平日最好笑容嘅超蓮，老豆壽宴當晚冇乜笑容，仲掩住個肚，身體似乎唔多妥兼心事重重。
真面目
千金難買 黑面賀賭王 超蓮被唱貼吳克羣開鋪
賭王何鴻燊上週一（ 25日） 92歲生日，各房連日來各自出招為賭王賀壽，四太梁安琪先為賭王安排一個熱鬧壽宴，至上週四（ 28日）輪到三房，當大家都扮得靚靚出席壽宴時，超蓮卻黑面掩肚到賀，平日見記者都笑笑口的超蓮更連訪問都唔願做，據知又關男友吳克羣事喎！
上週六（ 30日）吳克羣投資、位於台北的潮店「 Debrand」開張，有台灣雜誌就爆超蓮泵水台幣二千萬支助，嬲到吳克羣於微博上舉中指狂鬧，而超蓮更因此怕咗記者為此事追訪。二人將於本週六（ 7日）同場現身東華活動，企埋一齊講會唔會好啲？
自 11年 8月超蓮空運到台灣暗會台星吳克羣後，二人關係日漸浮面，日前 34歲吳克羣更為宣傳位於台北的自家潮流時裝店，而罕有地自爆見過賭王。
超蓮掹衫尾釣蝦
吳克羣最近接受台灣傳媒訪問時稱去年與賭王在香港見面，雖然二人雞同鴨講，但克羣話唔緊張，「就是見一位伯父」。當知道要帶超蓮遊台灣前好緊張，但他引述超蓮當時說：「聽說你們滷肉飯很好吃，我還想逛夜市。」超蓮更曾坐吳克羣電單車尾去外雙溪釣蝦。吳克羣更大讚賭王千金：「她很值得珍惜」。
二人愛得癡纏，難怪早排有雜誌指超蓮注資二千萬台幣（約五百萬港幣）到吳克羣的新店時，吳克羣反應超大。上週四（ 28日）超蓮到珍寶海鮮坊替老豆賭王賀壽都面黑黑，其間更因風吹亂頭髮而發脾氣大嗌，搵形象指導馬天佑「執番靚」先畀記者影相。不過吳克羣即將來港，相信超蓮應該好快笑番。
千金都要捱
跟家姐超雲貪玩性格唔同，何家至靚的超蓮一直都好畀心機讀書，上年更以一級榮譽資格，於倫敦大學皇家霍洛威學院（ Royal Holloway University of London）經濟系畢業。超蓮畢業後，更索性留喺倫敦工作。不過嬌生慣養嘅超蓮一個人留英打工始終都唔太習慣，間中都會喺微博呻嚇辛苦。其實最唔慣，可能係少見男友吳克羣啫！
|
鍾意就快D Share啦！
|
|
|
