大曬家庭樂
上周六（ 1日），馬德鐘以大使身份出席活動，更帶埋太太張筱蘭和囝囝馬在驤出席。為曬幸福家庭樂，一家三口認真不遺餘力。
娛聞樂
為老婆做總理鋪路 馬德鐘拆僭建屋洗底
44歲「馬神」馬德鐘離巢無綫後，動作多多，除強攻內地狂吸人仔外，近日更有指他豪擲 180萬做馬主。
無呈呈由電視中生升做馬主，馬德鐘原來密謀部署晉身上流社會。昔日花弗的馬德鐘，近年修心養性孖實老婆張筱蘭殺入 ball場，更成功埋到仁愛堂第一副主席歐雪明身。據知馬太亦希望年底前做仁濟總理。
名氣界聲譽好緊要，為防臭史被揭，近日馬德鐘急急將屯門被指僭建的天台及地牢拆卸，一心洗清個底。
馬德鐘 11年豪花 1420萬買下位於屯門小欖榮華花園一個二千呎兩層連天台獨立屋。不過，去年在新屋裝修期間，卻遭鄰居爆大鑊，指其新屋勁搞僭建，既加建天台屋，又挖深兩層，改造成有酒窖及健身室的「地下皇宮」。由於當時街坊連成一線圍剿馬德鐘，馬為息事寧人，惟有將僭建工程煞停，但就不肯讓步清拆當時的僭建物。
暫住千呎單位
不過事件有新發展，停工多時的馬宅，自今年 4月起再度大修，圍板外更張貼告示寫上「 Sorry」。據知是馬德鐘突然轉軚，清拆大宅包括天台等所有僭建部分，「工程拖咗成年都未搞掂，大大話話都使咗成一百萬，加上自從特首梁振英都發生僭建風波後，屋宇署對僭建屋 check得好密。為咗盡快入夥，馬德鐘唔屈服都唔得啦！」
現時他一家三口以月租三萬蚊，暫住屯門黃金海岸一個千呎高層單位。上周六（ 1日），馬德鐘帶埋老婆張筱蘭和 15歲囝囝馬在驤，出席完愛護動物協會活動後，便全家返回黃金海岸新竇。
狂去 ball場識人
一向愛威的馬德鐘，突然讓步急拆僭建屋，皆因老婆要選總理，唔想有手尾跟。自 11年 11月發生狼吻陳嘉桓事件後，馬德鐘就經常帶老婆現身公開活動曬恩愛，落力擺脫賤男形象。
近半年來，二人更由出席普通首映活動，晉升到上流社會的晚宴。他們出入 ball場的次數比一眾名媛更頻密，處心積慮攀登名氣界。「佢哋兩公婆好勤力，啲傳媒朋友未到齊，佢哋已經到咗 ball場，係最早到嘅嘉賓。馬太浸過鹹水，又係博士，講嘢好有內涵，加上佢又靚女，所以好得一班名流名媛歡心。」知情者說。
𠱁掂仁愛堂副主席
張筱蘭躋身上流社會短短大半年，已成功冧掂仁愛堂第一副主席歐雪明，兩人更成為好姊妹。憑歐雪明的人脈，馬德鐘今年為《慈善星輝仁濟夜》做表演嘉賓，張筱蘭希望透過歐雪明於社交界的人脈網絡，獲其他有知名度的慈善團體提名做總理。「喺社交界有錢都唔係大曬，最緊要係識人夠唔夠多，所識嘅人可唔可以助你一把。馬太好醒目，識親都係啲有 power嘅人物，只要佢哋肯做人格擔保，寫多啲推薦書，好易就躋身到慈善組織入面。馬太對仁濟總理一職虎視眈眈。」
為成為總理，張筱蘭近日更捉住老公參與不少公益活動。唔講唔知，馬德鐘現時經已是仁愛堂「仁愛大使」、港安醫院「愛心大使」、愛護動物協會大使等，名銜多多，非常誇張。
張筱蘭近年更以藝人包裝自己，與老公北上出席綜藝節目，於節目內大談夫妻相處之道。二人更於本月 20日搞結婚 20周年晚宴，廣邀社交界名人。
周二（ 4日），記者就拆僭建屋及做總理一事，致電馬德鐘和張筱蘭，惟截稿前仍未回覆。
model變博士
馬德鐘由警隊的「要員保護組」變成電視中生，其太太張筱蘭亦不遑多讓。今年 44歲的張筱蘭與馬德鐘是中學同學，二人早於 1979年便相識。直至 1987年，全職 model的張於工作上重遇當時任兼職 model的馬德鐘，之後便開始拍拖，二人於 1993年結婚。
曾於澳洲留學的張筱蘭， 1998年再入讀香港科技大學，於 03年終於完成哲學博士學位，其間兩度獲得尤德爵士獎學金，非常巴閉。完成博士學位後，張曾移居法國進行研究工作，直至 08年再度回流香港。現時她是香港大學名譽助理教授。
仁濟總理過 3關
|
鍾意就快D Share啦！
|
|
|
