Jessica C.購買的 Afer plus是手術後用來去瘀及消腫的藥物，有口服及外塗兩種。
滾熱辣
首爾獨家斷正 Jessica C.換警鐘胸
韓國整容蔚然成風，席捲香港模界，唔少𡃁模都秘密赴韓整容大變身。 15歲出道，憑「警鐘胸」在模界響朵的 Jessica C.，今年 7月中秘密赴韓國抽眼袋及換警鐘。
報料者在韓國江南區著名的整容醫院 Regen Tower藥房，撞正 Jessica C.攞藥。素顏的她當時戴上黑超遮眼，但側面仍可見到眼尾的小型膠布。 8月中，整過曬嘅 Jessica C.穿上三點式拍觀瀾湖廣告，大眼袋不翼而飛，昔日堅挺的警鐘胸亦變得自然。
記者向她求證韓國抽眼袋換警鐘，她初時表示是到當地度假，但當記者表示有人在整容醫院撞到她，她表情尷尬，不發一言匆匆走人。
09年憑一對「警鐘胸」突圍而出的 Jessica C.，雖然經歷偷嘢官司及淫照風波，但她出道以來從不吝嗇一副好身材，因而大把世界撈。早前 Jessica C.更獲黃柏高賞識，開套喪屍片俾佢擔正。首次以近 7位數字做電影女主角的 Jessica C.，更向經理人請假個多月，原來她是到韓國江南區的整容醫院執靚副偈。
目擊者表示︰「嗰日係 7月 16日晏晝兩點幾，我剛喺韓國整容醫院隆完胸，去藥房攞藥，見個女仔成個明星咁咪望多兩眼，望真吓就認得佢係 Jessica C.。佢同我一樣都係配番隆胸後嗰隻消腫藥 After plus，所以我估佢都係去搞個胸。另外又見佢眼角有塊膠布仔，應該係做割眼袋手術，我之前都有朋友做過。」
攞完藥後， Jessica C.與貼身的翻譯到了醫院附近的 Ritz-Carlton酒店嘆 tea，兩人密斟近大半個小時才離開。
9月收眼肚
未去韓國前 Jessica C.兩邊眼袋清晰可見，現在則明顯消失。
12年舊警鐘
今年 8月整完後的 Jessica C.接拍觀瀾湖廣告，雙峰比昔日一對警鐘明顯自然好多。
腋下開窿放矽袋
目擊者稱，她自己是透過香港分店轉介到韓國醫院整容︰「呢間整容醫院喺韓國幾出名，聽講好多韓國明星都喺呢度做。佢哋嘅水滴形矽袋造出嚟嘅效果幾自然，而矽袋亦分滑面同『嚡』面兩隻，我就揀咗後者，因為醫生話滑面做完要用手搓足一個月，搓時會幾痛，好多明星都會忍痛做滑面。隆胸手術只係三、四個鐘，比我想像中簡單，但翻譯就提我呢個月要小心碰撞同唔好拎重嘢。」
據知， Jessica C.7月中向外聲稱，到美國找男友 Bryce度假，更在 Instagram發放一些遊泳的照片，掩飾她曾到韓國。有廣告商爆︰「我 7月尾搵 Jessica C.出席活動，佢經理人推咗，話佢要度假，我話加多 30%酬勞佢都唔接。」
Jessica C.消失成個月， 8月中整完的她終於復出，接拍觀瀾湖廣告。而她的警鐘胸明顯縮細了兩個 cup，沒有以前堅挺兼不自然，望落去軟好多。
記者在港連日跟蹤，發現 Jessica C.近月來深閨簡出，直至 9月 9日黃昏，才見戴着黑超的她到了尖沙嘴的「 Regen」香港分公司，她入內逗留了個多小時左右離開。
換警鐘十萬有找
周一（ 16日），記者到 Regen HK Medica Group放蛇，美容顧問李小姐表示︰「依家韓國隆胸用『腋下切開法』，醫生喺腋下用光纖管插入胸腔位置，然後將矽袋放入。手術需要全身麻醉，手術後休息五日可以回港，之後三個月都要返嚟呢度拍照俾韓國醫生跟進。手術後更要穿上緊身衣承托個胸，為期一個月，費用九萬幾。
「至於割眼袋係小手術，兩個鐘嘅手術毋須留院，收費三萬幾，手術七日後便會消腫。呢個費用包括手術費、醫生顧問費同回港跟進，兩種手術後都會有些少腫脹。」
第五代矽袋 胸硬化低至 5%
15歲入行的 Jessica C.憑胸殺入模界，據知她 19歲已在美國完成「警鐘胸」的僭建，而當時美國流行在乳暈及乳房下開刀，用的大部分是鹽水袋，與近年的矽袋比較，前者差很多。
整形外科專科醫生林竹筠指出，現今隆胸用的矽袋已屬第五代，胸硬化的風險減至每五年僅 5%，即一百個人隆胸，五年後只有 5個人有胸硬化情況，矽袋壽命亦延至 15至 20年之久。隆胸手術有三個切割位，一是在乳房摺位（最下邊位置）放入，第二種是腋下放入，雖然位置不明顯，但也有機會見到開刀位；第三種是乳暈放入，但有機會影響餵母乳的成功率。」
手術前，醫生會為客人做身體檢查，如抽血、心電圖及抽組織化驗等，費用包括在手術費內。客人自費的項目主要是往返韓國的機票、酒店及手術後的消炎藥。
聞整容色變
記者上前拍照， Jessica C.最初心情大靚。記者問到她 7月是否曾到韓國時，她還風騷說︰「 Holiday！」不過，當記者表示有人見到她出現韓國整容醫院時，她立即尷尷尬尬匆匆離開，避開記者問題。
翌日，記者以客人的身份上「 Regen」香港分公司放蛇，表示想做割眼袋及隆胸手術。美容顧問李小姐十分詳細解釋手術內容，更強調很多韓星都是在其公司禦用韓國醫院「 Regen Tower」做手術。
她更表示，隆胸手術後兩個月，顧客需定時到香港的分店檢查，以確保手術的質素。估計 Jessica C.昨日到此是檢查手術後傷口痊癒狀況。
求證 Jessica C.經理人 Christine，她說︰「佢 7月中同 8月中係去美國探男朋友。（其間去咗首爾？）冇，應該係轉機啫！（但有人影到佢喺韓國整容醫院藥房出現？）張相未見到，我答唔到你，去藥房都好正常。（知唔知佢割眼袋同整胸？係咪因為新片？）我諗佢唔會，我亦唔鼓勵。我只想講今次佢接新片嘅角色唔係賣弄色情，反而係驚嚇。」
百萬片酬升呢
至於電影的負責人 Paco則說︰「係搵咗 Jessica C.做我部喪屍片嘅女主角。（據聞片酬差唔多 7位數字，好貴喎！）哈哈！佢都值嘅，今次套戲唔係一般合拍片，係 international（國際性）。我需要搵對混血嘅男、女主角，要識講英文嘅， casing咗好多個女仔，至揀到 Jessica C.同安志傑。（佢為套戲抽眼袋換警鐘胸？係咪好多性感場面？）哈哈！性感戲實有，不過依家唔方便透露。」
一部戲賺百萬，係 Jessica C.入行以來最大突破，小財唔出，大財唔入，唔怪得她急急揼本執靚個 body。
穀胸無底線
34C惹火身材的 Jessica C.接下不少泳裝、內衣工作， 10年成為古巨基演唱會及 MV女主角（左圖）。 12年更擔任電影《寶島雙雄》女主角，與房祖名有不少埋身對手戲。
響警鐘吸金
Jessica C.全名 Jessica Tess Cambensy。 25歲的她來自美國， 15歲開始做 model。 09年來港發展，與葛民輝拍廣告彈出，成為第一代「 Canon女」。她憑一對堅挺不倒胸，獲封「警鐘胸」，迅即成為模界新寵。出道幾年，已有不少演出機會，去年更殺入電影圈做女主角。
戀愛大過天
09年，她與巴西籍模特兒男友 Sergio被拍得二人於酒店泳池騎膊馬。一直有指她拋胸搵錢供養男友，最終因 Sergio背她四出溝女，拍拖兩年分手收場。去年 8月，她的新男友 Bryce Bond曝光， Bryce身在美國，二人分隔兩地，早前她亦抽空返美陪男友個多月。
|
鍾意就快D Share啦！
|
|
|
