掃呢頁CODE去手機

2013年12月25日 星期三

[FACE 344] 忘形甩嘴 祖兒大字馬跨年 祖兒,容祖兒,MF,




上週六( 21日),容祖兒踩入紅館開一連 15場跨年騷,雖然唱第 1首歌〈小日子〉時甩嘴,但之後愈唱愈順,全場最有睇頭係唱〈搜神記〉時,祖兒就以一招大字馬壓喺一堆男 dancer身上玩「人肉層層疊」,難度非常之高。

FBI

忘形甩嘴 祖兒大字馬跨年

壇天後容祖兒,上週六( 21日)第 7度踩入紅館,開一連 15場跨年演唱會,話曬都係年尾大騷,除咗 FBI之外,祖兒老闆楊受成都帶埋太太陸小曼去捧場,連大師兄謝霆鋒忙到死都抽時間同祖兒打氣。

唔知係咪第一場未 warm up,祖兒唱第 1首歌〈小日子〉已經唔記得歌詞,短短一首歌竟然甩 3次嘴,而且唱唱嚇仲走埋音,之後祖兒都「沙冧」道歉:「唔好意思,剛才我激動咗少少,因為實在太高興。」

不過嗰晚祖兒嘅火辣造型同勁舞就表現出超水準,尤其一招大字馬玩「人肉層層疊」,動作同意識都超大膽, FBI睇到眼凸凸。

FBI收到風,祖兒為咗今次演唱會,除搵咗健身教練同佢作魔鬼訓練,仲戒食飯戒咗幾個月,所以身形 fit到漏,而且祖兒經理人 Mani喺開騷前,已提醒祖兒行路要好似 catwalk咁交叉腳步行,唔怪得祖兒成晚女人味滿瀉啦!都係嗰句,最緊要師兄 buy啫!

T-back伴舞

除玩大字馬,更玩埋拗腰同男 dancer大跳火辣舞,而男 dancer個個著住 T-back傍住祖兒,意識超大膽。

扮大肚婆

33歲嘅祖兒,雖然未結婚,但喺演唱會就一嘗扮大肚婆滋味,著住條鬆身孕婦裙,挺住條腰唱〈我的驕傲〉向母親致敬,其間唔少 fans都伸手摸嚇佢個假肚。祖兒仲話自己好鍾意小朋友,所以一定會生仔,希望可以喺 36歲前實現喎!

星 bra look

全晚最性感,要算係呢個露腰兼露背嘅「星 bra look」,唱〈桃色冒險〉時,祖兒不斷扭動 23吋小蠻腰,性感得嚟又有動感。

MJ上身

祖兒出道已經 14年,演唱會上亦唱出出道第一首派台歌〈未知〉,其間祖兒跳到忘我時,仲好似 MJ上身咁不斷 fing頭。



鍾意就快D Share啦!