祝福一對新人白頭到老！
台灣女星林心如與型男霍建華今日喺峇里大婚，一對新人為保持低調，即使有車輛喺酒店出入，都會有保安同警犬上前查問，以確保冇記者混入婚禮之中。
新人曝光 心如火紅裙褂搶鏡
至於一對新人，佢哋一直留喺酒店入面，仲未正式與傳媒見面，不過新郎霍建華同伴郎嘅最新合照終於曝光！相中見佢西裝骨骨，gel起頭髮，非常醒神，一身黑色西裝造型非常簡單。至於新娘林心如，被爆搞到凌晨三點先瞓，就喺社交網上載咗幾張着住中式褂嘅相，雖然一直盛傳佢有身孕，不過相中見佢甜到漏嘅笑容，加上火辣紅裙，狀態大勇。當中佢仲拉埋好姊妹舒淇同劉濤合照，其中一張心如拎住「囍」字紙杯嘅相，唔覺意就晒出佢手上嘅大大粒紅寶石戒指。
姊妹放相 爆心如感動落淚
好友劉濤及舒淇亦有上載今朝迎娶儀式嘅相，當中仲見到心如手拎紙巾，雖然只見到佢個側面，不過都睇到佢個鼻哥喊到紅晒，可想而知今朝係有幾感動！
利是有玄機 紀念2005年相遇
另外，一對新人亦有向現場傳媒派利是，利是封上就印有「WR」字樣，即林心如及霍建華英文名嘅第一個英文字母，據知利是個餡有人民幣六百六十元，而全部紙幣都係2005年印刷，代表二人喺2005年認識對方，真係浪漫到爆！
來源 source: http://hk.on.cc
|
鍾意就快D Share啦！
|
|
|
