媽咪姐
愛巢加 Sammi名 安仔求婚相流出
8月 19日係鄭秀文生日，安仔買咗佢最鍾意嘅粉紅玫瑰求婚，睇相就知兩人開心又感動！但點解張相無頭嘅？睇怕係擺相上網嘅朋友怕影響安仔 Sammi，特登 cut咗囉。查實安仔都自爆怕 Sammi拒絕，「驚，但無得驚。嗰晚係佢生日，就試嚇求婚囉。佢係好開心，我哋都好 sincere（真誠）。」
恭喜！恭喜！踏入年尾，娛樂圈又有天大喜訊!許志安同鄭秀文呢 pair經歷 22年離離合合，自前年復合以來，恩愛到痹，不時拍拖出埠，又成日買餸煮飯仔。
近日佢哋被爆上年 11月 30日喺印尼峇里島秘婚，但兩位當事人同經理人郭啟華就否認，只係話安仔係喺 Sammi生日嗰日（ 8月 19日）求婚成功，之後兩家人先齊齊去峇里慶祝！
嗱，媽咪姐收到少少風，仲喺網上搵到一張極之珍貴嘅相擁求婚相，可以同大家分享嚇。安仔為求抱得佳人歸，原來暗中喺 Sammi生日前籌備求婚大行動，由買戒指到買花都揀咗好耐，問埋兩人身邊密友意見先撲槌㗎。
安仔知 Sammi鍾意熱鬧，仲專程叫埋兩人嘅老死車婉婉同其他朋友，一齊見證呢個「歷史時刻」！而求婚地點就喺安仔寓所幹德道殷豪閣。嗰晚大家同 Sammi食完生日飯後，跟住就熄燈，安仔靜靜咁推出蛋糕，再唱名曲〈唯獨你是不可取替〉。呢個重要嘅時候，安仔攞出戒指，再跪低，然後兩行眼淚已湧出嚟，咁冧， Sammi想唔應承都幾難啦！
媽咪姐仲收到風，佢哋去峇里真係結婚，而且喺一間有無敵海景嘅教堂完婚，被邀出席者只得雙方家人。為承諾「每天愛 Sammi多一些」，安仔俾咗 100萬禮金外父外母，仲答應將住緊嘅殷豪閣加埋 Sammi名落去㖭。講真， Sammi身家比安仔豐厚，唔會介意呢啲。不過安仔呢份愛妻之心，值得一讚呀！
2千 5百萬殷豪閣
安仔甘願將住緊嘅西半山豪宅加埋 Sammi名，即係俾咗千幾萬老婆揸手。佢仲講到明兩公婆之後會一齊住。之前，因 Sammi搬屋而與安仔同居，亦令感情升溫。「我哋無咁樣相處過，嗰幾個月確實非常舒服。」
|
鍾意就快D Share啦！
|
|
|
