陳豪陳茵媺情侶檔入曬屋，就連上年無綫台慶亦被安排繑住手行紅地氈，估唔到咁快好事近，結婚生 B打孖上。
大封面
陳茵媺秘入院婦檢 加國湖景屋養胎
陳茵媺與陳豪拍拖兩年多，終於未婚有餡。懷有「 Mo B」兩個月的陳茵媺，即時辭演新劇《寒山潛龍》，急返多倫多娘家安胎待產，由母親全天候照顧。
本刊記者在陳茵媺多倫多寓所連日守候，但她為免「小肚」曝光，選擇足不出戶，不過其寓所附近的餐廳職員卻認出陳氏母女。記者更發現陳茵媺父母在加國是大業主，共擁總值 4千萬港幣的 6個物業及 4個車位。陳茵媺現時住的湖景屋，正是陳母送給她的嫁妝。
本刊早前更拍下陳茵媺單拖入醫院做婦科檢查，似乎她一早準備好為陳豪繼後香燈。
42歲的「筍盤王」陳豪， 2010年拍《心戰》與陳茵媺撻着，女方即時被私有化，雙陳更二合一情侶檔狂接騷揾真銀。兩年間二人屢傳結婚消息，最近終於搞出「人命」。陳茵媺自上月 8日出席新劇《情越海岸線》宣傳後，至今未有露面，原來她懷有「 Mo B」兩個月，更秘密遠赴多倫多老家安胎。
湖景屋做嫁妝
本刊記者幾經轉折，終查到陳茵媺父母在多倫多原來是大業主，兩人共擁有 6個物業及 4個車位，陳茵媺正身處其中一個面積接近 3千呎的高層湖景單位。據知該湖景屋是陳母去年買給女兒的嫁妝。知情人士透露：「去年陳豪見過 Aimee（陳茵媺）父母，初步傾過今年會結婚。陳媽媽去年 10月，就喺多倫多買咗間湖景屋俾個女做嫁妝。今年初先裝修完，依家全家搬咗入去，方便照顧大肚 Aimee。」
記者連日在大廈外守候，那裏空氣清新，面對無敵大湖景，絕對心曠神怡，非常適合懷孕中的陳茵媺安胎。本周一（ 3日）記者帶同水果籃，到湖景屋探望懷胎兩個月的陳茵媺。記者一開始就向大廈保安員說出該單位戶主姓陳，保安員即拿出住戶名單，核對資料正確後，就致電陳茵媺的單位。經過一輪對話後，保安員表示陳姓戶主不認識我們，禮貌地請記者離開。
記者其後到附近一間西餐廳用膳，當拿出陳茵媺及其家人的照片給其中一名侍應過目，侍應望了 5秒便認出陳母是熟客，經常來吃早餐，最近一次陳茵媺亦在場。他說這一帶唐人不多，所以不難認出她們。
婚前養和檢查
32歲的陳茵媺有喜兩個月，男友陳豪緊張之餘，家人亦十分擔心。事緣 4月尾陳茵媺在大馬拍《單戀雙城》時，因懷孕引起身體不適，頭重重兼容易疲倦，她誤以為感冒，竟飲感冒茶了事。後來月事遲遲未到，去看醫生才知道自己懷孕。據知陳茵媺母親立即叫女兒盡快返多倫多老家，讓家人好好照顧她的起居飲食。
其實，陳豪與陳茵媺早已為結婚生仔做好準備。本刊去年 7月影到戴着墨鏡的陳茵媺獨自步出養和醫院，原來她去醫院是做婚前婦科檢查。知情者透露：「 Aimee同 Moses（陳豪）都好注重健康。為咗生個健康 BB，舊年佢哋喺養和醫院做過體檢，檢查雙方有冇地中海貧血或其他家族遺傳病。體檢 pass咗，佢哋先放心『造人』。」
請假傾婚事
陳豪早前以三千多萬買入大埔比華利山別墅作新愛巢，又積極籌備在港島開設咖啡店，更講到明不想陳茵媺再辛勞工作，想獨力搵錢孭起頭家。
陳茵媺急告假返加國，陳豪早前亦連場缺席《金枝貳》的宣傳活動，原來是秘密赴多倫多與嶽母傾婚事。知情人士透露：「阿 Mo（陳豪洋名）知道 Aimee有咗，即時同無綫請假缺席《金枝貳》宣傳活動，佢趁呢段時間過去多倫多同嶽父嶽母傾婚事。其實大家都有曬共識，會喺多倫多註冊， BB出世後先至補擺酒。至於禮金， Aimee父親都話唔太重要，最重要係陳豪錫 Aimee。」陳茵媺雙親在加國有大把物業，個個月有租收，陳爸爸退休前是工程師，媽媽是教師，屬中產家庭。即使陳爸爸現已退休，但有物業及大筆退休金，生活絕對無憂，所以亦唔着緊陳豪俾多少禮金。
默認做老竇
周日（ 2日），陳豪自陳茵媺傳出有喜後首次露面，即被半百記者包圍大逼供，陳豪滴曬汗、笑曬口回答記者提問，不斷重複將會有好消息公布，默認陳茵媺有喜。
記：記者陳：陳豪
記：係咪公布喜事呀？
陳：大家嘅關心同心急我完全感受到，俾多啲時間同耐性，必定同大家公布。
記：喺咪籌備緊呀？
陳：有好消息會向大家公布。唔方便透露太多，留番啲空間容許我保持番自己嘅低調。唔係話唔會講，我阿 Mo份人有好消息一定同大家分享。佢（陳茵媺）依家喺加拿大放緊假，有家人照顧，期待俾好消息你哋。
記：同 Aimee提咗親未呀？
陳：唔講得俾你知喎。
記：之後會唔會唔俾 Aimee再拍劇？
陳：唔會！
記： Aimee放假會放幾耐？
陳：……唔知道喎！你呢個問題，我唔知點答你喎。
記： Ready做爸爸未呀？
陳：我諗到咗嗰個時候我就會知道。
記： Aimee係咪順產？
陳：（大笑）你唔好裝我呀！
記：係咪積極睇舖位做老闆， Aimee做老闆娘？
陳：唔會俾佢辛苦，我做就得喇！
陳茵媺向無綫請長假，據知預產期在明年 1月，但她仍有一年合約在身，理論上產後要拍劇還債。不過陳豪講明唔俾女友再拍劇，睇怕陳茵媺再拍劇的機會好微，無綫又少咗一名當家花旦。
陳母物業
陳父物業
大懶蛇蝦老竇
陳茵媺現懷胎 2個月， BB將會在明年 1月出世。玄學家麥玲玲表示， BB屬蛇，應該會係條靚蛇。「蛇 B性格會冇咁進取，大懶蛇冇乜紀律，要多啲推動力先得。陳豪屬豬今年沖太歲，蛇 B會利佢，不過呢個豬老竇會俾蛇 B蝦。陳茵媺屬雞，蛇雞相合， BB會黐媽咪多啲，呢個小朋友會好靚，仲好獨當一面㖭！」
大肚茵媺懵盛盛
陳茵媺都算大懵， 4月初跟大隊去大馬為新劇《單戀雙城》拍一個月外景，竟然連自己有咗都唔知，仲走去瞓吊牀、食雪糕、跳起影相同飲感冒茶。到 4月尾身體不適去睇醫生先知有喜，難怪要即時飛返娘家安胎啦！
陳豪買定愛妻屋
陳豪成熟穩重又善於投資，手上除了持有將軍澳都會駅單位、一間西貢村屋及銅鑼灣一舊樓單位外，原來早於 04年，他便與家人聯名，以 120萬購入柴灣工業城一個寫字樓。自與陳茵媺拍拖後，陳豪更認定對方是結婚對象，除早年以 2萬 2千元租住深井碧堤半島同居外，更儲定彈藥吼準時機買屋結婚。
今年 4月，陳豪為給女友驚喜，由搵樓、睇樓到撲槌，都親自出馬，最後以 3,368萬購入大埔比華利山 4,000呎獨立屋，更打算在樓契中加上女友名字。陳豪呢間愛妻屋私隱度高，守衞又森嚴，大廳對住無敵大海景，最適合陳豪一家三口居住啦！
|
鍾意就快D Share啦！
|
|
|
