掃呢頁CODE去手機

2013年6月7日 星期五

李思捷扮嘢叻過玩嘢




嗚……我要雅倫姐姐同我人工呼吸呀!

食完雪糕,李思捷着上一件雪到變冰嘅長袖衫。雞手鴨腳嘅佢,搞好耐都穿唔到一隻袖,全程𠵱𠵱哦哦,萬箭穿心咁款,唔知以為佢俾佢口中嘅女神陳雅倫飛咗㖭!

媽咪姐

李思捷扮嘢叻過玩嘢

媽咪姐一向都信「日久見人心」,尤其喺娛樂圈,只要紅少少啫,好多藝人就即刻現形!《忽周》早前先講李思捷做《玩嘢王》後自覺升呢咗,同阮兆祥、王祖藍唔同 level,「福祿壽」散曬。

周一( 3日),媽咪姐又見識到佢嘅「另一面」嘞!話說嗰日李思捷同郭晉安、曹永廉同陳敏之等齊齊錄影《超級無敵獎門人終極篇》。講真吖,論卡士梗係當家小生郭晉安勁啲,而陳敏之同曹永廉假假哋都係「女二」同「男二」!李思捷呢,叫做啱啱單飛,食住《玩嘢王》個勢,有多少人氣囉。所以佢醒呀!一早吩咐「任點女友」王寶寶(春卷)入電視城探班,幫佢吸多啲注意力同版位。之但係咁喎,李思捷又唔俾女友發聲,記者啱啱影咗兩張相啫,佢已經嗱嗱聲話:「佢路過之嘛,唔好影人哋!放過佢,你哋(指旁邊嘅單立文同春卷)借尿遁啦。」打曬眼色叫 friend底嘅單立文拉女友走(慌唔係驚記者問春卷,點睇男友同陳雅倫單攬啜緋聞咩!)。

事後媽咪姐發現,過完橋抽完板嘅李思捷喺化妝間揸機,幫春卷同其他男藝人影相,忽然又好男友上身。到玩遊戲嗰陣,李思捷就將表情以十倍放大,當正自己係「喜劇之王」,總括嚟講, over囉!

你估李思捷食緊啲乜,個樣可以咁痛苦呢?砒霜?傻啦,係全世界最難……令人討厭嘅雪糕囉。睇佢個樣,真係辛苦曬!

影完即棄

被男友徵召入「城」嘅春卷,成功引到記者影相後,即俾李思捷老友單立文捉走。阿女,揾番啲志氣,咪成日俾人老點啦。

俾番甜頭

話曬春卷都山長水遠咁「路過」將軍澳工業邨入面嘅電視城!李思捷之後都幫女友揸機,影番張靚相,做吓樣都要嘅。不過,之前春卷幫佢影咗成 10張先囉。

兄弟重逢?

周二( 4日)又有《獎門人》錄影,呢次揾咗歐陽震華、朱咪咪、孫佳君同阿 Bob(林盛斌)做嘉賓。睇牌面,以為都係靠歐陽 Bobby同朱咪咪搞氣氛。吖!估唔到一出場,先發現阿 Bob同 Bobby竟然由頭似到落腳,失散兄弟一樣,搶曬!

呢晚阿 Bob好艷福,前有「童顏女神」樂瞳箝實,後有一代性感女神孫佳君攬住,真係重死都抵!睇佢個樣,真係辛苦曬!

核凸噴水

當李思捷玩遊戲都交足戲,啱啱先叫做多啲人識嘅阿 Bob,自然更重口味!同樣玩着冰衫,阿 Bob一邊用力掹開件衫,一邊狂噴口水,連主持林曉峰都忍唔住話:「你唔好咁核凸啦!靠樣揾食㗎。」唉,但唔落重啲藥,鬼睇你咩?



鍾意就快D Share啦!