香香會着比堅尼去沙灘曬太陽㗎，撞唔撞到就睇運氣喇！
藝人岑麗香（香香）出席腕錶品牌概念店揭幕酒會，身穿白色連衣裙亮相的她，輕晒事業線，她表示近來天氣較熱，問到可否再性感多點？她笑說：「今日都幾多啦，性感啲就留番去沙灘玩同去游水先，我又唔係走性感路線。（敢喺香港游水？）都有喺香港嘅泳池游水。（有冇被人偷影？）以我所知冇，如果怕會着one piece、有時會着埋短褲仔、背心仔。（着咁多！）夏天會同朋友去沙灘曬太陽，就會多啲時間着比堅尼。（着畀男友睇？）唔係，比堅尼係着畀自己睇，暫時都冇同男友去過沙灘，未有機會，之前見面都係凍啲嘅天氣。（即係好耐冇見？）我哋或者會做其他活動，踩單車、食飯，健康嘢。」
同男友着情侶裝畀人笑
問到會否送手錶給男友？香香表示要在一個值得紀念的日子才會送錶：「我覺得錶唔係隨便送，除咗送畀屋企人，不過我都希望有一日會有情侶錶，依家未有，有時行街見到啲夫婦戴情侶錶、或者着情侶裝覺得好sweet，但唔係個個男仔都接受着情侶裝，但錶就高貴啲。（男友介唔介意着？）朋友會笑我哋，亞洲、香港、韓國都好興，我都覺得得意，自己接受，但喺美國、加拿大，朋友會笑我哋，就算着都要睇咩地方先着得。（即係試過着？）就算襯色着白色T-shirt牛仔褲都會被人笑，試過啦，外國人冇咁接受，但錶就低調啲，又有嗰個意思，唔會被人笑，感覺舒服啲。」
來源 source: http://hk.on.cc
|
鍾意就快D Share啦！
|
|
|
