娛樂偵訊
圓方孖公仔 唐文龍黐大隻男友 頭貼頭買餸
去年接拍電影版《十月初五的月光》，唐文龍再做「金勝」回歸香港， 46歲依然單身，操到爆晒肌的他近年出入身邊同性朋友居多，跟劉家良侄兒劉永健，更加行得埋。
日前，二人又著住同款軍靴孖咇行超市買餸，兩個肌男有默契地頭貼頭揀壽司，手黐手睇碟，其間劉永健更對著小白 tee騷大胸的唐文龍多次掃背搭膊，巧親密。
刪走孖男友歐遊照
被薛家燕踢爆十五年前追佘詩曼失敗的唐文龍，出道以來，罕有承認的女友包括已是人母的陳少霞，九九年分手後，唐文龍曾跟關心妍及同居空姐女友有過一段情，對於感情生活，堅低調。
兩年前，唐文龍接受訪問時，突然自爆有個拍拖超過十年的女友，但因北上發展，試過九個月冇工開又要供樓，唔想拖累對方而提出分手。
身邊異性買少見少，但唔係緊身衫唔著的唐文龍並不寂寞，去年便 po過多張跟男性友人歐遊照，在微博開心些牙，但密遊照最近已離奇刪相，身邊密友換成劉永健，同以四個骨運動褲襯啡色短皮靴，「情侶裝」打扮行圓方；二人先去 hmv睇碟，揀完行去櫃枱俾錢，全程黐到實。
黐住買餸
之後上露天平台歎下午茶，唔想糟塌一副 body，唐文龍跟同樣渾身是肌的劉永健只飲不吃，兩個大隻男啜凍檸茶，玩吓交換電話，吹風吹水個半鐘，由唐文龍找數，劉永健完全冇反應，似乎早已習慣。
離開時，劉永健更一度搭住唐文龍膊頭，兩人落番商場去超市買餸，手貼手，膊貼膊，毫無顧忌黐住行。
「 Michael（唐文龍）同劉永健拍《十月初五》時做同父異母兄弟，加上都鍾意功夫，所以 friend到而家。兩個喺內地撈咗十年有多，劉永健仲早過 Michael兩年返內地，大家互相照顧，所以好啱傾。」知情者說。
公然掃背搭膊
隔一陣，二人又再黐番埋，劉永健發辦買 parma ham，唐文龍做背後男人，只用眼神俾反應，有晒默契，買完火腿，再轉去刺身凍櫃，頭貼頭揀完壽司，繼續由唐文龍俾錢。
只見唔出錢只出力的劉永健，左手拎嘢，右手更唔得閒，沿途行去攞車，他不是輕掃唐文龍肉背，就是搭住對方膊頭，親密到呢。
老豆是已故一代功夫大師劉家良胞弟劉家榮，自小習洪拳的劉永健九六年加入大台，雖然外表高大又有功夫底，不過發展平平。
「其實 Michael真係 care劉永健，早排佢同洪天明、曹永廉一齊開 online shop賣嘢，都叫啲兄弟預埋劉永健一份。」知情者說。
愛女期
收收埋埋的唐文龍，甚少公開戀情，一身肌肉的他專吼細細粒及身材豐滿類型，圈內圈外不拘。
14年 羅子喬
44歲唐文龍約 DaDa（陳靜）的 34F師妹羅子喬（ Bella）去圓方睇戲，被記者撞破立即彈開，女方則傻笑任影。
估你唔到唱歌出身
94年入行的唐文龍，於圈內浮沉 22年，最令人印象深刻的是 00年大台劇集《十月初五的月光》演金勝一角。但唔講唔知，原來唐文龍是參加 94年的新秀歌唱比賽入行，先做歌手再做演員。
出過唱片
94年，出同名專輯《唐文龍》， 95年及 96年在台灣出過三隻國語唱片。
撰文、攝影、攝錄：娛樂組
|
鍾意就快D Share啦！
|
|
|
