掃呢頁CODE去手機

2013年10月15日 星期二

鄭俊弘出頭天 拒認番老竇

《星夢》雙料冠軍鄭俊弘前晚擁著母親痛哭,場面非常感人。


鄭俊弘出頭天 拒認番老竇

雙料冠軍鄭俊弘、亞軍鄭世豪憑住《星夢傳奇》闖出一片天,其實兩人在娛樂圈黴足12年,受盡白眼,如今一登龍門聲價十倍。在獲頒獎座一刻,鄭俊弘擁著母親痛哭,場面感人,自細由媽媽獨力養大的他,直言絕不會與父親相認。

「同姓三分親」,鄭俊弘與鄭世豪的星途同樣坎坷,二人全靠參加《星夢傳奇》,終於由叫不出名字的咖喱啡,變成今天炙手可熱的明日之星。在過往幾集比賽過程中,鄭俊弘不乏提及生活事,惟每逢談起從無養育過他的父親,鄭俊弘都會抗拒回應,更直言不會奪獎後而與父親相認。而於加拿大長大的他,亦曾被外籍孩童欺淩:「雖然佢哋冇話過我係冇爸爸,但試過打我,所以6歲開始就學功夫,希望可以好好保護自己,唔使媽咪擔心。」而價值60萬港元的獎金及獎品亦會交給母親。

直到長大回港發展,雖然榮膺新秀亞軍寶座,卻因唱片公司問題而與歌星夢擦身而過,後來獲監製賞識演三、四線配角,他依舊繼續努力。不過鄭俊弘亦試過整整半年無工開:「嗰時我有諗過放棄,質疑到底適唔適合喺呢行發展,加上半年冇收入,拍拖出街都冇錢,影響到我同當時女朋友關係,最後愛情事業兩失意,心情真係好失落。」

鄭世豪獲圈中好友陳敏之(左)等人捧場。
  • 鄭世豪獲圈中好友陳敏之(左)等人捧場。
鄭俊弘(左)與鄭世豪在宣布賽果前已雙眼通紅。
  • 鄭俊弘(左)與鄭世豪在宣布賽果前已雙眼通紅。
獲半百fans舉橫額迎接,鄭俊弘心情high爆。
  • 獲半百fans舉橫額迎接,鄭俊弘心情high爆。

返加國進修重燃夢想

結果鄭俊弘向公司請假三星期,返加拿大修讀演藝班,還重燃他對演藝事業的那團火:「因為個Course令我有番熱誠,成個態度、人生觀都唔同咗。」正正如此,就算被師傅巫啟賢喻為「下一個陳奕迅」,他亦毫無驕傲之心:「咁多年來,我試過付出但都係零回報,依家學識咗凡事平常心面對,要做到最好,不過唔好期待回報,最緊要係享受過程。」

前晚在慶功宴上,鄭俊弘提起緋聞女友、秦沛女兒薑麗文都甜絲絲,至於視鄭俊弘如半邊仔的秦沛,接受電話訪問都連番恭喜,透露有聽過他唱歌,祝福他早日擁有自己的唱片及個唱。

鄭世豪做替身的替身

至於亞軍鄭世豪12年前讀過藝員訓練班,多年來只是做過路人甲,甚至有次要為替身做替身,但鄭世豪卻是以「得意」來形容該次經過:「嗰次我要扮死屍,其實對我嚟講好平常,但原本嗰場死屍戲係個內地替身拍,臨時喺香港補戲,我就去頂替佢,個女主角要用木刀捅我隻手,不過太投入就捅到手臂,結果隻手腫曬舉唔起,要睇三個禮拜跌打。」

連「替死鬼」都做過的鄭世豪,憑其樂觀性格而未有想過放棄,還自覺人生是一直在進步:「我知自己咩Quali,樣貌又唔討好,之前出街有人覺得我熟口熟面不過講唔出名,我都覺得回報大啦!」鄭世豪出身自基層家庭,向來非常慳家,連食下午茶都會整條街格價,又覺得有工作很好:「因為有飯盒嘛!上次開工仲望住個海,有飯食、有海景睇真係好開心。」今次憑《星夢》奪得亞軍,這是他入行以來首個獎項,他最大心願是希望能夠出碟,加上他已有個穩定女朋友,希望可以儲多點老婆本組織家庭。

文:影視組



鍾意就快D Share啦!