總之睇啱就會入市！（真實對白）
張智霖揸住過半億樓喺手，難怪心情勁 high。上週五（ 13日）做周傑倫演唱會嘉賓，除咗上台唱歌，仲同周傑倫玩自拍。
真面目
睇樓王 君如介紹 高人指點 張智霖狂掃 10層沙田樓
食住《衝上雲霄 II》個勢， Cool魔張智霖由澤東過檔蕭定一經理人公司， 5,000萬轉會費，呢頭到手、轉頭就錢搵錢！
據知，幾年前袁詠儀經吳君如介紹下，認識一位風水高人苗師傅，除有助 Chilam事業外，苗師傅亦對投資眼光獨到。去年 9月 Chilam就以 1,112萬買入「曦巒」一單位，現已升值二百多萬，最近 Chilam再出手，一炮過買下沙田第一城 10個單位，最貴的只需 600多萬入手，一個單位轉手賺少少，密食當三番， Chilam身價又漲唔少。
42歲張智霖今年憑《衝上雲霄 II》人氣爆燈，有名自然有利。上週二（ 10日）以 5,000萬身價加盟蕭定一的中國 3D數碼娛樂有限公司，之後仲會同 Sam哥拍《衝上雲霄 II》電影版，加埋廣告、大陸劇、演唱會，財運相當暢旺。
神秘風水師教路
Chilam勢勁，除了本身條件外，據知近年得到圈中星級風水師苗師傅指點迷津。苗師傅圈中人脈廣，客仔包括古天樂、古巨基、黎耀祥，陳志雲和吳君如等，不過其身份就非常神秘，據聞只睇熟客介紹的新客，而且初時只靠傳真對話，想見真人都唔容易。
數年前， Chilam老婆靚靚經君如介紹下認識苗師傅，據知 Chilam由澤東轉會到蕭定一旗下，苗師傅亦有畀意見， Chilam轉會後即人氣急升，令 Chilam一家對這位苗師傅深信不疑。知情人士說︰「 Chilam睇咗呢個師傅好多年，尤其係每次搬屋，都一定搵師傅搞一輪先搬入新屋。」
Cool魔變樓王
除了事業會請教苗師傅， Chilam連投資亦會問苗師傅意見，早前有傳 Chilam以 6,530萬買入淺水灣物業，但苗師傅說未係時候，所以最終未有成事。 Chilam曾在活動上解釋︰「我係『樓迷』，但真係冇買淺水灣。」
雖然 Chilam兩公婆賺唔少，但近年好少入手買樓，除了手持過千萬的曦巒外，據知簽約後即用 5,000萬轉會費，一口氣買入 10個沙田第一城單位，由市值 300多萬至最貴 600多萬不等。據知買入前， Chilam亦請示過苗師傅意見，得到苗師傅神機妙算，指炒平價樓比較適合 Chilam，靚靚先肯科水。對於狂掃沙田樓一事， Chilam透過經理人回應：「睇樓係我興趣，總之睇啱就會入市。」
轉攻沙田樓
張智霖自認樓癡，得閒就鍾意睇樓，不過他近年少有買「磚頭」，而過往斬鑊亦唔算多。 97年以 948萬買入南灣花園， 05年以 820萬轉售，更蝕咗 128萬。現仍持有曦巒市值 1,350萬單位，但今年經苗師傅指點，轉攻沙田細價樓。最近用 5,000萬買入 10個沙田第一城單位， Chilam似乎想做細價樓王喎！
年賺近億
張智霖除咗簽約蕭定一賺咗 5,000萬外，今年食住《衝 II》個勢都賺唔少。廣告、代言接唔停，年尾拍大陸劇，下年亦會開始巡迴演唱會。搵咁多又可以掃多幾層樓。
|
鍾意就快D Share啦！
|
|
|
