朱璿接受訪問時，不停對住記者笑淫淫，姣勁十足，她更承認經常向張國強抽水。而張國強亦暗指朱璿發姣，仲話「係佢特色」。
滾熱辣
劇組爆送波餅 朱璿姣黐人夫張國強
小本製作《情越海岸線》首周平均收視 25點，跑贏《金枝慾孽貳》外，劇中李詩韻、李綺雯（𡃁妹）等女演員搏命演出，惹起網友熱烈討論。據知《情》劇下周將會集中火力講朱璿與張國強婚外情，劇中朱璿為了拆散張國強頭家，出動三點式兼剝男方條褲，最後假扮人妖叫對方摸自己，極重口味。
朱璿戲內豪放，現實一樣姣到出汁。有劇組人員爆料，指朱璿一早已吼實人夫張國強，埋位前藉詞叫男方教做戲，不時胸頂男方手臂，大送波餅。朱璿周日（ 19日）宣傳《情》劇時更自爆：「佢唔介意俾我抽水。」
姣佘佘詩曼北上搵真銀，看來無綫新一代姣精後繼有人。
年 26歲的朱璿 08年加入無綫。北京出世，曾於巴黎留學的她，廣東話唔鹹唔淡，聲線嬌嗲，加上 33C逼爆上圍，令不少與她合作過的男藝人紛紛中招，被她電暈。一班已婚男藝人亦零舍對她避忌，費事桃色禍上身。
水底夾下體
不過，朱璿深知放電發姣令她工作上更加得心應手，故近年變本加厲，愈姣愈勁。去年 4月，朱璿接拍《情越海岸線》，劇中她飾演嘗盡情傷的小三，戮力拆散張國強與盧宛茵的美好家庭。為了將張國強據為己有，劇中朱璿着三點式遊水時不惜扮浸親，要張救她上岸，又扮病要張上門陪她睇醫生，但最後竟然身穿吊帶喱士睡衣主動攬錫男方，更一手扯低男方條褲，認真飛擒大咬。最後更假扮人妖，叫張國強摸自己檢驗是否女人真身，認真重口味。
不過朱璿假戲真做，視現實生活已有老婆仔女的張國強為理想對象，經常借頭借路親近對方，一班劇組人員看在眼內，都認為朱璿今次實在姣得離譜。一名工作人員說：「好似朱璿浸親嗰場戲，明明導演已經嗌咗 cut，但係朱璿仲用對鉸剪腳夾實 KK（張國強花名）下面，又好嗲話要 KK快啲抱佢上岸。平時一班演員放飯，朱璿螞蟻嘍蜜糖咁，要同 KK一齊坐，仲成日要 KK教做戲。有時佢哋坐到好埋，朱璿明知個胸頂住 KK手臂都唔介意。」
張國強：我唔會佔便宜
不過女人做主動，未必每位男士都照單全收。好似結婚已 25年，今年 52歲的張國強，原來曾就朱璿姣黐一事略有微言，更試過三口六面叫朱璿檢點。知情人士說：「 KK真係好好先生嚟！佢拍到半路覺得朱璿性格真係熱情咗啲，驚俾人講閒話，咪當教女咁，叫朱璿避忌吓，唔想佢蝕底咁話喎。」
周日（ 19日），一眾演員宣傳《情》劇。記者就此事問過張國強，得悉記者來意後，便煞有介事說：「佢真係好放，但我冇佔佢便宜呀！平時坐埋一齊都係同佢對戲啫！（佢有冇嗲你呀？）哦！佢嗲都係因為佢廣東話發音問題啫，呢個係佢特色。（拍劇時頂唔頂得順呀？） OK啦！ OK啦！我坐懷不亂㗎！」對於姣黐張國強，朱璿則直認不諱，她說：「係呀！我成日繑實佢，佢都唔介意俾我抽水。其實初時我同 KK唔係好熟，對住佢好緊張，後尾係佢叫我放啲，我先冇乜壓力。我唔介意人哋話我姣！」看來朱璿為了姣上位，不惜豁出去。
黐實李思捷
早前，朱璿於《玩嘢王》中被整蠱，嚇到她先後攬實三個男性工作人員定驚，非常豪放。上周二（ 14日），朱璿獲邀出席《玩嘢王》慶功宴，其間她特登 mark實位置，坐正李思捷隔籬。
人人話姣
曾與朱璿合作過的藝人，也異口同聲表示感受過朱的姣勁。看來朱繼佘詩曼之後，大有機會問鼎新一代「姣精」。
王俊棠：佢直情勾魂
於《愛•回家》和《情越海岸線》也跟朱璿合作的王俊棠，猛讚朱璿是女神。他說：「嘩！朱璿簡直係《愛•回家》劇組入面嘅女神，全部男仔都話佢正，佢唔止皮光肉滑，單係睇佢一對腰果眼，已經令人暈大浪，仲有佢講嘢把聲直情勾魂！睇嚟張國強準備……（婚變？）你哋問佢老婆啦！」
盧宛茵：佢多男人鍾意
盧宛茵在《情越海岸線》中飾演張國強老婆，被朱璿搶走老公。對於朱璿姣黐張國強，她說：「佢哋（朱璿與張國強）平時成日吱吱噚噚，唔知佢哋笑乜。我見佢（朱璿）同男女都玩得咁開心，又成個大笑姑婆咁，樣靚身材正又唔扮嘢，梗係多男人鍾意啦！」
煲煙華姐
今年 26歲的朱璿，擁有 33C上圍，是 08年國際中華小姐雙料冠軍。她生於北京，但父母乃法籍華裔商人，其後舉家返巴黎定居。她參選國際中華小姐，也以巴黎代表身份參選。朱璿由細到大喜歡演戲，曾就讀法國佛羅朗戲劇學院，不過她當選後就隨即被本刊踢爆曾於巴黎任職酒樓知客兼有煲煙相流出。
她於 10年更被楊凡睇中，出任《淚王子》女主角，與台灣藝人張孝全有大量牀上戲，同年她更憑此片參加威尼斯影展及提名金像獎「最佳新演員」。
可惜之後她無以為繼，試過一年有四套劇，但大部分屬客串，直至去年加入《愛•回家》後，才有機會發揮。
|
鍾意就快D Share啦！
|
|
|
