陳豪掃3300萬獨立屋ready娶茵媺
圈中筍盤陳豪跟女友陳茵媺拍拖近兩年，經常被傳好事近。去年陳豪與陳茵媺已積極四出物色靚樓，望早日共築愛巢，直至昨日陳豪終於撲錘，以3,300萬購入4,000呎大埔比華利山別墅。有樓在手，迎娶陳茵媺過門指日可待！
陳豪與陳茵媺（Aimee）愛得癡纏，拍拖雖然近兩年，但仍經常出冧招氹女友。他早前才長途跋涉專程遠赴馬來西亞，探望身在當地拍攝新劇《單戀雙城》的Aimee，即使之後自己要先行趕返香港出席新劇《金枝慾孽貳》宣傳，陳豪亦不厭千里迢迢，可謂見少一秒都牽腸掛肚。
去年已不斷睇樓
曾揚言「個性穩陣，喜買磚頭保值」的陳豪，現時已持有將軍澳都會駅物業，鑑於目前其深井碧堤半島同居寓所乃是租盤，他去年起已不斷睇樓，並主攻港島區物業靚盤，但始終不果。直至昨日地產界有消息指他已落實在大埔以3,300萬（呎價約8,086元）購入大埔比華利山獨立屋，為娶老婆鋪路。據知，該獨立屋為大埔比華利山別墅1期最後一座待售洋房湖景道雙號屋，單位建築面積4,081方呎，實用面積約2,461方呎，折合建築呎價約8,086餘元，實用呎價則是13,650元。雖然現時樓價仍處高位，但千金難買心頭好，而且發展商原擬以4,300萬賣出，但為求於一手住宅銷售條例生效前盡快去貨，故價錢酌量調減。
著重私隱避偷拍
陳豪自與Aimee拍拖以來，對私隱尤其講究。去年11月就被爆秘密同遊法國，若非遭人上載他們身在羅浮宮的照片，行蹤可謂神不知鬼不覺，加上二人曾被偷拍寓所內甜蜜餵食親暱舉動，對寓所私隱尤為講究。如今覓得獨立屋作愛巢，狗仔隊要偷拍亦要費煞一番思量。
陳豪昨晚電話回覆，他避談購入愛巢是否為鋪路娶Aimee，他說：「係，我今日係去睇過樓，但暫時唔想講太多。（買樓準備結婚？計劃投資定自住？）買樓一直係我為將來作嘅打算，投資、自住都喺計算範圍，入市因素之一，我係用嚟自用！」
文：影視組
|
鍾意就快D Share啦！
|
|
|
