自從《金枝貳》開始播映後，雯女已沒有參與該劇的宣傳活動，雖然劇集口碑不好，但其他演員依然落力宣傳，力撐該劇。
探熱針
《金枝貳》飯局 圍插鄧萃雯
無綫劇集《金枝慾孽貳》劣評如潮，主角鄧萃雯為求自保，公開炮轟拍攝時飛紙仔情況嚴重惹起火頭，編審周旭明反駁「有人」見收視低想跳船；黃德斌亦加入口水戰，在微博發炮指「偽人」的自我宣傳手法低智卑劣。
雖然兩人無公開指名道姓，但槍口擺明同時對準鄧萃雯。本月十五日晚，《金枝貳》演員伍詠薇、黃德斌、陳豪、蔡少芬、楊秀惠、關禮傑及監製戚其義等人，飛起火頭鄧萃雯，拉隊去彌敦酒店開飯，各人整晚更圍插鄧萃雯無義氣。雖然劇集收視創新低，如今籠裡雞互啄，好睇過戲內劇情。
隔空開火
《金枝慾孽貳》開播以來受盡非議，無論劇情抑或演員表現，通通被一踩再踩，雯女終於忍唔住，第一個挺身炮轟，指拍攝時飛紙仔無劇本，將責任全部推向編審周旭明身上。
卸膊卸出面，周旭明接受內地傳媒訪問時暗諷雯女：「船要沉了，有人扮老鼠先走。」而向來寡言的黃德斌，亦在微博力撐周旭明：「偽人拋下一句講真心話而抹殺他人的努力付出。不尊重他人，此種包裝自己之自我宣傳手法實在低智卑劣同珍禽異獸般罕有。」
雖然雯女勢孤，依然在微博淡定回應：「沒什麼輸不起，不介懷船會沉……就算輸，一起認不就好了嗎！」
監製狂插
微博變口水戰場，伍詠薇（伍姑娘）實行火上加油，於本月十五日（週三）晚上九時半，約埋「自己友」黃德斌、陳豪、蔡少芬、楊秀惠、關禮傑及監製戚其義等人去彌敦酒店食飯，飛起雯女一個。
收視再破底
無綫重頭劇《金枝慾孽貳》起用金牌監製、視後及一大班分量演員，收視竟然插水，甚至輸埋口碑。死因主要是劇情過於沉悶，節奏慢、角色太多太複雜，對白長又難明，就算有陳豪、鄧萃雯、蔡少芬坐鎮亦未能起死回生。主角撐唔住，配角同樣唔爭氣，苟芸慧、葉翠翠雙雙被網民圍插咬字唔清，講對白似背書，令整套劇扣分再扣分，更有觀眾指每晚睇到瞓着覺，群起要求無綫盡快腰斬《金枝貳》，難怪上週錄得 18點新低收視，令《金枝》神話宣告幻滅。
據酒店員工透露，當晚人人表現盡興，開飯期間更圍插雯女反骨，「嗰晚氣氛幾好，食飯個個有講有笑，上菜換碟時都聽到佢哋喺度鬧爆鄧萃雯，戚其義好嬲話：『如果佢覺得劇本有問題，九年前嗰套咪又係咁，點解以前唔出聲？又話自己情緒病，當時如果佢出聲，換人都得啦！而家收視唔好，責任推喺人哋度，佢啲咁嘅性格，去到邊都唔會有人搵佢拍嘢！』佢講完之後，伍姑娘接住又講：『阿戚，今次我撐你，無論你去到天涯海角我都撐！』」
陳豪有嘢講
除了戚其義及伍姑娘一人一句，向來屬「友誼先生」的陳豪，飯局上亦有表態，「平時見陳豪好好笑容，入去換碟時聽到佢講『都未見過女主角會踩番自己套劇，第一次見。』陳豪講完，蔡少芬搭嘴話，『我同佢最多對手戲，我有曬情緒要喊，佢就拖慢節奏嗌 NG，搞到我由高點跌返落去，唔想人做得好過佢，咁嘅心態唔係咁好囉！』就連其他有份做宮女班演員都加把嘴話鄧萃雯，唔怪得佢唔嚟啦，人人都插佢。」酒店員工透露。
多多藉口
據知，《金枝慾孽貳》但凡有宣傳活動，都會邀請雯女出席，不過她每次都會搵藉口唔到，「做宣傳又點會叫少個吖，何況仲要係女主角鄧萃雯喎，邊個夠膽唔叫佢？次次叫佢佢都話時間就唔啱，《金枝貳》搞過三次飯局，頭兩次佢都話唔得閒，到第三次都費事問佢。講真，我哋成班人坐埋一條船，大家要互撐，既然佢出咗聲將責任推曬落劇，又介意套劇將焦點放喺伍姑娘身上，搞到自己唔合群，又何必吖！」劇中有演員透露。
|
鍾意就快D Share啦！
|
|
|
