2016年7月1日 星期五

為食妹妹1:河國榮帶為食妹妹遊西貢 Chill住食中西Tea __,河國榮,

真.西貢人河國榮帶我哋食盡中西正Tea!嚟到西貢呢個山明水秀嘅地方,為食妹妹忍唔住化身為「偽ABC遊客」,希望可以搵到「當地人」帶佢哋搵好嘢食!好彩,佢哋竟然遇到唔止係真.香港人,仲係真.西貢人嘅河國榮!曾經喺西貢住過嘅佢,除咗有一班街坊好友,仲有唔少心水餐廳,睇吓國榮帶我哋去搵咩好嘢食!第一站:CircleMuffin6月先新開張嘅CircleMuffin老闆原來係日本人YaraAsahiko先 ...


真.西貢人河國榮帶我哋食盡中西正Tea!

嚟到西貢呢個山明水秀嘅地方,為食妹妹忍唔住化身為「偽ABC遊客」,希望可以搵到「當地人」帶佢哋搵好嘢食!好彩,佢哋竟然遇到唔止係真.香港人,仲係真.西貢人嘅河國榮!曾經喺西貢住過嘅佢,除咗有一班街坊好友,仲有唔少心水餐廳,睇吓國榮帶我哋去搵咩好嘢食!

第一站:Circle Muffin

6月先新開張嘅Circle Muffin老闆原來係日本人Yara Asahiko先生。幾年前他因為經營酒店生意,帶埋太太Mayo由沖繩搬到香港。擁有一雙巧手嘅Mayo用自家研究嘅Recipe炮製美味Muffin,加上雪糕等不同配搭,希望將日本同西方結合的甜品風格帶入西貢!國榮甫入店內,竟然可以用流利的日本語同老闆打招呼!原來他在十多年前曾經學過日本語,仍然「寶刀未老」,語言天分甚高!他點了Caramel Coffee鬆餅加雲呢拿雪糕,為食妹妹就點了豬妹必Like嘅士多啤梨鬆餅。國榮食後大讚日本人整嘅鬆餅果然夠晒香軟,仲有好濃咖啡味。加上面頭的雪糕同中層的抹茶Cream,層次十足!

Circle Muffin

地址:西貢親民街西貢苑地下63號舖

食物:Berry2(連雪糕 HK$43)、Caramel Coffee(連雪糕 HK$43)

推介指數:4/5粒星

第二站:一起果醬let's Jam

由哥哥阿謙開嘅let's Jam得到全家總動員支持,將自製果醬入饌,創作出令人驚喜嘅菜式同特飲。店舖設計仲係自己包辦,令人恍如置身於台灣海鳥的茶座般舒適優閒!國榮飲咗一款非常特別的玫瑰蘋果梳打,由老闆妹妹Cherry親自泵入氣泡,視覺效果一流。身為真正外國人嘅國榮仲教我哋食Cream Tea Set:「鬆餅,英文我哋叫『Scone』,有果醬同埋有Cream。如果鬼佬地方食呢啲鬆餅同埋飲熱茶,就叫『Devonshire Tea』,而Devonshire係英國一個地方嚟!」咁國榮本身又喜唔喜歡食果醬呢?「其實果醬我都唔會點買,都係等我阿媽整或者自己整。因為以前我哋會喺生果季買一箱箱生果,有啲生果烚熟咗之後就擺喺樽度,可以Keep一、兩年,冬天可以攞出嚟配埋啲雪糕食都得。另外嘅生果就用嚟做果醬,特別在夏天!」

一起果醬let's Jam

地址:西貢市場街9號地下

食物:Cream Tea Set(HK$78)、凍蘋果玫瑰茶(HK$32)、凍玉桂蘋果茶(HK$32)

推介指數:5/5粒星

第三站:Chip In Fish & Chips

Chip In Fish & Chips由香港人Vicky所開,她在蘇格蘭生活超過十年,回港後對炸魚薯條念念不忘,所以開咗呢間主打正宗英式風味嘅小食店!國榮:「鬼佬不嬲都鍾意食炸嘢,鍾意食炸魚薯條。咁呢度就炸得好靚嘅。又脆又好食。另外呢,見你哋兩個咁後生,就梗係整啲甜嘢番嚟咁啊黑色呢個就是甜的。」哦!原來佢講緊「炸Oreo」!佢話一直都唔敢試,直到我哋「邀請」佢。原來食落又唔會太甜,香口得嚟又有少許曲奇味!

Chip In Fish & Chips

地址:西貢敬民街9號高勝樓地下11號舖

食物:炸魚薯條(HK$42)、炸Oreo(HK$12)

推介指數:3/5粒星

第四站:陶記茶餐廳

食正Tea梗係唔少得去茶記國榮帶咗我哋去佢主場陶記茶餐廳。原來佢同老闆梁先生仲係老友鬼鬼添。一入去,梁老闆已經不斷同國榮打牙骹!咁有咩係佢心水推介呢?國榮:「每次嚟我都會叫炸雞翼薯條加厚多士!」點解呢?「因為炸得啱啱好,好香脆。好,等攞我出武器先!」咩事呢?原來係胡椒粉?「其實我會擺定啲高級嘅白胡椒粉喺車度。」原來,河國榮無論去邊都會帶定支意大利出產嘅白胡椒粉乜乜乜,因為佢最怕餐廳提供的胡椒粉「有色無味」!

陶記茶餐廳

地址:西貢萬年街32號地下

食物:炸雞翼薯條(HK$33)

推介指數:3/5粒星

第五站:西貢咖啡餅店

點解行過街頭會聞到陣陣菠蘿包香味?因為呢間西貢咖啡餅店嘅麵包新鮮出爐,好多人都會特登入嚟食!國榮:「香港人食Tea嘅話就梗係食菠蘿油」「我都食咗好多年。但我係比一般人有少少唔同,我鍾意每一啖都有少少牛油,所以食嗰時會將佢分開,食一啖「菠蘿」包,割少少牛油擺入個口一齊食。咦,真正一啖「菠蘿」一啖「油」!唔知國榮啱啱嚟到香港嗰時有冇食過啲咩覺得接受唔到?「嗯,其實我唯一唔係好想食嘅係蛇。因為我覺得食到所謂嘅『幫助』係好少嘅,但條蛇又要死。所以我對啲蛇羹啊、蛇膽啊無興趣。其實我係鍾意蛇嘅。所以你見到我屋企養啲蛇都係好開心嘅。」哦,原來國榮係「阿蛇」Fans! 

西貢咖啡餅店

地址:西貢海傍廣場2號金寶閣6-7號舖地下

食物:菠蘿油(HK$15)

推介指數:3/5粒星

國榮同兩位為食妹妹食足成日,流晒大汗依然笑容滿面。沿路仲有大量街坊同佢打招呼,可見佢人緣甚佳,喺西貢可謂半個主場!不過聽到他說愛犬可能有需要做手術,甚感憂慮,為食妹妹都希望狗狗早日康復


來源 source: http://hk.on.cc
鍾意就快D Share啦!
Related Posts Plugin for WordPress, Blogger...