番有啲「愛港」參選人嘅主張，有人講明參選有通知中聯辦，但《基本法》白紙黑字寫明中央政府所屬各部門不得干預香港特區事務（二十二條），咁又點計數？《基本法》又列明立法會會議法定人數（七十五條），但建制派瘋狂反對點算人數，甚至有人提出取消點人，又算唔算係唔「擁護」《基本法》嘅表現？近年有建制派玩民粹，提出香港退出《禁止酷刑公約》，但公約從屬《公民權利和政治權利國際公約》之下，後者按《基本法》第三十九條適用於香港，咁咪即係當《基本法》無到？有關人士又算唔算作出咗虛假聲明呢？