娛樂圈最怕撞色、撞衫、撞樣。不過，在香港名人紅星中就有三個何嘉麗，一個打得，是劍擊運動員、一個talk得兼唱得，是電台著名DJ及歌手、另一位最演得，曾是無綫小花，她們三個在各自的領域內各領風騷，今次在《蘋果》安排下世紀聚首，見面時省卻自我介紹，因為大家都知道彼此叫何嘉麗。
採訪：戴彩煥
攝影：仇志德
相關新聞：被韋家輝睇中拍《義不容情》
何嘉麗相約見面，三個人氣質不同、樣貌也不同，但原來經常被人搞錯，其中包括跟DJ何嘉麗多年同事車淑梅。劍擊運動員何嘉麗說：「有一次淑梅姐打畀我，同我講做facial啲嘢，我話唔好意思，我係劍擊個何嘉麗，佢話係搵電台個何嘉麗。」演員何嘉麗獲邀登台也曾被認錯，「人哋請我唱歌，我話：『畀咁多錢我？我都係掹車邊嘅演員嚟啫！』佢話原來想搵電台個何嘉麗。」演員何嘉麗笑言曾將頭髮剪短，也被認錯是DJ何嘉麗。「我去做嘢，都有團體將你嘅碟攞嚟叫我簽名。因為你影嗰啲封面通常都係影側面。」DJ何嘉麗呢？「我朋友將維基畀我睇，講何嘉麗曾經係DJ、做過歌手又做過電視演員，好似我乜嘢都係。」
| | |
同擁花名儍瓜麗
朋友見到劍擊手何嘉麗，會以英文名Connie稱呼，演員何嘉麗家人則會叫她嘉嘉，至於DJ何嘉麗透露初入電台時，同事會叫她英文名Susanne：「後尾做節目，啱啱Queen有首歌叫《Radio Ga Ga》，嗰時開始就叫我嘉嘉喇。」三位何嘉麗其實頗有緣，都是60後、都是80年代出道。DJ何嘉麗說：「其實你哋鍾唔鍾意呢個名？」Connie：「我鍾意喎，媽咪話改呢個名係希望屋企多樣美麗嘅嘢。」演員嘉嘉：「以前唔係好鍾意，因為同學笑我做儍瓜麗。」一講「儍瓜麗」，三個人最有共鳴，因為都曾經有此花名，而這個花名，DJ嘉嘉說是因她而起：「係因為我做緊電台節目《三個小神仙》嗰時，林敏驄一見到我就叫儍瓜麗，唔好意思，對唔住兩位。」
相關新聞：【蘋聞重溫】兩個黎明紅遍東南亞
在各自領域揚名
三個何嘉麗各有成就，Connie是香港一代劍后，曾奪亞錦賽銀牌和亞運銅牌，更有「體壇周慧敏」之稱，經常獲邀拍廣告，2002年她退役後仍有參加比賽，前年她出戰第三屆亞洲大師劍擊賽，於女子重劍團體賽奪得銀牌。Connie談到自己運動員經歷時說：「我1986年開始學劍擊，參加暑期班，後尾贏咗個比賽之後就開始長期訓練，我唔係全職，有自己工作，要成日面對好多唔開心嘅嘢，譬如受傷。」
演員嘉嘉1986年參選無綫電視小姐入行，當過《我係黃飛鴻》等劇集女主角，她表示演員一樣易受傷：「拍戲係情緒上受傷。我出道做反派、搶人男朋友角色。嗰時情緒波動好大，心理上影響得好緊要，都係一個受傷嚟。後期我移民去加拿大做廣播，發覺DJ係叫易做啲，𠵱家返嚟香港就喺網上做一啲宗教廣播。」
DJ嘉嘉轉職公關
DJ嘉嘉就認為DJ工作並不簡單：「我哋做DJ年代唔係淨係播音，好多時都要出去做騷、做MC，其實都好辛苦，要搭台後先可以綵排，好多時踩釘，有次個騷中午之前做，我哋差唔多通宵綵排，跟住冇返屋企，等埋開騷先走，又冇得休息，企喺個台排完一次又一次，好驚個儀式錯，個人好攰同暈暈哋，點知我真係撻咗喺地，真係暈。」DJ嘉嘉1982年在港台兼職做DJ，跟林珊珊和鄭丹瑞主持的《三個小神仙》最受歡迎，及後推出多張如《無可奉告》、《無情者．有情人》和《夜溫柔》等大碟。1992年嘉嘉轉職公關，曾任九巴企業傳訊部經理。2012年重返電台開咪，直至兩年前退休享受人生，四處旅行，她說：「我𠵱家係有旅無累。」
|
鍾意就快D Share啦！
|
|
|
