2017年6月9日 星期五

張家輝手揸1.3億豪宅照捱飯盒! __,家輝,張家輝,

張家輝曾經講過:「你依家冇,但係將來會有!」香港樓價再創新癲,癲咗個癲!繼4月錄得香港整體樓價比1997年高峰期高89%嘅紀錄後,上月再錄得有班人喺紅 ...


張家輝曾經講過:「你依家冇,但係將來會有!」

香港樓價再創新癲,癲咗個癲!繼4月錄得香港整體樓價比1997年高峰期高89%嘅紀錄後,上月再錄得有班人喺紅磡好似排隊搭隧巴過海咁排隊買樓!正如影帝張家輝話齋:「幾時係買樓時機?你買得起嘅時候,就係買樓時機!」

輕鬆拎幾千萬首期

結果佢上個月都唔執輸,用1.31億港元買入中半山嘉慧園自住,以按揭上限五成計,單係首期都要畀6,550萬,另加雜費,好似首置物業印花稅、代理佣,加加埋埋,大約要先拎7,200萬出嚟,唔通成副身家得1億咩?保守估計佢身家至少都有3億!難怪傳聞話張家輝片酬由人民幣1,200萬加到2,000萬,否則,佢自己都通過唔到自己嘅壓力測試!

雖然張家輝身價今時唔同往日,但最近竟然畀人發現佢喺跑馬地匿喺七人車入面「隊」飯盒!Nuts哥有啲Friend話家輝係咪真係敬業得咁緊要?唔使開工都當正自己拍緊戲,放飯匿喺車度開飯?有啲就擔心家輝唔知係咪當年拍《紅河》抑鬱症復發,性格變得愈來愈孤僻。其實家輝講過:「喂!打拳都有排食啦?唔食!我就去驅魔!」咁易被你估到,就唔係張家輝!

呢個時世,有邊個食唔起米芝蓮啫!但你去同張家輝去嘅唔同之處,就係你唔會畀人「集郵」,相機食先已經夠煩,何況畀人當係食物係咁影影影影影?況且依家啲人單純「集郵」已經唔夠佢哋去呃Like,圈中有頭有面嘅人,好體會到方中信畀人當救生圈死命咁攬嘅苦處!

紅咗嘅張家輝,人人當佢係寶,試問有邊個會估到當年其貌不揚嘅亞視二打六,今日會名利雙收,連億元豪宅業主都做埋,就算睇住佢由專門負責插科打諢嘅「化骨龍」,過度到沉默寡言嘅七料影帝殺手「洪荊」,之後突然變身爆肌「賤輝」,話口未完,明明話怕鬼,佢又走去做導演執導鬼片,都唔係人人睇得出家輝最值得人敬佩嗰樣嘢,就係「凡事搏盡,突破自己!」喂,唔搏點買樓?點樣十年內由西貢村屋搬到上半山?點樣令老婆關詠荷幸福?點樣令囡囡張童可以有最好嘅生活條件,唔使好似自己細個咁捱苦?

佢以前冇 但依家有

雖然當年Nuts哥有次去九龍城探羅嘉良《迷離檔案》班,見到嗰陣啱啱過檔無綫嘅張家輝喺現場做咗幾場戲之後,不禁當面讚咗佢幾句,不過講到最有先見之明,都唔及關詠荷咁有慧眼!事關當年已經係亞視一姐嘅關詠荷,晨早揀咗嗰陣仲係名不經傳嘅張家輝嚟拍拖,仲要後來兩個嗌交,家輝粒聲唔出玩失蹤,話去南非「尋找人生新方向」,幫叔父處理遺產、打理餐館,淨係留低隻狗「金仔」畀佢,關詠荷一樣死心塌地,邊等邊照顧金仔,直到家輝大半年後因為家姐患癌返港,見到關詠荷冇見異思遷,仲將金仔照顧周到,就大為感動,決定用餘生好好呵護呢個女人!

相比Nuts哥只係美言幾句,當家花旦關詠荷,唔只瞓身力撐,仲將終身幸福All-in家輝「大晒冷」,我Nuts哥都真心寫個「服」字!關詠荷夠盡,張家輝好似完全唔驚關詠荷會被人撬走咁,亦都夠晒絕!家輝當年有句經典廣告對白:「你依家冇,但係將來會有!」Nuts哥依家諗番,終於醒晒!好明顯,講呢句嘢嗰個其實就係關詠荷,唔通你以為係Nuts哥咩?


來源 source: http://hk.on.cc
鍾意就快D Share啦!
Related Posts Plugin for WordPress, Blogger...