產後第 29日瘦曬
今年 32歲的郭晶晶，上周二（ 9月 24日），帶囝囝到中環中建大廈做身體檢查。當日是她產後第 29日，一身運動 look的她明顯瘦番曬，有番條腰。
滾熱辣
帶金叵羅睇中環名醫 郭晶晶狂餵人奶修身
國寶郭晶晶 8月 27日為霍啟剛剖腹誕下 7.3磅男嬰，母子平安。金叵羅在千呼萬喚下出世，霍家為安全起見，悉心安排郭晶晶母子從秘道離開醫院。
上月 24日，本刊拍得郭晶晶兩母子現身中環名醫林立的中建大廈附近，記者發現未坐滿月的她精神不俗，臉和腰比佗仔時消瘦不少，修身神速。據知當日她是帶未足月囝囝做身體檢查。
運動員出身的郭晶晶，產後身體回復得比預期快，她除跟足陪月員指示調理身體外，更晚晚餵人奶修身。難怪榮升做老竇的霍啟剛，上周六（ 9月 28日）出席活動時，大讚呢位老婆滿分。
8月 27日，於養和醫院誕下囝囝的郭晶晶，留院觀察五日後，於上月 1日秘密出院，返回位於沙宣道的霍家大宅，坐月調理身體。郭晶晶貴為國寶級，坐月亦巴閉過人。霍啟剛除一早請定兩名星級陪月員，全天候服侍晶晶兩母子外，陪月員所提供俾晶晶調理身體的食譜，霍啟剛亦事先過目。
母子分頭上車
坐月期間，晶晶聽話留守大宅，避免因舟車勞頓影響傷口埋口進度。直至上月 24日，未坐完月的她才帶住囝囝秘睇位於中環中建大廈的名醫。知情人士說：「晶晶唔想個仔容貌曝光，所以即使帶個仔上診所做例行檢查，佢都自己上診所先，然後再吩咐工人抱囝囝上去，藉此掩人耳目。」
當日，頭戴 cap帽、穿上樸素運動裝和素顏的晶晶單拖離開中建大廈，記者發現她全程頭耷耷，似乎怕人認得。晶晶產後未夠一個月，但修身進度理想，兩頰比前瘦削，當日她雖然身穿白色鬆身衫，但腰間冇乜贅肉。其間，記者上前訪問晶晶，問她與囝囝的身體狀況，但她全程封嘴。之後，晶晶步履輕盈地行去附近停車處上車。此時記者發現晶晶囝囝已在車內，由工人抱實，司機更不時伸手遮擋鏡頭。
餵母乳助修身
母乳餵哺對母親有益，亦可為嬰兒帶來不少好處。關嘉美醫生指出:「因為要製造母乳，食嘅嘢唔會積聚喺身體度，會修身得快啲。但飲食要均衡，飲多啲湯水。千祈唔好亂食中西藥，因為藥性可能會喺奶中過俾 BB。母乳係最好嘅食物，有抗體同活細胞，全部有助 BB抵抗力。」世界衞生組織建議嬰兒出生最初 6個月全吃母乳，更提倡持續餵哺母乳至兩歲以上。
堅持餵奶修身
雖然坐月有專人服侍，但自小已在國家遊泳隊操練，捱過不少苦頭的晶晶，沒有嬌生慣養。儘管晶晶開刀產子的傷口還未完全痊癒，但她堅持日夜餵足咁多餐人奶。知情人士說：「晶晶真係好捱得，為咗令個 B吸收新鮮人奶，佢餵人奶唔係揼定，係直接抱埋身餵，寧願自己辛苦啲。」餵人奶有助產後修身，據知郭晶晶現時體重已回落至 125磅，比佗仔時最重的 150多磅，足足瘦了近 30磅。
低調陪應酬
今年 5月，懷胎 7個月的郭晶晶孖住霍啟剛出席田北辰女兒婚禮，但一直低調的晶晶，卻匆匆離場，拒絕接受訪問。
名字下周公布
霍啟剛和郭晶晶的愛情結晶品，貴為霍家第四代繼承人，霍家上下對這個金叵羅當然如珠如寶。霍啟剛已在有「幼兒園哈佛」之稱的寶山幼兒園為囝囝預留學位，每年學費 17萬元，非常驚人。不過金叵羅至今還未有中文名，爺爺霍震霆已揀了三個名字，目前，仲心大心細揀緊。
而剛榮升嫲嫲的朱玲玲說：「孫仔中文名仲未定，但英文名就諗好九成，不過仲未可以正式公布。」霍啟剛下周將透過微博，向外公開囝囝名字及發布一家三口新相。
上周六（ 28日），霍啟剛以大型體育活動事務委員身份出席活動，被問到郭晶晶及兒子情況時，他有問必答，心情極佳。
記︰會唔會搞百日宴？
霍︰冇乜特別，始終屋企為主，唔使搞咁大。
記︰有冇幫手湊囝囝？
霍︰（邊笑邊答）我之前唔敢去上學習班，都係睇吓書學，依家湊 BB有進步，開始識抱佢。
記︰晶晶湊成點，有冇話辛苦？
霍︰（冧樣）佢真係 100分，因為要餵人奶，佢晚晚半夜要起幾次身餵人奶，呢個月辛苦佢。不過可能係運動員出身，幾個禮拜已經回復得唔錯。理論上佢可以出街，但要忙餵奶，唔可以出去太耐。
記︰依家覺得囝囝似邊個多啲？
霍︰（甜笑）都係似晶晶多，佢對腳好有力，鍾意沖涼，佢一落水就唔喊。
記︰幫囝囝改咗名未？知唔知有限期？
霍︰我知道 42日（辦理出世紙），所以我仲有兩個禮拜，兩個禮拜之後再問我，英文名到時一齊講啦！
記︰上禮拜晶晶係咪帶囝囝打針？
霍︰係去 check up。你知 BB幾個禮拜又要去睇一睇呀，打針呀嗰啲嘢囉！佢都有同我講俾人影到。
啟剛瓣數多
郭晶晶忙湊 B，霍啟剛則竭力鞏固自己社會地位。現年 34歲的他，現職霍英東集團副總裁，公職名銜多多，包括中國人民政治協商會議天津市委員、中華全國青年聯合會常務委員、中國香港體育協會暨奧林匹克委員會義務副秘書長、香港青年聯會主席等。不過郭晶晶為人低調，雖然霍啟剛有多個職銜在身，但他也唔想老婆陪應酬。
|
鍾意就快D Share啦！
|
|
|
