掃呢頁CODE去手機

2013年5月1日 星期三

大方正印  47歲陳雅倫搶食李思捷  22歲春卷:見慣佢攬女




真面目

大方正印  47歲陳雅倫搶食李思捷  22歲春卷:見慣佢攬女

由李思捷主持的《玩嘢王》玩完阿 Bob又玩馬賽,炒㷫平均 20點收視之餘, 39歲的他跟 47歲陳雅倫的「姊弟戀」亦見光,李思捷更坦白承認經常上對方屋企夜談,當正印女友春卷冇到。

22歲春卷王寶寶回應本刊時話唔理得咁多:「見慣佢攬女㗎啦!我覺得唔需要問佢咁多嘢!」女友愛得盲目,難怪李思捷可以咁放膽啦!

學黎明合十

正印

與王寶寶拍拖近 4年,但李思捷從不公開承認,卻經常被影到 2人拖手行街。

李思捷跟春卷拍拖近 4年,緋聞及傳「博懵」新聞卻不斷,憑《福祿壽》叫做挽回些少人氣,直至最近才有單拖孭飛玩轉藝人的《玩嘢王》大 hit,卻又傳出與陳雅倫的「姊弟戀」緋聞,思捷疑似一腳踏兩船。

「唔需要問佢」

陳雅倫早前已公開承認多次到對方家中夜談,李思捷亦自稱阿媽會煮飯煲湯給陳雅倫歎。

雖然兩人頻頻密會只為李思捷將於 8月執導的新戲傾合作,不過陳雅倫上週接受雜誌訪問時,卻又語帶雙關咁話:「有好多妹妹仔借佢過橋!」矛頭直指年僅 22歲的李思捷現任女友春卷王寶寶。

記者週日( 28日)致電身在英國的春卷(王寶寶),她表示男友曾向她提起過陳雅倫,但未見過她本人:「我不嬲唔會理佢呢啲緋聞,佢成日都有,都慣咗!(呢單緋聞佢有冇向你報定案?)冇呀,唔使咁做!」

陳雅倫經常到李思捷位於何文田的住所,她更不避嫌將合照放上微博。網上圖片

李思捷雖然年紀比陳雅倫細 8年,但他稱雙方是好朋友,早前喬寶寶搞離港 party,他倆都有出席,但卻不見女友春卷。網上圖片

「男女都揸 pat pat」

李思捷曾多次被指借醉博懵攬女搞搞震,春卷即大爆:「唔只飲咗酒,佢一開心就四圍攬㗎啦,咩人都攬㗎!同我出去玩都成日攬住我啲 friend!(男定女?)男女都有啦,揸 pat pat、攬錫乜都有,見慣佢攬女㗎啦!我覺得唔需要問佢咁多嘢!我諗佢揸親嗰啲都係冇乜所謂嗰啲!」

雖然男友愛搞搞震,但春卷毫不介意,問到幾時結婚,她就說:「𠵱家感情 ok,幾穩定!結婚就冇諗住!」把口話冇嘢啫,思捷都係唔好玩咁盡喇。

春卷指男友李思捷好鍾意同朋友玩,而且酒後玩得好癲,早前玄學家吳佩孚在船上搞生日 P,李思捷就飲到面紅紅搶咪唱歌唔放手。《忽然 1周》圖片

李思捷工作唔算多,早前拍完郭晉安的《熟男有惑》就未開其他劇。《蘋果日報》圖片

老嫩通殺

李思捷花弗通曬天,但公開承認的女友只有 2002年落選港姐葉凱茵,近年與細自己 17年的春卷王寶寶拍拖,一樣冇名冇分。食慣嫩口嘢,最近又傳搭上 47歲陳雅倫,一個青春,一個風騷,李思捷真係乜女都啱!

22歲回流鬼妹

33、 24、 34

22歲王寶寶一向唔介意性感示人, 09年穿着紅色性感泳衣參加深圳舉行的世界模特兒大賽,又曾影過半裸寫真。圖片

47歲風騷熟女

36、 25、 36.5

47歲陳雅倫曾露點拍《危情》及《南洋十大邪術》等,亦出過寫真集,睇番呢張 1990年影落嘅泳衣相,當年 24歲的陳雅倫確係魔鬼身材,睇嚟李思捷揀女友都要性感至收貨。

《玩嘢王》又抄嘢

《玩嘢王》一共有 7集,頭兩集平均錄得 20點收視,繼首集假婚宴玩謝阿 Bob,上集李思捷扮鬼上身嚇壞馬賽均成為城中熱話。

不過玩藝人呢家嘢就似足網上熱片, Hardpack成員 Kevin仔(李健宏)搞作,專門放上 YouTube的《玩爆你個腎》短片,整蠱團隊次次都大龍鳳玩謝藝人,薛凱琪就試過在排舞室被假紋身漢恐嚇,驚到喊出嚟。

馬賽以為錄影廠有鬼,即聽麥玲玲指點拜四角求平安。

《玩爆你個腎》出到古惑仔大鬧排舞室,嚇到薛凱琪勁喊。

預告第 3集:處女都玩

《玩嘢王》將陸續有藝人被玩,下集被玩得最慘的是王君馨。

王君馨嚇到勁喊

王君馨以為自己會唱電視劇主題曲,點知入到錄音室有嘉賓出事,嚇到王君馨喊到失控。「俾思捷玩咗 3個鐘,仲有個特別嘉賓突然出咗事,我好擔心佢,好無助,喊得好犀利呀!」至於邊個特別嘉賓,佢就話要賣個關子。

蘇基遇古惑仔

蘇基(古明華)則被騙要為音樂節目錄感想,突然有黑社會人士出來搞事,古明華硬住頭皮繼續錄影。「佢哋扮得幾似㗎!但我覺得玩唔夠囉!」

採訪、撰文、攝影:娛樂組


鍾意就快D Share啦!