Quinn輕描淡寫說當初他辭職創業，在家中激起矛盾，全因父母反對他放棄月薪九萬元的好工。
壹盤生意
棄 9萬月薪 史丹福碩士砌錶月賺 10萬
訂造手機殼、上衣的本地品牌 Casetify、 Snaptee，生意遍布全球。去年尾廿八歲的黎鈞國（ Quinn）照辦煮碗，與三個拍檔合夥，將設計平台放在日本機械錶上，創立 Eoniq，半年間 facebook與 Instagram專頁中已經有超過十四萬 like，月賺十萬元。生意有成績，父母理應感安慰，但在他家人眼中卻是：「你唔為自己諗，都為下一代諗！做生意好大風險。」辭職創業的念頭，在家中激起千重浪，全因他之前月入九萬元。
Quinn會考後到海外升學，於史丹福大學機械工程碩士畢業後，先後於「顧問界的高盛」 McKinsey中任職顧問、跨國個人電腦生產商 HP中任產品經理，月薪九萬元，亦有大好前途，「我當時個直屬上司高我五級，中間有好多位俾我升，而且七年間做得好，一般可以跳出去做 VP（副總裁）。」薪高糧準，前途一片光明，父母難免極力反對他辭職，對他說：「咁辛苦栽培你，拮据嘅情況下都花幾百萬，送你去美國讀書，有學歷、有好工，你走去創業，咁係浪費晒我哋嘅心血！」但他堅持將他的興趣化成事業。往日花錢買錶拆，今日砌錶賣。客人在網上頁面選擇錶殼的顏色、錶面款式、錶面圖案、指針粗幼等項目。他每天重複將錶肉放入錶殼，再放入刻上客人設計的錶面，裝上時分秒針，最後蓋上玻璃罩。
三招 facebook宣傳
一個新品牌，賣二百多美元一隻錶，並且能夠每月賣近三百隻，成功在於 Quinn識玩社交媒體。至今半年間， facebook與 Instagram兩個社交媒體均有十四萬 followers，最初他什麼方法都用，「 follow其他品牌嘅 follower、送錶俾ＫＯＬ（網絡紅人），不過大牌子成本低，派十隻返一隻都有賺，我哋做唔到。」
試過不同方法，還是賣廣告生意增長快，很多網店指 facebook賣廣告成效逐漸減低， Quinn直指：「只係香港社交媒體 marketing太廢，我搵過幾間公司，差唔多要我教番佢哋做。」 Quinn有三大策略玩 facebook。
第一：唔好 hard sell。「你目標係要俾好嘢人睇，多人睇自然有人買嘢，唔好不停叫人買錶。 post內容夠唔夠好，你睇吓幾多人 tag朋友就知。」
第二：文青風。「返完工咁辛苦，都係想輕鬆吓。隻錶大特寫好悶，我發現最吸引人睇，係在錶旁邊加杯咖啡，背景白雪雪，有時加啲乾花，感覺好 lifestyle。」
第三： tag得夠細。「同樣係年輕情侶、未來一個月周年紀念或者生日、有上亞馬遜網購，分別 tag鍾意錶同手作嘢，結果可以好唔同。你好難估邊個會有反應，要 tag細啲，多試不同 tag。」
成功吸 like之餘，亦吸到金， Quinn說他每月都用十多萬賣廣告，「因為有成效，平均用三十蚊美金，就有一個人買錶。」現時生意兩成香港，八成海外，而其中大部分是東南亞國家。成功俘虜他們， Quinn認為是他擊中當地人的消費習慣，「我有朋友喺印尼，佢話大部分富起來嘅人，因為經歷過貧窮，心底裡覺得要節儉，所以比較少買貴嘢，但其實佢哋買買吓中價貨都使唔少錢。」
用日本錶減退貨
Quinn自中學開始拆錶研究，拆過百多隻錶，再重新組合。他運用以前拆錶的經驗，分別拆開日本與大陸錶肉仔細研究，外表較平凡的日本錶肉，在防震方面贏九條街，「大陸嘢一跌，個軸就彎甚至斷。日本錶肉唔單止軸唔彎，佢個齒輪鬆鬆哋，我用手郁佢都識彈番轉頭，一般震盪唔會影響到時間。」
因 Quinn貪平買過一批大陸錶肉，大部分送出去都「打回頭」，「大陸錶肉一百蚊，日本起碼二百。大陸錶肉平得嚟打磨又靚，好多客都唔揀日本貨，要大陸貨。但原來得個樣，一跌就壞。」他測試過兩批錶肉，用泡泡膠紙包着錶掉到地上，結果唔使講都知，「大陸貨跌一兩次就壞，日本貨我用力掉，錶帶螺絲都斷埋都無事。」
轉用日本貨後，「打回頭」的次數大減八成，少於一成會退貨。但同日本人做生意一向麻煩，「佢個貨期要九個月先有，我無可能等到，亦估唔到九個月後賣幾多。撞啱近排市道唔好，好多賣錶公司之前買多咗錶肉，依家放番出嚟。」日後零售市道回暖，向賣錶公司買錶肉的成本或會增加。
Custom錶是雙刃劍
作為初創企業， Quinn還有一堆問題要解決，最大特色，亦是最大弊病，是要客人設計，「客人無信心自己設計得靚。」 Quinn眉頭一皺，「唉！因為我哋啲錶千幾蚊，唔似一件衫幾百蚊！如果出嚟唔靚好嘥錢。而且香港人太忙，無時間慢慢設計，所以一般外地訂單設計得比較靚。」創意真的不是每個人都有，所以 Quinn預先設計一批錶面，「對自己有信心嘅，佢可以選由零開始自己設計；無信心嘅，佢可以由四十款設計揀心水款式，再改動成自己鍾意嘅。」
另一困難是要做獨一無二的手錶，等一個月時間， Quinn道出困難並非工序多，「要儲單呀！錶面設計我交俾廠做，但佢唔接太細訂單，所以要等夠單先送去。如果我單量夠大唔使等，一個星期就可以交到貨啦。」
生意上的困難未解決，幸好家人的矛盾已化解，「我送咗隻自己設計嘅錶俾爸爸，佢收到好感動。錢係賺得比以前少，不過佢依家都支持我，間中會同我傾吓生意有咩地方可以改善。」
開業資料（ 10/15）
租金 $4,000
入貨、網頁設計 $936,000
儀器 $50,000
雜費 $10,000
總投資 $1,000,000
營業資料（ 06/16）
營業額 $500,000
人工*、入貨 $385,000
租金 $15,000
盈利 $100,000
* 7個全職員工
撰文：孫樂祈
攝影：鄭樹清
攝錄：廖健昌
ed_bn@nextdigital.com.hk
|
鍾意就快D Share啦！
|
|
|
