2017年10月26日 星期四

謝寧被貶叫「燦妹」 霑叔代出頭鬧人 [壹週刊 - 1442] __,謝寧,M1,

繞場壹週謝寧被貶叫「燦妹」 霑叔代出頭鬧人85年港姐冠軍謝寧是第一位在內地出世的港姐冠軍,礙於背景,參選時被傳媒冠以「燦妹」稱號,當時引起已故的霑叔( ...






繞場壹週

謝寧被貶叫「燦妹」 霑叔代出頭鬧人

85年港姐冠軍謝寧是第一位在內地出世的港姐冠軍,礙於背景,參選時被傳媒冠以「燦妹」稱號,當時引起已故的霑叔(黃霑)注意,代筆公開抱不平。至於近年重投娛樂圈的向海嵐,當日踏上選美之路,原來同前一屆,即 97年冠軍翁嘉穗成功當選有莫大關係!

唔識霑叔

九七回歸後,國產港姐經常都會出現,相比之下七八十年代卻極之罕見。參加八五年港姐的謝寧,是首位國內出生的港姐,當年受她的背景影響,不單被睇低一線,也被惡意抨擊,聽吓謝寧點講。





今集《繞場壹週》葉 Fun邀請了分屬好友港姐:九八年向海嵐及八五年的謝寧做嘉賓。兩人背景相若,除了是冠軍級人馬也是海外佳麗。





國內出世令謝寧參選期間備受抨擊,但最終仍以大熱姿態勝出。





與霑叔毫無交往的謝寧,獲對方代筆撰文出頭抱不平。

葉:我知道謝寧背景有少少特別,你係第一個在國內出世嚟參選嘅女仔!

謝:當時香港人有種陰謀論,話九七就嚟到,係咪想搵一個內地出世嘅女仔當選,當然呢個完全無根據,係咁啱我唔喺香港出世,但我喺香港讀書。

葉:我見你參選時廣東話都好字正腔圓。

謝:我係廣州人嘛,同埋我嚟香港讀中學,小學六年班嚟香港,都係喺香港讀書大。

向:我記得喺我個年代參選要香港出世。

謝:唔係,係要攞到香港永久(居民)身份證。

葉:當時傳媒都有啲報導,攻擊你呢點?

謝:當時係有攻擊,我其實唔係好理呢啲嘢,但好笑,黃霑喺報紙鬧呢啲人,話你哋邊個父母唔係喺內地落嚟,你哋憑乜嘢話人哋,總之就係寫咗篇文幫我出頭,霑叔真係好好,佢話喺香港上咗年紀嘅,有邊個唔係喺內地落嚟,大部分都喺內地落嚟,點解你哋要咁樣講嘢,總之就係鬧佢哋,嗰時唔識佢,我話:『霑叔多謝你!』嗰個年代係對內地嚟嘅人有少少偏見,亦可能真係有啲從內地嘅人做得唔好,令香港人唔鍾意佢哋,嗰時稱呼佢哋做「阿燦」,以前都有人叫我「燦妹」,我又 OK,無乜理佢哋!

確定冇黑幕先參選





近日回歸幕前的向海嵐剛完成音樂劇《我和春天有個秘密》。

至於向海嵐當年參選是以海外佳麗身份,海外佳麗會唔會比較着數?

向:我喺溫哥華報名,我報嗰年係九八年,九七年嘅翁嘉穗係我加拿大嘅大學同學,佢去選我哋都唔知,係之後至發現,所以呢個都係其中一個原因令我有勇氣去選,因為以前真係會覺得港姐實有黑幕,實要有後台,或者要識得電視台啲人,咁我真係識得翁嘉穗,知道無啦,然後身旁同學朋友都慫恿我參加。嗰時唔識化妝,咩都唔識,但身邊朋友又幫手化妝,又幫手搵衫,就去咗報名。

葉:雖然話無後台,但入選之後都因為你嘅姓氏而俾人覺得你係有後台。

向:其實係一個好大嘅誤會,真係唔識嘅,但都因為呢個名令到好多觀眾會記得我,因為我個姓氏,包括海嵐兩個字,大家都覺得好唔同,或者好特別,所以會容易記。







一度因為姓氏惹人誤會有背景的向海嵐,最終大熱勝出,成為九八年四料港姐冠軍。





見證翁嘉穗成為冠軍,與她分屬同學的向海嵐確信無黑幕才敢遞表參選港姐。

撰文:娛樂組

攝影:蕭敬漁

攝錄:葉志明、羅錦波

葉 Fun化妝: Candice Li

場地提供: Fang Fang, 8/F LKF Tower


鍾意就快D Share啦!
Related Posts Plugin for WordPress, Blogger...