毛舜筠接受《最佳女主角》主持黎芷珊訪問，提到哥哥離世前的一段往事，愈說愈激動。
探熱針
芷珊揸莊 女主角男人經 毛舜筠：我欠咗哥哥！
黎芷珊去年主持訪談節目《最佳男主角》成為熱話後，終於等到《最佳女主角》出場，本刊優先看過其中幾位女主角的訪問，包括作為已故巨星張國榮公開承認愛過的女人毛舜筠，公開對未能實踐哥哥遺願感到虧欠；梁詠琪面對同是鄭伊健前女友的黎芷珊，以「好難唔記得」來形容這段好勝戀；而楊千嬅也剖白選擇丁子高這段姊弟戀引起的困惑。
哥哥無自由
訪問毛舜筠，話題離不開哥哥張國榮，對好友選擇了結生命仍感一臉惘然的她，特別憶述哥哥死前跟她見面的一件事。
「因為有一啲攔阻，我哋有幾年冇見面，到我再見到佢，佢已經好嚴重，嚴重到你會知道佢好辛苦。佢一直問我一個問題：『你經濟 OK嗎？生活有冇問題？』當時我見到佢震得好緊要，又未停過食煙，但佢已經戒咗煙喎！又食番，同埋好 nervous，左右手都震，要用腳壓住其中一隻手。
「當時仲有佢一個朋友一齊，我覺得氣氛有啲唔妥，但又唔知乜事，哥哥好似因為有朋友喺度而唔敢講啲事俾我聽，直至個朋友去廁所，佢突然同我講：『如果我死咗，你要同我行基督教儀式，你記住喎！』跟住佢朋友返嚟，佢又唔再講，佢俾我感覺，係佢好似冇乜自由去選擇點樣去處理自己嘅問題。」
遺願未了
毛舜筠表示很想幫哥哥，但她收到的訊息是不要再「搞哥哥」，如果有事發生，是她不能承擔的。
「所以我唔敢插手，如果我帶哥哥去睇醫生，或者搵人去幫佢，可能有好多人話 No，可能有好多人話我哋做曬嘞，唔係等你去做呀，可能仲會話佢（哥哥）添。當時我收到嘅訊息就係咁！」
回想過去憾事，毛舜筠語氣有些激動。
「我好唔安樂，問過一些專家，亦將專家俾我嘅意見轉達俾佢朋友知，但好無奈，當時我收到嘅訊息都係一樣；過咗冇耐，就發生嗰件事。」
哥哥自殺後，傷心的毛舜筠想起哥哥說要舉行基督教喪禮一事，她說：「咁點呀！呢個係咪佢嘅遺願嚟㗎？我應該講俾邊個聽呀？結果好唔容易搵到佢身邊嘅人講咗出嚟，好可惜，最終佢嘅喪禮唔係行基督教儀式。」
爆哥哥畏高
最令毛毛震驚的，是哥哥畏高一事。
「每次同佢坐飛機，佢雙手都會濕曬滴曬汗，緊張到要拖住我隻手，一個咁畏高嘅人，竟然選擇最驚嘅方法去結束自己嘅生命，佢一定係痛苦到失咗性。
「我對佢係有虧欠㗎！我如果早啲同佢傳福音，強硬啲帶佢返教會，可能真係幫到佢過呢關。」
梁 Gi難忘鄭伊健
同樣是鄭伊健前女友，先後愛過同一男人的黎芷珊開門見山，問 GiGi對伊健一些深刻的事？
GiGi說：「好難唔記得喎！」芷珊稱她認識的伊健，會做很窩心的事氹女友， GiGi笑說：「你哋拍過拖添啦！」
有關伊健的問題，簡單如見面會否傾偈？ GiGi都會反問對方：「你會唔會咁吖？」芷珊說：「我哋見到面一定會傾偈㗎。」 GiGi笑說：「我諗我會點吓頭，問候一下，然後已經唔知講乜嘢好。」
此外， GiGi還細說與老公 Sergio的邂逅，間接是法籍前男友 Sly造就。
人精千嬅講丁子高
楊千嬅曾說不能接受姊弟戀，最終卻與細五年的丁子高修成正果。
訪問中提到開始拍拖時，外間對丁子高的印象較負面，千嬅說：「講真啦，嗰時我嘅心態都老人精啦，喺娛樂圈浸咗咁多年，都有個骨架喺度，我唔係咁懵嘅人，佢點會呃到我吖！
「嗰時啲人成人話佢好恨見報，寫親都冇好嘢，講真，我真係覺得佢好愛我㗎！寫親都衰，正常都走咗啦，但佢真係堅持同出親嚟都大方，即使日日被人跟住，佢都繼續做自己嘢。我覺得呢份勇氣，就係我一直追求同等待，某程度都係一種付出；同埋佢嘅思維一啲都唔似佢年齡，佢可以敲醒我一啲諗法，而且佢好孝順，一個男人，如果自己頭家都唔擔戴，真係唔得。」
仔都生埋的楊千嬅，在訪問中更公開暢談自己生活上如何亂七八糟，老公如何乾淨整齊，大爆二人生活趣事。
|
鍾意就快D Share啦！
|
|
|
