上周五（ 6日）已升格為內地製片人的田樸珺，於內地雜誌寫專欄，大爆陳可辛是其閨中密友，比吳君如更親密。事件愈炒愈熱，據知吳君如原來早已知情。
你哋唔好咁離譜喎！（設計對白）
唔風流點做導演呀！（設計對白）
我先至係閨蜜！（設計對白）
滾熱辣
搵愛女做籌碼 君如逼陳可辛掟小三
最近有大陸女星田樸珺（前名焯勻），自爆吳君如男友陳可辛是「男閨蜜」，兩人關係維持十年。吳君如即時在微博反擊小三︰「不用理會甚麼閨蜜及龜蜜，反正我知道他的心（和財產）歸 me！」
48歲的吳君如能夠戰勝 32歲強國性感尤物，全因君如有 7歲大女兒陳是知作籌碼。其實，陳可辛風流已是行內的公開秘密。據知去年君如得知田樸珺與陳可辛拍攝電影《中國合夥人》過從甚密，曾飛內地𥄫實男友，更斷正兩人房間促膝談心。當時君如大發雷霆，與陳可辛攤牌時更聲言帶埋女兒與他斷絕關係。一向愛女如命的陳可辛亦知衰，答應君如與小三斬纜。
而君如密友鄒凱光亦不值陳所為，去年在節目中不開名寸爆︰「有個名導演好爛滾，佢有個明星老婆，成日扮好老公，但私下卻有好多女朋友……」
32歲的田樸珺，早在 04年因電影《三更 2之餃子》與陳可辛結緣。陳最新的電影《中國合夥人》，田亦是投資者及製片，兩人暗交十年，拍住搵食。田最近在雜誌親自撰寫與「男閨蜜」陳可辛的生活點滴，不但對男方出差行李箱內的物品瞭如指掌，更指男方曾到訪其香閨，又大曬陳送小禮物及唱情歌冧她，更指兩人三次分手，都是男方主動要求復合︰「近兩年我跟他絕交了三次……從來不知道甚麼原因他又回來找我。」
內地斷正小三
強國小三為冧導演奇招盡出，而君如亦非省油的燈。據知去年君如收到風，即飛內地𥄫實男友。「君如好醒，長毛（陳可辛）拍《中國合夥人》時，個電話成日飛留言信箱，君如就知有景轟，咪頻頻上北京𥄫住男友。終於有次俾佢斷正長毛同田樸珺係房間促膝談心，以君如性格當然忍唔住，即刻同男友攤牌。
「長毛竟然同君如講，君如同個女至係佢至愛，無論點都會返屋企。但因為要拍電影搵靈感，所以生活中要 keep住有激情。君如當然㷫爆嗌分手，仲話個女歸佢。長毛好錫是知（女兒），佢見君如咁嬲，咪補鑊話會同個女人斬纜。」
不過，據知陳可辛之所以與田樸珺關係維持得咁長久，除了因女方以「小女人」姿態嗲陳可辛，更因為她人面甚廣，經常周旋於大陸電影老闆之間，曾為陳可辛找到不少拍電影的資金及贊助。電影《如果愛》及《十月圍城》等，其中的一部分資金都是田的功勞，難怪兩人近年藕斷絲連。
陳可辛「小三」爆料後，連日來君如只在微博表態，但就拒聽記者電話。本刊連日在其寓所等她，她一發現記者即驅車左閃右避撇甩跟蹤車，擺明不想回應男友緋聞。至於身在聖彼得堡的陳可辛，其電影《中國合夥人》入選為俄羅斯中國電影節開幕電影，但作為投資者及製片的田樸珺卻未見出現，可見兩人再見不是「閨蜜」。
分開住保空間
君如與陳可辛誕下的女兒陳是知今年已 7歲，兩人對女兒疼錫有加，不過提到婚姻，卻是陳可辛死穴。「其實君如見個女愈嚟愈大，都提出過補辦結婚手續，等個女名正言順啲。不過長毛就一味拖字訣，話唔信婚姻制度。佢同君如咁多年都係住一幢大廈，但唔同單位，話就話要保持創作空間，但其實係怕俾個女人管住曬，自己知自己事。長毛同人講就話女友管財政，但咁多年來，佢哋冇共同物業，因為冇正式結婚，將來有咩事，君如亦分唔到佢身家。」
陳可辛亦曾在訪問中，笑住暗寸君如強悍兼有控制慾︰「司機出門要開哪一條路都要管，現在愈來愈有女強男弱的趨勢。」君如食住陳可辛，造就田樸珺有位入，田曾表示︰「《甜蜜蜜》、《如果愛》、《中國合夥人》裏的擁吻鏡頭，都發生在上下鋪，女強男弱，他的情意結係我偷偷發現的。」
坦認有女埋身
今年 3月，就陳可辛有內地女演員埋身一事，君如在訪問中亦饒有深意謂︰「佢有（女）好正常，男人有地位，有知名度，做呢行，冇（女）？唔好玩啦。（咁咪好危險？）行山危險。若果我鍾意另一個，丟低個女同頭家，佢都危險㗎。主要衡量當事人需要乜。」問到會否扮唔知，君如斬釘截鐵話︰「我閱人無數，走唔過我雙眼。」
雖然君如人前硬撐唔驚男友作反，但據知陳可辛有女埋身時，她亦忍不住向閨中密友鄒凱光呻爆，鄒曾在節目中為好友出頭，暗寸名導演風流︰「有個名導演好爛滾，佢有個明星老婆，佢成日扮好老公，但私下卻有好多女朋友……」
就暗寸名導演風流求證鄒凱光，他避重就輕話︰「我唔記得有冇講過。（咁你講嗰個名導演同明星老婆係咪陳可辛同吳君如？）我真係唔知有冇講過，咁耐嘅事……唔記得啦。」問到陳可辛是否風流時，他笑騎騎話︰「唔知！佢同我比，佢唔入流。」鄒曾在節目中說自己同一時間有廿多個女友，陳可辛唔及他，咁即係都有十個八個，明擋暗爆，鄒凱光真係夠朋友。
靠男人出名
上海姑娘田樸珺，畢業於北京中央戲劇學院修讀導演課程，由於她不介意性感演出， 03年來港後拍了多部電影，但全部做閒角。早前田在美國進修， 11年，她重返內地拍攝《後宮甄嬛傳》飾演敦親王福晉。除了演藝事業，她亦曾在一上市公司任顧問，主營房地產的爛尾樓收購。去年 1月，有網友在飛機上，偷拍到她與 61歲的萬科董事長王石關係曖昧。最近她更親自撰寫一篇《我的男閨密——你不知道的陳可辛》，自爆與陳可辛的親密關係，因而令知名度急升。
冇名份照生
未婚生仔，唔使負責任，另一半連身家都冇權分！雖然冇保障，不過娛樂圈仍有唔少人肯為對方未婚生仔。
成龍 吳綺莉
99年，吳綺莉誕下小龍女吳卓琳，事件轟動全城。事後成龍決絕說「我犯了天下男人都會犯的錯……我希望吳綺莉兩母女不要再來幹擾我的生活。」他更透露 22億財產會全歸正室林鳳嬌，小龍女一分一毫都分唔到。
李澤楷 梁洛施
梁洛施與小小超李澤楷 07年開始地下情拍拖，未入門的梁先後在美國為小小超誕下大仔長治及一對孖仔。正當大家以為梁會麻雀變鳳凰時，她前年竟發了聲明宣告與小小超分手。今年梁洛施更低調復出拍戲，為事業鋪路。
譚詠麟 Wendy
96年，譚詠麟的紅顏知己朱穎婷（ Wendy）為阿倫誕下兒子譚曉風，他們相戀至今。因阿倫有髮妻莎莉，所以 Wendy至今仍未坐正，莎莉掌管阿倫的財政大權，亦得到阿倫送贈兩層豪宅和 13間公司，反觀 Wendy只得一層於 95年買入的比華利山豪宅。
|
鍾意就快D Share啦！
|
|
|
